WWW.TUNGZANGNEWS.COM

 
Zomi Kipawlnate Sep Dinga Hoih Pawlkhat

Leitung minam tampite lakah khat ahi Zomi akicite pen minam tawm leh minam niam mahmah khat kihi lai hi.

Minam lian leh thupite banglo in ei tangthu (history) nangawn a kan zolo, a puah zolo kihi lai hi.

Minam lian leh thupite banglo in ei tawh kisai thu kisam leh phamawh tampi a nei zolo, a kan zolo i hi lai hi.

Ei-le-ei a kitheilo, a kitello minam kihi lai hi.  Min kician nangawn a nei thei nailo, pau kician a nei nailo, kiukna kician a nei nailo minam kihi hi.

Ahizongin Zomi kipawlnate leh mimal a tei, a tangzang i om leh sep ding tampi, eima septheih tampi om veve hi.

Zomi kipawlna kician khat in hih thute ‘project’ i nei in hong sem leh deihhuai mahmah hi.  Tua thute en dih ni:

  • Mihing phazah – Zomite a phazah zong a kitheilo minam i hi lai tazen hi.  Zomi kipawlna kician leh tangzang mahmah khat in census (mi phazah) kumpi simsa ngaklo/zanglo in hong sim leh deih huai mahmah hi.  Khua khempeuh pan in mi phazah la khawm in sim theih dingin ka tuat hi.  Zomite tenna khuate beek bel a thei dingin kilamen pong leng maw.
  • Tua mah bangin sanginn om zah, sangnaupang zah, football field zah, cih bangin a tuamtuam kaikhawm zo lai leng deih huai mahmah hi.
Hih thute kaikhawm bek hilo in laibu suah in kihawm thei lai leh deihhuai hi.  Ei-le-ei i kithei nading; midangte hong theih nading in kisam mahmah hi.

Koi ciang ah om i hiam (dinmun) cih zong theihna hong suak ding a, mailam kalsuan zia ding zong hong lemzaw deuh dingin ka ngaihsun hi.

Banghang hiam cih leh, kipawlna tampi in Zomi khantoh nading na sem nuam mahmah se leh, bangzah sem leh a ‘khanto’ kisuak ding hiam cih a genthei om tuan lo hi.

Ka cih nopna ah; khantohna i cih nam tampi om a, tupna ngimna kician i kipawlnate in zong a neih ding thupi hi.  Music kipawlna i neih leh i suan mahmah ZOMUS in Zomite music lamah khantoh nading sem nuam mahmah hi.  Ahizongin, a ‘project-te’ uh Zomi sung music lam khangto sak taktak ding hiam theih hamsa hi.  Tua man in a teh thei na khat sep ding geelzaw leh bang aci tam ci ing.  Gentehna, Zomite’n music school bangzah nei a; mihing 1,000 ta a ding music school khat (1) om ding hanciam leng khantohna khat hilo ding hiam?  Tua bang haksa ding a hih leh zong, mihing 10,000 ta a ding music school khat e?

Lailam kipawlna khat in zong mihing 10,000 ta in laibuli (library) khat i neih zawh nading hanciam leng e?

Business lam kipawlna khat in kum khat in Zomi business 4/5 a thak a om det na ding hanciam leng e?

Sports lam kipawlna i neih leh tua teng zong a omsa football ground-te puah ding, ahih kei leh football ground behlap ding kisam hiam cihte kan in sem leng e?

Zomite khantoh na ding sem ding cih gemgam sangin Zomite a ding sanginn 2/3 behlap ding cih pen theih baih in, teh theih hi.  I lawhcin leh lawhsap kician takin kitel ding hi.

Tulaitak i pai dan pen “Zomite khantoh nading” nasepna ah lawhcing i hiam, lawhcinglo i hiam cih nangawn kitello hi.  Banghanghiam cih leh i ngim pen teh theihloh, muh theihloh a hih man hi.

A taktakin hih bang nate pen kumpi in hong sepsak ding, hong piak ding ahihi.  Ahizongin kumpi tung bek ah kinga theilo i hihna cian mahmah khinta (kum 40 val) i hihmanin ei mah in i sep ding thupi ding hi.

Tua bangte i sep ciangin ei-le-ei kithanuam sakin, i kumpite maizum sak ding i hihi.  Ei-le-ei kimuanna hong khang ding a, minam kipawlnate zahtakna leh thupi simna hong khang ding hi.  Tua bek zong hilo, minam i hihna zong ki thupi sim tektek ding a, minam thupi zong i suak takpi ding hi.

Zomite i haksatnate pan a taimangte i hih lawmlawm sangin i haksatnate a phungamte, haksatna pan a suakta zo minamte ci a midangte hong ciamteh ding kal ngaklah huai mahmah hi.

Hih thute keima ngaihsutna hi a, kuamah mimal leh kipawlna demna hilo hi.

 


Comments




Leave a Reply