WWW.TUNGZANGNEWS.COM

 

Ciamnuih leh cihtak in lawmta ki kamkum khat kazak sawn hong hawmsawn ing. Amau tenih pen neulawmta uh hi a, thusung thupua kikum ngam in kithuak pih ngam, ki sihpih ngam ngiat uhhi. Amin uh pen, Thangno le Lianpu ahihi.

Dotna:
Thangno: Lawm aw, Alliance of Universal Organization ah advisor khat nangah hong lungdam pih mahmah ing. Na ngimna tenguh bang himawk ahia?

Dawnkikna:
Lianpu: Leitung ah kido kikapna galpi abei nading deihna bulpi in, UNO kiphuh khiat zawh sawt simsim ta hi. UNO in leitung ah mizawng gamte huh in nalian tampi sem ziahziah khinta hi. Ahi zongin, ahun hunin gamkhat le gamkhat, gamkhat sunga namkhat le namkhat kido lai cih bang imuh ciangin, UNO in adeih bangin semkim theitak zolo bek thamloh in, tusung thupiang envat lehang, Israel te kipei pha mahmah uhhi. UNO in bangcih sawm hiam? Tua tengbel a thupong a kong genna hi e.

Alliance of Universal Organization ah advisor panmun kangah theih bel keizong lamdang kisa in angtang mahmah ing. Leitungbup ciangciang ah kipawlna alianpen in UNO hi a, UNO kipawlna pen Leitung bek ah om hi. Tua ahih manin, leitung dangte tawh kipawlna kisam ahih manin, Alliance of Universal Organization hong kiphuan khia hi a, tua kipawlnate' tup le ngim bel telpih lian keng.

Dotna:
Thangno: Eheu mawkmawk tuabang om thei ding maw? Advisor bang hiliang a, tua kipawlna makaite tawh kam kikum khawm a nasem ngaitngiat hilo nahi maw?

Dawnkikna:
Lianpu: Leitung mite' telkhialh ding utlo uh ahih manin, Leitungbup aitangin kei advisor a hongkoih uh hi a, makaite lah leitung mi khat zong omlo ahih manin, amau ten asepnop banguh sem uh a, keibel aminpua bekbek mah hi ing. Kamkup cih peuhmah omlo in, amau sepnop teng sem uh a, khialhna khat aom ciangin, advisor ginalo hong kici hi. Akhialh khit uh ciangbek in, amau nasep atheikha pan himai ing.


Kuppihna:
Thangno: Advisor gina neilo kipawlna pen bangbang ahi zongin, picing thei ngeilo hi. Kipawlna khat peuhpeuh ah makai ten asepnop uh nasep khat peuhpeuh, project khat peuhpeuh kamkup pih dingin advisor kisam hi. Makai ten amau geelna leh amau sepsawm teng advisor tungah pulak ding a, advisor inzong ngaihsut pih in, kuppih ding hi. Tua a totna uh lampi dik le diklo cih advisor in ngaihsut piakna nei in, tua tawh thukimna makai teng leh advisor tengin khutpi meek in ki kipsak pan ding hi.


Dotna:
Lianpu: Tua ahih leh advisor le makai koi bangin kiteel ding hiam?

Dawnkikna:
Thangno: Advisor cih pen lamlak aksi mah tawh akibang ahih manin, talzol khat peuh, sum nei khat peuh leh meltheih khat peuh cih bang khawng advisor in kiteel lo dinghi. Advisor khat teelcing ding pen, kipawlna ah makai khempeuh sangin,

1) Kum tamzaw, khangham zaw hi hamtang ding hi.

2) Kipawlna khat peuh ah makaipi asem ngei hi hamtang ding hi.

3) Makaite' sangin, pilna Degree sangpi angah zaw hileh hoih lai hi.

4) Mi lungduai, mi thukhual leh mi citak mi hihamtang ding hi.

5) Makaite kitaak lah mahmah hunin hun pia a, seppih thei ding hiding hi.

Dotna:
Lianpu: Tua ahih leh makai dingte bang dinmun teelcing ding ahia leh?


Dawnkikna:
Thangno: Makai ding cih pen tua kipawlna in thu gen ding hi. Khua kipawlna, minam kipawlna, gam kipawlna, biakna le pawlpi vai ah kipawlna cih bangin, a dawldawl, a ciangciang in kikhen ding hi. Makai dinga kiteel, teelcing makai khat in ama' sanga thuthei zaw, degree sangzaw, apilzaw, aciimzaw, ateizaw leh thuakna tampi aneikhin khangham khinsa nih le thum personal advisor danin nei henla, thu dongin kikup pih tangtang leh amakaihna ah tangzai in, lawh cing ding hi.



Dal Sian Hung

Kuala Lumpur, Malaysia.



 


Comments




Leave a Reply