WWW.TUNGZANGNEWS.COM

 
Kumpi tawh kilemna abawl mualtung thautawi khat ahi Chin National Font (CNF) te in Kawl kumpi tungah Zogam (Chin State), Tedim khuapi huam sung ah leitang Acre 800 ngen uh cih thuthang tawh kisai-in Augusr 15,2014 ni-in CNF in ngenlo/ nialna nei uh hi. CNF te in tua leitang Acre 800 a ngetna vai tawh kisai abeisa July 17,2014 ni-in Tedim khuanu khuapate in Tedim khuapi ukpi (Myone hausa pa) tungah a deihlohna lai apiak banah, Zomi Youth Association (ZYA)-Tedim in zong Pyithawngsuh Hlutdaw zumpi dongah deihlohna lai khak ding cih thu kiza ci hi CNF te ii galkap lam thuvanpi Col. Solomon in a genna ah, “ hih thu tawh kisai in CNF Centre pan bangmah ka thei kha kei uh a, thukikupna zongah leitang nget ding vai thukhensatna kinei ngeilo hi" ci in genkhia ci hi. 


CNF te in Tedim gam huam sungah leitang Acre 800 Chin State kumpi tungah ngetna nei khin cih tawh kisai Tedim khuanu khuapate tungah zaksakna nei/ neilo banah Tedim khua hausate' phalna ngah/ ngahlo cih thu kician om nailo cih thu ZYA Tedimte tungtawn in kizasawn cih kiza hi. Tua manin CNF Thuvanpi thumna ahi Pu Khua Uk Lian in a genna ah, " hih thu tawh kisai bulnei lo le thukician lo ahih banah CNF, Kawl kumpite leh Tedim gam mipite kikal ah kitelkhialhna ding ngimna tawh thumanlopi kigenthang hi lel hi " ci-in genkhia cih kiza hi. 


Tua banah hih thu tawh kisai in Tedim gam huam sung a om Party tuamtuam pan maikaipi te, ZYA Tedim, Tedim Numei Kipawlna, NGO, Biakna makaite, khua kim khua pam pan Hausate leh MP te in August 16,2014 ni in Tedim khuapi sung a om Tuiphum biakinn zumpi ah kimuhkhopna nei ding uh cih kiza hi. CNF Tedim Liaison office in zong hih thu tawh kisai thumaanlo ahihna thu Chin State thuneite kiangah zasak khin uh cih kiza hi.


Source : ZYA Tedim & Khonumthong news

Posted: Tongsan Media




 


Comments




Leave a Reply