WWW.TUNGZANGNEWS.COM

 
Malaysia gam ih cihcih pen Asia sunga kihel gamkhat hi-in, ASEAN founder zong hipah hi. Hunkhat lai in, mikangte ukna nuai ah eite mah bangin om ngei uhhi. Tua hunlai in Melayu minamte tawm mahmah lai uh ahih manin, gamkhat a din theih nadingin, mimal kicing zolo a, ahang tuamtuam tawh Malaysia hongtung khengkhang ahi, Chinese minamte leh Indian (Tamil) minamte tawh kipawl khawm in, mikangte tungah suahtakna hong ngen khawm uh a, hong ngah khiat petmah tak uh ciangin, Melayu te ukna nuai ah Chinese le India tawh tonkhawm in hong ding uhhi.

 
Tua bangin suahtakna hong ngah uh ciangin, amau le amau in ki-uk uh a, gamdang tualdang panin, khantoh nading tuamtuam nasem nuam khempeuh lutsak in, tudong mah in gamdang pan sum zong mi tampi ki tatsat lo bek thamloh in, gamhau mahmah ahi adiakin, USA, France, Japan tebang sum khuambul nak bawlphadiak uhhi. Tualo gam khempeuh phial in Malaysia ah sumkhuambul tuamtuam tawh na sem ziahziah uhhi. Tua banah gam gina khollo, Myanmar, Nepal, Bangladesh, Indonesia, Combodia, Philipine, Vietnam cihte a kipan kilut ziahziah a, nektawm kizong thei tek hi.


1. Chin Refugee Committee

Tua sungah Myanmar panin, calling visa (work permit) tawh mi tampi kilut ziahziah in Zomite zong tampi kitung hi. Sanggam Thantlang te mah mitkeuh masa in na om uh ahih manin, 2001 July kha in CRC naphuan uh a, UNHCR le Malay kumpi in Refugee Center in hong ciapteh sak uhhi. Tua nuai ah Chin State sung pan minam kim, khua namkim in UNHCR ngah thei in gam thupi tuamtuam ah gambel dinmun in kitung zihziah hi. Tua hunlai in, Refugee kipawlna tuamtuam om nailo hi.


2. Alliance of Chin Refugee

Sanggam Zotungte khat car accident nasia takin hong tuah tak ciangin, Zotung taltaak ten CRC ah huhna ngen a, CRC in adeih bangin ahuh zawhloh ciangin, na sa mahmah uh ahih manin, Chin minpua kipawlna khat neih dingin hanciam uh a, hun saupi mah ngimngim kekkek uhhi. 2015 May 14 ni-in ACR cih kipawlna anuai a minam/township minpua teng tawh hong dingkhia uhhi.

1) Zotung
2) Zophei
3) Zo
4) Tedim
5) Hakha
6) Falam
7) Kanpelet
8) Paletwa
9) Latu
10) Mara
11) Tonzang
12) Matu
13) Mindat

ACR tawh hiteng hong dinkhop khit ciangin, a ut laiteng zong kipawl toto in, Siyin cih bangin adang tuamtuam zong kigawm khawm hi. Hih pen UNHCR ah hamphatna ngah theih nading lampi ahih manin, Ei Zomi sung bangah aki khenkham tawh ikibat hangin, hamphatna lian zaw cih kimu thei hi. Zomi kici minam sungah min dangtuam tawh ACR ah ading tengin, Tedim, Tonzang, Zo, Sihzang cihte ahihi.

Zomi Refugee Committee (Under ACR)


Tu inzong, Zomi akici teng ACR nuai ah "Zomi Refugee Committee" ci-in kigawm khawm kik uh a, tua kipawlna in minam ading hanciam tak in sem kenken uh cih thu zong kiza zelzel hi. Adiakin, nasep neilo Zomi tampi adingin, nasep hoih hong zonsak thei uh a, KFC Company bangah Zomi sinsen 400 val bang nasep hong guat sak uhhi. Tulaitak dinmun in khasum hoih mahmah hong ngahsak uh ahih manin, ki lungdam hi. Tua banah "Ciimnuai Donghu Kipawlna" cih zong nei uh a, Zomi tampi adingin phattuamna tampi bawl khia ziahziah ta uhhi.


3. Zomi Association of Malaysia

I sanggam Hakha/Thantlang te makaihna CRC nuai ah ih om hong sawt pianpian tak ciangin, Zomi sungah mit keuh zawdeuh leh minam veina nei takpi pawlkhat hong kipankhia in, 2006 kum ciangin ZAM hong kipan khia hi. Hih ZAM hong kipat khiat hun lai in, Refugee minpua niangnuang ciangbek tawh nasep sawmlo ahih manin, Refugee cih kammal naleng kizanglo in, Zomi Association of Malaysia cingeu hi.

ZAM in education mah bulphuh in naupangte pattahna lamah hanciam uh a, ZAM nuai ah "Zomi Education Committee" cih phuan in, tua tawh nasiatak in hong hanciam uh a, minam tampi lak ah UNHCR in minphatna hongpia ngiat hi. ZEC sangnaupangte tu in University/College ah kikah ziahziah ta hi. Hih pen namdangte leh ih sanggamte' hong bat zawhlohna khat himawk hi.

ZAM nuai ah ZSM ci-in donghu kipawlna mah kinei a, migam milei ah sihna manna anei Zomite luang phamin hanmual vai khempuh vansak hi. UNHCR vai leh nasep vai zong amau hih zawhna tantan in sem uh a, Minam minpua kipawlna kician ZAM in minam hong tawisang mahmah hi. Tua banah minamvai kisam bangbang ZAM in vaihawm in Khuado Pawi le Zomi Nam Ni cihte zong nasia takin kibawl zihziah hi.

I gengen nop kholloh, Zomi sisan mah pua veve a, Zomi kipawlna sungah alutlo, sanggam kicing tak nailo te zong mau kipawlna minpua mah in mipihte adingin mapang tek uh ahih manin, Malaysia ah Zomite' kipawlnate leh Zomi kipawlnate pen minam ading hamphatna tampi asemte ahih manin, thupi mahmah tek uhhi. Mailam ah hih kipawlna om khempeuh sungah adiak in kamphen kullo Zomi kipawlnate khut kilen in hong kalsuan khop dinguh thu kangetsak hi. 

I nasep: Zomi ading,
I kipawlna: Zomi kipawlna,
I tuamdinna: Panmun ngah tek,
Akisamlai: Kipumkhat a, vaihawm khawm ding.

Zomi Nam Ni cih bang ciangin, ZAM makaihna tawh anaute khut kiletpih thei henla, mun le mual, satanh hawmsiam in, gelkhawm, semkhawm, genkhawm, sakhawm, hawmkhawm thei leh cih sunmang in kaman zel hi. Mihing khempeuh in hunkhat ciat kinei a, gamkhat le kipawlna khat peuhpeuh ah makai hoih khat hong din ciangin, tua kipawlna or tua gam pen Revoluation kilumlet in kikhel zo ek thei hi. Tua ahih manin, tulaitak makai tenzong akilumlet Zomi kipumkhatna lamah hong totai tenten dinguh lunggulh huai kasa hi.


Dal Sian Hung

Kuala Lumpur, Malaysia.
 


Comments




Leave a Reply