WWW.TUNGZANGNEWS.COM

 

Guai,

Ei leh ei kidong ki masa hilehang"
1. Hih CNF icih kuate hiam?
CNF icih in sanggam Hakha, Thantlang lamte makaihna Chin minpua thautawite ahi uhhi. Atung in Falam lam makai uh aa makai kituh, kisuam (kisuam zolo) uh ahihman in tu in Hakha, Thantlangte makaihna ahihi. (kituamlawh hilehang)
2. Chin State saklam (northern) koi teng ah busak sawm uhhiam?
Falam uk sung ah busa ngamlo uhhi. Banghanghiam cihleh, kihta(ngamlo) uhhi. Zomi kicite gam sung bek ah busa uhhi.
3. Banghang Falamte kihta in busa ngamlo aa Zomite kihtalo in busa ngam uhhiam? 
Hih dotna pen athupi pen ahihi.
Falamte akihtaak na uh gen masa lehang, (kei muhna) 
(a) Falamte pen mi thunemte hi-in cimphawng aa (Hakha, Thantlang dan kona hilo) a ki mawk buanbuannamte hilo uhhi. Mi ngongtat nam hilo uhhi. Ngongtat, molhtum suang, thatang suangte aa ding kihtak huai hetlo hi.
(b) Ahihhang Falamte sung pan (mimal aa panpih, kihel a omkha phial zongin), CNFte sawltak, inntek semding, bu tom ding (traitors) akipiakhia omlo uhhi. Tuahang in ki busa theilo uhhi.

Zomi sung (kei mimal muhna ah)
(a) Zomite zong ahihtheih laiteng ngongtat ding sawm masa nuam hetlo nam ihihi. Cimthoihna aa buan-gual hawm nam, kipum buanbuan nam i hikeihi. Tuabang a ngongtat a omleh zong a peel lelte ihihi. Falamte mah bangin  mi ngongtatte aa ding kihtak huailo hihang.
(b) Ahihhang, ei sung mahmah pan hih tualthat CNFte aa ding, inntek sem nuam, mi maivil, minamzuak nuam, makai ut, bu tomsak nuam, kipiakkhiat gengen loh, kituhteh hihang. Hih ei sung pan aa mikheltat teng hang hilel in kamuhi. Chin Supreme Council acihna vuah alian mahmah makai nih (amin lonawn dah ni), Tedim aphual ah honkhat, CNDP party lut teng, Biakna paulam nasem nih, tuateng hang aa ong kihta hetlo, lau hetlo uh ahihi.

Khat veivei, Tedim, inntek butomsak nuam aa kipiakhia hih nih leh thumte ka etet kawm in,"I nat, i sat, i nuam, i dah ciang aa i veng i paam, i sanggam, i u, i nau ding, ong tutpih, ong uap, ong hehnem dingteng tawh aki nungngatsan, ki elpuaksan i hikha kei diam aw", kacicihi. 

Vantung gam a kiciphial zongin Topa Zeisu omlohna, democracy i ciphial zong in i veng i paam,khuapih tuipih, i mipihte omlohna, ki langngatna, ki elpuakna hileh bang akhiatna omding hiam?
Biakna nasem te'n, na Pawlpimi teng tawh ki elpuak nuam nasa uhhiam?

Angaihsut huai, alungngaih huai thupi thuuk honpikhat om kasahi. Lungngai kik dih un. Tuazah aa kipum piak nading, veng leh paam tawh khek liang ding hihte kua hi aa bang taktak hiam i lawhtak?
Ei mah leh ei mah kibawlsia hihang aa khuasung tui sung, heksuk hektoh nuam nawnlo hi. I vengsak, vengkhang tawh, khualak aa kimuh nangawn nuam nawnlohi.

Tonzang Ukpi Pu Kam Hau ong khanna pen tuni tuhun aa Zogam leitang ding a seek ding hi aa, tua nangawn ama' thaguak hizolo, mangkang kumpi panpihna tawh tuni tuhun Zogam leitang hicia anei, tuabek zong hilo Kawlgam suahtaakna ah taangmi anei minam ihihna ahihi. Ama' nasep ding zokhinta hi. Zogam leitang ding a seek khit ciang amah kisam nawnlohi.
Tuakimlai abeh aphung in, tuni ciangdong ko maban hi ci-in seekseek nuamlai mawk leh, lam hun ding om nawnlo, zawi tawn nawnlo suak ding hi. 
Pasian in Pu Kam Hau leh abeh aphung, (Rev JM Paupu kammal kawm pak hilehang) anawk hun om aa (kisam ahihman in), akisap loh hun ah nawk nawnlohi.
Pasian in, min leh puam, za leh panmun, ukna cihte akisap hunhun in azat theihdingte tung ah nawksak kawikawi ahihi. Ei thatang kitom zawhthu tawh ong nawk kha hilai zanglohi. Hihetlohi.

Tuabang linlian mah in, Zogambup kumpi dingin, 1962 pan 1988 dong, Maj Son Khua Lian pan Col. Son Khua Vum dong (Khua Lian pan Khua Vumtuai dong) kituamlawh hileng Zomi sung veve pan Sizang sung ong nawksakhi. Angsung, aituam lungsim aliat mahmah laitak a taangpi lungsim pua pending acihna hikhading (kei muhna) ahihi. Angsung lungsim pua hileh Khuasak khawng, Thuklai khawng, Tedim khawng tu aa sang khuapi lian zawtham suak dinghi. Kum 26 sung siuseu ahihi.  Amau' ki thagum pei zawhthu hihetlo hi. Abei hun, anawk nawnloh hun ciang abei in bei lel hi. Thuum zawhthu, khoh zawh thu zong hinawnlohi.
Pasian in tuni dong Sizang sung mah ong nawksak lai hiam? Akisap hun ciang zattheih ding i omleh ong nawkkik dinghi. Ong nawk tuak nawn kei leh veng leh paam, khua leh tui tawh kinungngat, ki elpuak liang aa hanciam ding, hahkat ding, thangpaih bawl ding mah ahidiam? Angaihsut huai hitahi. Ei kitom zawhthu, paupen zawhthu, sap zawh thu tawh ong nawk hihetlo hi.
Agal khat aa om CNFte tawh kipawl man aa na khuapih tuipih, naveng napaam teng tawh, nopni, dahni aa akgul mu i bat gualgual a nuam hizenzen lohi. Nuamzaw takpi a sa mah nahihiam?
Banghang, i khua i tui tawh, i mipih, i sapih tawh kal kituah ding hanciam lello ihihiam? Khuapih tuipih tawh kielpuak aa, akhel avet aa i gamtat man in bang taktak hiam i lawh taak? Banghiam i hamphatpih? Kua taktak pen hiam i muan i suan? Kua hiam i biak, i paai, ateltakpi mah ihihiam?
Pasian Khasiangtho in kisam asak hun in ong nawk hilello ahihiam?
Zogam bup Christian gam icih hang, Christian zia hetlo ihihman in Col. Son Khua Vum hun aa kipan tuni dong Christiante khutsung ong nawk nawnlo himawklo hiam?
Kacihnopna in,
Min leh za, panmun cihte ei khutsung ah om hetlo, Pasian in anawksakte tung aa baangbek hi aa khua leh tui tawh ki nopmawh liang aa thangpaih laak, hanciam ding hihetlohi. Ei pilman, siamman hihetlo, ong piakciang kuamah khaak tan zawh hilo, ong laak ciang zong kua khaam zawh hilohi. Siamloh man zong hituanlo, zum huaina zong hilohi. Ama' aa ding ei kisapna om nawnlo, ong zatteihna om tadihlo hibekhi.
Tua ahihman in ei lawhtak ding in i veng i paam tawh kihothei, kithutuak, nuam kisak ding hilel loding hiam?

Nopni dahni aa i veng ipaam ong awlmawhloh kahihkhaak ding bel nuntak thaman om hetlo kasak nam ahihi. 
Vantung gam tunding bekzong kagal ngaihsut ciang Tuuno mai ah, kaveng kapaam, ka Pawlpi, kakhua katui teng mah tawh Topa vangliatna phatding ka mitkha ah om masa aa, tualo kuateng kihel ding cih mitkha ah sehtheilo hi'ng.

Tua hi-in veng leh paam tawh kihotheih nuam sazaw, cidam huai zaw sa maw? Akhel avet theithei mah pilvai sa zaw?
Kei kahihleh, Pasian Khasiangtho ong nawktheih ding hun ngaksiam in, kami kasa lak ah  ui misi sa ne banghetlo, kisungsia hetlo inntek tak aa katat mah nuam kasazaw hi. Ei teltheih thu ahihi.
Pu Kipte, Pu Lian Thangte, Tedim phual aa bu tom sak inntek teng, khatvei ong khuadak kik dihun. Khuapih tuipih, veng leh paam, mipi ong awlmawhloh hun ong tungthei aa, tua hun pen Pasian awlmawhloh akilatna zong hitheihi. Khatvei ong lungngai kik dih un.
I khua, i tui, i minam sung "ak gul mu" bat gualgual loh nading Zomi bup in Thungen ciat dihni.

Hang Khan Lian



-- 
Hang Khan Lian
Block 646#13-115
Jalan Tenaga
Singapore 410646
 


Comments




Leave a Reply