WWW.TUNGZANGNEWS.COM

 
Nasep Na Kheel Cianga Theih Ding Pawlkhat
 
Tuhun pen nasep a kip, a kho cih om nawn mello in a hoihzaw nasep a om nak leh kum thum kum li zawh ciang nasepna thak ah mite a kisuan ziahziah uh hi. Hih pen tuhun leitung paidan hipianta hiam cih theih hi. Leitungbup khuata banga olno taka a kizop ziauziau theih khit zawh hih banga nasep khek ziauziau pen hong tam semsem hi. Tua banga nasep na kheel ciangin maitak takin na sepna lui nusia inla, na seppih luite zong kuamah nopmawhna dingin kampau, gamta kha kei in. Amau zong hun hong pai zel leh nangmah tawh hong kituahkhawm kik, nangmah tawh hong semkhawm kik kha thei hi. Tua manin, bangzahta in na seppihte na mudah, na hua phial zongin a kimukik dinga kikhenpak bangin lungdam maitai takin kikhen zaw un. Tua hileh na paisante in zong hong muhna ah 'picing' hong sa ding uh a, na kimuhkik uh zong nuam ding hi. 

Nasep na laih ding ciangin na paikhiat ma in hih a nuaiate hih teitei in; na kisik kei ding hi. 

1. Na tungsiahte tawh kitelsiam, kiho khin masa hamtangin: Nang hong makaih, hong kem, hong panpih, hong huh leh hong pattah na tunga pa/nu tawh na paikhiat ding vai limtak kiho masa in. Kiho masa cih ciang na tawpna ding laikhak na piak ma in na tungsiahate kiangah na mailam khualna hang tawh na tawpnop thu leh nasep dangah na pai a kuldan theisak, hilh, telsak masa hamtangin. Amau hilh masalo, theisak masalo in thakhat thu in tawpna lai khak veva kei in. Lamdang sa ding uh a, zong hong muhna uh kiam ding hi. Na tawp sawm hangin na sep hun sung khempeuh kuhkal tak, citak tak a nasep ding khempeuh na zawh ding thu hilh in. Na sep nunung ni ciang dong hahkat takin nang sepding teng sem khin in. Kilawmthawsak leh kikhutzaw sak in om kha kei in. Na tungsiahte hoihtak in hilh, telsak lecin amau a kilawma pusuak dan leh nasep khawldan nangawn hong hilh in hong makaih toto lai nuam ding uh hi. 

2. Lungduai hamtangin: Na tawp ding vai na gen, na theihsak ciang na tungsiahte in hong hehsanin hong thangpaihbawl, hong nuakbawl kha thei ding hi. Ahi zongin lungduai takin om tentan in la, nang bel heh sawm het kei in. Na heh phial leh zong kidek teta inla, na lawmte leh na seppihte muhna ah na hehna lakkhia kha kei in. Na mawhna hong zongin na thanemna dingin hong bawl kha ding uh a, na nopmawhsak theihtheih dingin zong hong gamta nuam phial dinguh hi. Ahi zongin lungduai in maitai ding hanciam hamtang in. Na nasepna na laihnop manin na kisuanlah nading omlo a, nopmawh nasak nading zong omlo hi. Mite in hong engbawl hangin na hehna ding om tuanlo a, na kidek zawh leh nang mailam adingin hoih penpen hi. 

3. A kisam khempeuh hih mengmengin: Nasep na tawp ding ciangin na tawpma in na hih ding pawlkhat om thei hi. Tuate bangteng hiam cih kanin thei inla a manlang theithei in hihkhin mengmeng in. Na ni nunung pen a tunma in na hih ding khempeuh zo hamtang in. Nasep nawnloh ciang na va khuadak dawkdawk kik kul nawnlo dingin kiva setset in. Na sum ngahzah ding, na nitha bangzah omlai cihte limtak in tuatkhin in. Na tawpna ding vai a saite tawh kithuza inla na tawpna lai zong a hunlap in pia in. 

4. Na tawp ni dong nasep hanciam in: Na sep ni nunung pen dong hahkat takin sem inla, a tawp ngeilo ding bangin hanciam in. Tua bang hileh na lawmte lungsim ah a zingciangin zong nang a kuanlai dingin na koihphial ding uh hi. Nang sepdinga hong kipia peuhmah na zawh man zahzah zo hamtang inla, kiziakai sak tuam het kei in. Na tawp ding manin na lawmte tawh na kizopna tatsak kei inla, lawmhoih bangin kikhawlthei suak un. Na kizoppih suak nopte a min uh leh a kizopna dingte lai tawh ciamteh in kipia tuah un. 

5. Hong zol uh hang ngaihsun pha mahmah in: Na tawp ding hong it lua bang phial in hong it bawl in hong deih bawl in hong kho nuam kha ding uh hi. Na khasum nangawn hong behlapsak in hong semsak nuam lai mai ding uh hi. Na za hong khan in na hihna hong behlap in makai dingin zong hong lamto nuam kha ding uh hi; ahi zongin limtak in ngaihsun pha mahmah in. Banghang hiam cih leh mite genna ah, a theite genna ah, tua banga a kikhohte a kideih kei kik vat leh manlang takin kinotkhia, kitawpsak in kipampaih hi, ci uh hi. Hong deih lai un hong deih mahmah uh hangin hong deih nawnloh uh ciangin hong nawh nawlkhin mahmah ding uh hi. Na tawp nop thu a theih khit uh ahih manin amau lam pan paulap ding ol mahmahta hi. A tamzaw tua banga kikhote kum khat val sem zom zo mello hi kici hi. Banghang hiam cih leh na mawhna a zonnop uh leh na sep ut nawnloh thei uh, hong deih kei le uh zong 'na ut nawnlohpi', 'na tawpsawm khin veleh' hong ci lel ding uh hi. Tua ahih manin na tawp ding a kitheih khit cianga hong kikhoh a, hong kilettaang nop leh - limtak in ngaihsun kik masa in: Sakhi nangawn in zong a tatna ding kuam kua khual kici sam hiven! 

Tua ahih manin pasal in na sawmsa khat pen nungkik lo in lungdam maitai takin phusuak vet zaw in. Ahi zongin na sepna ah citak in na hih peuhpeuh hanciam na hi cih lak khial ngei kei in. Tua hileh na lawm leh gual, na seppihte in - mi citak, mi kuhkal, a nasepna ah muanhuai, ngimna kician nei, a sawmna khat ah kip tinten ciin hong ciamteh dinga, hong pakta semsem ding uh hi. Hong kipakta peuh leh hong kizahtak ding hamsalo hi. Tua pen mihing khat thupina a kilatna hi a, mihoih a hong kiciamteh nading ahi hi. 

Na omna peuh ah nahoih sep khawlsan ngei kei in. 


Hau Za Cin
Phuitong Liim
 


Comments




Leave a Reply