WWW.TUNGZANGNEWS.COM

 
Tuhun a Zomi Pasian Nasem te by~CSKhai
Pasian‘na hunbit a, kasep ngeina Pawlpi khat ah, miteitang mawhlo, sum leh paai zong nei mawhlo, thu genthei, avang nei mawhlo khat om hi.

Amah leh amah hikhop kisa lenlan ahihman in Pawlpi sung nasem, Pastor te hawmthawhna, neumuhna leh langbawlna thu gen thei zelzel hi. Pawlpi siate khasum khanding vai kikupna aom ding ciangin keeksa in omdena, nosiate khasum khanding na gengen uh, Siate in bang sem na hi uh hiam, ci phang phang thei hi. Tua banah siate gamsung Biakna vaitawh khualzinna ding a om ciangin zong siate TA ding peuh haza in pau lualua thei hi.

Hih zahtak a, amah leh amah akithupisakpa, bang hi peuh mah hiam ci in, kum 3 sung tawntung ka encik hi. Biakinn a ding, Mission nasepna ading, Biak inn music van tuamtuam leina ding, cimawh huhna ding cihbangin sum piakna ding tampi om a, tua bangte ah khat veibeek a kihel ngeiloh ban ah, kum 3 sung tawntung seh sawm suah seh khat zong a piangei kieuhkeuhlo mipa na hi zawsop lai hi.

Han ding bek thei, miphin ding bek thei, ki thumusak, ki thuvai hawmsak nuam, deihloh pen in a tuahsiatni, a sihciangin amah avui ding pawlpi buang lawmlawm ah, sehsuah lah khia ngeilo, Pawlpi kitangsap vante lah lung himawh in neikei, Mission nasepna dingin ma kapang ding lah cingeilo, hi bang mihing ci in, tawlkhat sung ka heh hong suakin, ka muhdah tha bang suakmai hi.

Sehsuah manman in apia, Biakinn leh Mission nasepna ah lawptaka, akipia khiate zong tua bang in mawk ciakciaklo ci in, a zahtak huai hunbit Pasian nasem pension ngahsa khat kiang ah, tua mipa thutawh kisai in thu ka kuppih hi. Aman hong dawnna ah, “ NA EN GIGE OU; SAWM AH KHAT KHAWNG A PIA NGEILO TATA; PIAKKHIATNA TAWH MAPANG LO TATA TE; SUM LEH PAAI VAI AH HONG KI PHINCIILSAK DING HI; SIATE; PASIAN NASEMTE; HAZA IN HONG PAUPAU DING HI; HUNBIT PASIAN NASEM DING A KIPANPAN NAHIHMAN IN LIMTAK IN CIAMTEH IN HONG CI HI.”   

A tunga, ka tuahkhak thutawh hong kituaklua peuhmah ahih manin, ka pawlpi sunga mipa hangin, tawmvei sung ki-ip zolo in ka nuikhia kha hi. Khatvei, ka lungsim sungah hong kilo khat om a, hi banga migina hetlo na pawlpi sungah a omman in, limtakin na, nasepding a kisam ahi hi, cih thu ahi hi. Tua ni akipan, siate langpang a, siate khasum khanding peuh haza, siate khualzinna TA peuh haza, siate love gift peuh haza a om, ka pawlpi mipa tungah itna leh hehpihna keitung ah a thakin Pasian in hong guan hi.

Tua bangin hong ki gensiatsiatna te’n ka pukna ding, ka gamtatkhialhna ding, kasiatkhakna ding tampite ah hong honkhia, hong dal, hong kem gensiatna ahih man in, Pasian in tuapa kei hong kemdingin hong zang hiding hi ci in ka ngaihsun hi. Tuapa, ka damna ding, ka kidalna ding zatui hoih penpen hongsuak miau hi. Hong kigensiatnate, zatui kha nek abat hangin, a tawpna ah damna ding zatui hong suak mawk ahih man in, tua bang mite’ gensiatnate, kaki ngeina seh theita hi. Tuate in ka vun hong sahsak a, hong ki pehpeh hangin, hong bunzo nawnlo hi, ci in kei leh kei tha ka kipiakpiak laitak in, Elba gunpi huihin ka omna innnuai kongpi hong nawkvatin, puakdeda in ging ahihman in, ka khanglo hi. “KALAISAI; AMANG MAN HIMAWKLO KA HI MAW” ci in khatvei ka lupsuk kik hangin, ka mang hong kizom nawnlo mawk hi.


C. S. Khai 
Universität Hamburg
Hamburg
Germany
 


Comments




Leave a Reply