WWW.TUNGZANGNEWS.COM

 
KHAICI-VAWH HUN

LST Bulphuh: “Kap kawm-in, kuankhia-in a tuh ding khaici a pua mi in lungdam-a kikona tawh buhlomte pua-in innah hong ciah ding hi” (Psalms 126:6).  

Tuni’n Australia gam ah Avondale College ci’n a minthang sangpi omna pen gammang tulak hi a,  Adventist pawlpi mite tenna tawh kigamla hi.  Mrs. Ellen G White le adang kimkhat tua mun ah lal uh a, na khat peuhpeuh pat ding ngaisun uh ahih hangin lungkiat huai mahmah hi. 

9 July 1896 zan in Mrs. White in manghoih mahmah khat man a, Pasian nasemte tha-ngah mahmah hi.  Cooranbong nai a lo uh ah Ellen le James te nupa lamseu kawmin sangpi ading kisapna kikum uh hi.  (James a sih khit sawt zo a, a mang sungah kithuah uh ahi hi).

Mrs. White in, “Koi pan sum hong pai mawk ding hiam?  Leitang to kham in lametna le upna tawh ii kho ding hi.  ‘Pasian – missionary’ leitangh tungah thuman khaici ii vawh ding hi,” ci hi.

James White in, “Upna, lametna le ‘kiniam khiatna  – simplicity’ tawh missionary leitangh nasep ma ii pang ding a, ii hanciamna pan tawntung thaman  ii ngah ding hi,” ci hi.

Ellen le James te nupa huan mong dong lamseu a, hong kileh kik ciangin anguite tungah ‘berries’ gah tawh kidim a muh ciang lo pah lian uh hi.   Ellen in, “Hih ankungte thupi ka sak lo hi ven!  Gim taak ding a, ka ngaisutkhol het lo pawl hi ven!  Hi zah tampi piang ding lamen het lo hi veng maw, ‘inferior - neumuh kha ka hi ve maw!” ci hi.

James in, “America ii thuhilhna khuapite ah tam kingah lo ding tawh a kibat hang lamet-lohpi TOPA in pung sak hi  Upna le lametna tawh khaici-vawh in la, lungkia kei in,” ci hi.

Tua khit a sawt lo in Africa pan sum kingah a, sang kilam zo hi.  Tuni in thuhilh sia, sangsia, lai-at, sumsazian-len, sangmang tampi Avondale College tualsuak tampi kimu thei hi. 

Laihawm khat na piakkhiatna le na vengte tungah na thusiamnate in tuni’n thuman khaici-vawh na hi hi. Na nasep tawh pawl sungah mi tampi hong lut pah loh ciang lungkia kei in.  Pasian in na vawh khaici thupha pia ding a, an tampi na la ding hi.  TOPA’N thupha hong pia ta hen! Amen.

Ken Suang Za Nang

 


Comments




Leave a Reply