WWW.TUNGZANGNEWS.COM

 
Zomi minam vaai lamsang ahoihkhom khatciang kitungta cihtheih ahihman-in vaai thak khat lungngaih ding-in hong puakluut nuam-ing.___________________________________________________________________________________Vaai Thak
Amasa-in, Zomite' lungsim puakzia khangkhaan nading mimalkim' tung-ah mawhpuak omciat-hi cihthu keimah mimal muhlehsaanna ahihi. I' thugensiam neih khenkhat-in, "Zomi ataangpi' tualniamna leh tuantualna" akisuut ciang-in "hihbangte minam it hikei, minam akosia, azahko-hi" ci-a asaangzong omhi, ahizong-in hih ka' thusun-pen "Zomite akoko" hilo-in, "I' lungsim puakzia khangkhaan nading" lunggulhna ahihi.

Zomi sung-ah ataangpi-in, "khuapimi lungpuak" akici cimawh dongtuakte khualsiamna, meigong tagah, peemta, daaipaamte khualsiamna cihte naakpi-in kisam ahihkeileh om naailo zah-in tawm-hi. Tua baan-ah, tualsung (community) leh tualleenphung (society) hualpi-a vaaihawmkhopna lamsang-ah naakpi-in kituantual mahmah-hi. Khatveivei "Zomite' puansilh niikteen hun kum 100 vaaldeuh hipan saam hiven" ci-in I-ki hehneptheih hang-in, ei' sang-a puansilh niikteeng nunungzaw minamte nangawn-in kipawlna vaaihawmna lam-ah akhangkhin gamliante' kalsuanzia ciing (adopt) thei veve-a, a-Zomite ciang-in abang-in hong hucip tuamse ahidiam cihtheih hongsuak zeel-hi.
Mimal muhna-ah, minam sung-ah ki-ettuahna, kidonna, ki-awlmawhna ahiding lam-ah masotna kimu theilo-in, ahiloding lam-ah: kisitna, khialhna neuno khat kipansim tiuteuna, mawhmatding kizonna, kizuakthaang nading zuauthu nangawn zatna cihte lam-ah kimazang mahmah-hi. Itding sang-in "it" hong kicihding kiteel zaw-a, sepding sang-in "seem" hong kisakding kiteel zaw-hi. Thutheihding sang-in "thuthei" hong kicihding kilunggulh zaw-a, thukhualding sang-in "thukhual" hong kisakding kilunggulh zaw-hi. Hihte' ziak-in pawlpi, behlehphung leh tualsung kipawlna abangkim-ah kihualna, amaan kalsuanna leh dinkipna om theilo-in ka-muhi. Hihte ataangpi' zungpi-pen "kiphatsakna (arrogance), huaihamna (greed), angsungtheihna (selfishness)" hi-a, Topa ZEISU' gaal ahihlam I' theihkimsa ahihi.
Tualsung tualpua khuamuhna atoii man-in tawntung nunna (eternal life)' ading lunggulhna cihthadah leitung mahmah-a sawtpi kimangding thulehlate' sang-in mite-in ahoih, athupi, athukhual-a hong muhpak nading bekbek akizon man-a atung-a Topa' gaalte nangawn "gaal" ahihlam atheilo bang-in aituam phattuam nading leh tomkaal mite' piimuh pakding ciang-tawh naakpi-in minam ahuampi ataai valval laaitak bang-in kimu thei-hi. Tua ziak-in, thumaan pomkipding, thumaan gending' sang-in "zuau taleng hongki mudahkei peuhleh," cihlam-a kalsuanna-pen "agualbaan, a-democracy vaai, anampi lungsim" bang-in kiseh gawpta-hi. "Thumaan gente ki-ngailo" cih uplehsaanna-in minam kalsuanpih ahihman-in atung-a angsungtheihna leh kiphatsaknate-in minam hong makaih-hi.
Itna (Pasian) limlim-pen angsungtheihna leh huaihamna-tawh anungta mite leh simthammi (hypocrite: LSt)-tawh akido-ngiat ahihmahbang-in minam kalsuanna, tualsung, pawlpi kalsuanna abangkim-ah hihte-in khialhna laklo, maaizomsak, pumphatphat ahihman-in amaan lampi-lam manawh ngeilo-hi. Topa ZEISU' paizia-pen, "sanggampa akhialhleh akhialhna lakding, gending, eibek-tawh hongsaan keileh nihlehthum-tawh genpihding, alem tuankeileh pawlpi upate-tawh, alem mahmah keileh pawlpi maai-ah, pawlpi pan-a hawlkhiatding" zahdong ahihi. St. Paul inzong, "... amaute' nuntaakna Satan' khut-ah ka-pia khin-hi" cigiap-hi. Athulim mahmahlo, azia-om mahmahlo thute maaizamsak, maaimangsak ding-in Pasian mahmah inzong hong deihlo-a, leitung gam khatnate inzong "mawk maaimansak" ding ahihlohna-mah bulphuh-in thukhunpi (constitution), thukhaam (law), leh thukhun tuamtuam-tawh mipi ahoihlam-ah akalsuanpih ahihi.
Zomi lungpuak asimtham (hypocritical: ahoih lopi ahoih kineihna, akhual lopi akhual kineihna, a-it lopi a-it kineihna cbt..) zialehtong ahithei zah-a I' khiap nading-in Laai Siangtho bekmah, ZEISU' thuhilhnate-mah, Zomi Pupate' itna leh cihtakna-mah naakpi-a I-zonkiik, I-zapkiik, I-matkiik hamtangding simloh lampidang omlo-hi. Pupate' ki-itna leh kikhualna Pasian' zialehtong-tawh naakpi-in kinaai-a, tulaai Zomi Khazihmi (Tapidaw, Christian)te' zialehtong' sang-in pupate'a limci zawtham-hi. Inntung, innnuai, kong leh phaaitam te-tawh kizopna, khuasung, tualsung kizopna pupate-in itna leh kitelsiamna naakpi-in bulphuh uhhi. 
Pupate' zialehtong leh tuhun Zomite' zialehtong Etkaakna themno
Pupa' hunlaai-in akhial omleh "mang (confess: khial kha-ing ci)"-thei uh-a, akhialhna-tawh kituak thuumna kibawl uhhi. Akithuum-a akisaanglo omlo zah-in kithuumna leh kimaaisakna zatsiam mahmah uhhi. Tuhun takciang-in akhialte akicitheizaw, meeltheih hauzaw, sumhauzaw ahihnaakleh kithuum cihbang om selo, "angaap nana-ah hongkhia tahen" kici pheupheu laai-hi. Khazihmi minpuate ngialbang-pen Naantal' tung-ah akhial kimlaai, "Naantal tung-ah thuum kuul zenzenkei, Pasian' kiang-ah thuum lelning" acibang kitamzaw simsim-hi. Leitung-a anungtalaai I-hih man-in Pasian' kiang-ah I' thuum mahbang-in I' khialhna, I' khutkhialhna, I' baankhialhna-pen atuknate' tung-ahzong thuumding Pasian-in adeih ahihi (..........biakna tau-ah na' citpiak-biakna nusia inla, na' sanggampa-tawh kilemna bawl masa-in.......... ZEISU' kammal).
Pupa' hun laai-in midang khat-in ahuhleh tua huhna/lungdamna mangngilh lo, kimangngilhbawl hetlo-in, ahun alem ciang-in sagiltahna (gangawhna)-tawh lungdamna akithuk ciatciatte, "Ciimnuai-a sa kibaak, Geeltui-ah kithuk" ci-a thuciin aneite ahihi. Tuhun ciang-in mi khat-in honghuh, khatvei, 2vei, ....9vei, asawm veina-ding takciang-in hong huhzop zawhkeileh hong huhna a-omsa khempeuh nangawn 'eek' asuaksak, agensia, zuauthu nangawn zongtawm-a alehpante ataangpi-in kihi-hi. Khazihmi minpua ngialtebang "Pasian' tung-ah lungdam ko lel-ing" ci-in hong huh mi khat' tung-ah lungdam ko selo-in biakinn-ah "Pasian-in honghuh" aci tam simsim-hi. Thangno-in gaalte' khut pan-in Khualpu ahotkhiat nung-ah, Khualpu-in Thangno' kiang-ah "lungdam" acih sangsik-in biakinn-ah, "Gaalte' khutpan Pasian-in hong honkhia" cileh Pasian upna lam-ah maan mahmah saam napi-in leitung-a a-omlaai, taksa-tawh anungtalaai vive kihi ahihman-in Khualpu' zialehtong-pen adaan phalo hi-a, leitung ngeina hilo-hi (Vaantung ngeina ci-a, anne nawnlo, tuidawn nawnlo, sumlehpaai akisam nawnlo lah hituanlo I-hihteh).
Pupa' hun laai-in zuauthu-tawh mi agensia peuhmah thukanna kinei-a, atukna (azuauphuk mi) pen-in thukanna sum 100 ahihleh "naupuak" ci-in 200-tawh luutna (maaisak nading ngetna) kibawl ciatciat-hi. Tuhun-in "zuauthu" gending ki-kihta peuhmah lo-a, zuauthu-tawh mi ommuang khat gensia dikdek, kizakiik, phamawh saselo, kithuumna-lah omlo, hak lile-a zuau giapgiap, biakinn sung pulpit-khawng tuh giapgiaplaai, Pasian' naseem hong kicihding lunggulh zawlaai cihbang-in khang kilumlet-hi. Ka-pulaak thapaai mahbang-in Zomite-in "Zuaugen" I-kihtaak hetloh mawk-pen Satan' mencipna, khemcipna, bumcipna ahihlam kitheilo ahihkeileh Pasian kikihta hetlo khatzawzaw hiding-hi. St. John' mangmuhna-ah "Sihna nihna, kaat-tawh akuang hauhau meilii" sung-a akikhiading mite' lak-ah "mizuau ahkl zuaugen mi" kihel-hi. Pupa' hunlaai-in "Kamsia sial liau" acihpen 'zuauthu-tawh kidaisakna' a-om ciang-in thu kikan-in kiliausak ciatciat, aliaute inzong liau pahlel, gaalbawl selo! Khangthak-ah Pasian biakna lam-mah paulam-in leengla kikhah saamlo, azuaute inlah "khial ing-ei lawm (sorry)" beek vaci tuanlo cihbang-in asialam khantohna-in hong vuknelh gawpkhin tan-hi.
Hih pupate' hunlaai leh nang leh kei' khanghun akilamdanna bulpi-pen amau' hunlaai-in "ahite ahibang-a saansiamna"-tawh kinaai-in, "thumaan" tung-ah dingkip zawtham uh-a, nang leh kei' khanghun ahihleh "kiphatsakna, kihazaatna, ki-elbawlna, kisimmawhna" tung-ah kiding cihna ahihi. Hihte bulpi-pen "Angsung leh Angsungtheihna (Self & Selfishness)" ahihi. "...... ama' angsung (self) nusia-in, ama' singlaamteh pua-in Keima' nung hongzuui tahen.... (Topa ZEISU) acih-tawh akilehbulh liinlian ahihi. Tua ziak-in Zomi sung-ah ANGSUNG zonna bekbek-in mun aluah ahihi. Kiphatsakna (arrogance) themcik ensuk laai lehang: mindeihna, ahoihlopi ahoih kineihna, mite-in hong khannelhding launa, mite hazaatna cihte hi-a avekpi-in ANGSUNG (self) ahihi. "Angsung"-pen khangthakte-in kamkaihlet kisiam hetlo-in kikhahzau lua mahmah ahihziak-in pankhopna alim-ateel-ameel-amang kimu theilo-hi. Aphungcing zawdeuh kipawlna a-omleh "abeh-aphung, alawm-agual, akhuapih-atuipih akicinman" cihpeuh hiden-a, cidamtak-a kipawlna akalsuan toto khatbeek Zomi sung-ah omlo-hi. Khat phungcing ding-in kithawileh tuasung mahmah pan-in meengkhia, inntuankhia, innpi leh inntuan ki-el, nautaangte kihawhding nangawn kikhaaktan, akikawm omleh thusitna, maaipuamna, warning piakna-tawh kidawntuah cihbang-a I-om zeelzuulna aziak bulpi ANGSUNG ahihi.
Leitungmi khempeuh genloh vaanmite nangawn-in "ANGSUNG (SELF)" neiciat ahihziak-in Lucifer leh apawlte Vaannuai-ah akikhia ahihi. Mihing I-hih naakleh ANGSUNG akinei ahihi. Tua I' neih ANGSUNG-pen kamkaih letsiam nading akisin mite khangto-in, anamtui minthanna (fame) neizaw uhhi. 
ANGSUNG Kamkaih Letsiamna Masa-pen, midang' tung-ah thupha bawlding cih hinaai peuhmah lo-in, midangte' lawhcinna haza loding, midangte-in kilawm kituak-a angah sil manphate ei' kilawm kituakna ki-entel lopi-a deihgawh loding, zuauphuak-a mite' mindai nading kampau loding hi masa phot-hi, hihpen kamkaih letzia aniampen ahihi.
ANGSUNG Kamkaih Letsiamna Danh Nihna-ah, mite' lawhcinna thumaan ahihleh alungdampih theiciang, anuampih theiciang, ei' lawhcinna akiphatsakpih lo-a, alungdam theiciang, mite' lawhcinna deihgawh taleh haza lo-a, ahaanciam theiciang, mindeihna neiphial taleh kilangh khiasak lo-a akikeemsiam (banghanghiam cihleh mi khempeuh mindeih vive kihi-a, minpha akingah zolobek ahihi)  cihte alaaihawl hipan-hi.
Alawhcing ANGSUNG Kamkaih Letsiamna-pen ZEISU' kammal-tawh kizuui-a gamtat kampauna hiding-in ka' seh-hi. Pasian' thu-um/thuthei-zong ahilo honkhat, gam leh minam' ading, tualsung' ading, innkuanpihte' ading-a nuntaakna apia, apia-ngam, aluangkham mi tampitak om-a, tuabang mite' min mangthang hetlo takpi-hi. ZEISU' ading-a anuntaakna khempeuh apia Nungzuuite' min tuni leh leitung beidong amang ngeiloding ahihmahbang-in Pasian' thu ahilo leitung minam leh gam vaai-a ama' ANGSUNG nusia-a amapang, amin aki mangngilh ngeiloding ahonhon-in amun-amual zuui-in leitung-ah a-om zihziah ahihi. Tuabang mite-in ama' innkuan masa (first family members) te a-itlo hilo-hi, angailo hilo-hi, ahizong-in ahuampi, ataangpi' ading-in kiphal-uh ahihman-in ANGSUNG anusia siam-uh ahihi. "Sihding ciang-a alaulo ngalliam omlo" paunaak a-om mahbang-in, sihding alau vive, nulehpa leh ulehnau a-it angai vive, ziilehta leh lawmlehgual angai vive pipi-mah tuate a-itlo bangliang-a ANGSUNG Kamkaih letsiam mite ataangpi-in minthang (famous) uhhi. Tua nangawn akiphawk kha vetlo adiil-in om laaiding ahihi.
Khangthak Zomite-pen ei' innkuan-mah, ei' behlehphung-mah deihsak tiuteu, minlah thangnuam seemlaai, satanh kihawm hileh thumaan-a akitanh sang-in ei' naaihuai bekmah-in ngahleh uut beklo-a, seem, minlah deih mahmah veve, mite-in amau' satanh angah nangnawn haza mahmah, kipelhsak-nuam mahmah, minpha deihlaai veve, mite' ngaihlohding lau-a mite' zuauna nial ngamlo, thumaan gen ngamlo, mindeih seemseem veve,,,... hihbang-tawh I' ngah minte-pen alamzing zuuilopi-a aki-ngah hi-a, meeltheih naaihuai hihziak-a avaal akaan-a kipum phatphatna pan-a mi' theih, kizuakzuakna pan-a mi' theih, meeltheihte' hong pulaakzawh man-a mi' theih cihte "minthanna, minphatna" hi peuhmah lo, thamlo-in tuabang-a aki-ngah min neite-pen atheihloh kaal-in amau' lungsim sung-ah "hong kithei mahmah mawk aive, kiminthang mahmah lel-ei, ..." ci-in kiphatsakna hong gahkhia lihliah-hi.
Tua hi-a, ANGSUNG kamkaih let I-siamkiik theih nading-in I' muhtheihloh Pasian' Thu ci biambuam naaikei laai-ni, "Pupate' Thukhualna Zialehtong" hoihte lamnaih kiik-in, zamkiik lehang Zomi sahkhua nuntaak khuasakna leh kalsuanna-ah "thumaan itna"-in mun hongla ding-a, I' minam hong cidam dinghi.
Zomi Pasian' Thupha!
Zokhai ***********************************************                                 
T. Zokhai          ITNA-IN GUABANG HINNA-HI       
60 Narr-Maen Drive                                                           
Croydon Hills VIC 3136        
Melbourne, AU                  
Tel: +61 39723 0460                                     
Mob: +61 420 800 560                         
***********************************************
 


Comments




Leave a Reply