WWW.TUNGZANGNEWS.COM

 
Picture
Tuhun a Zomi Pasian Nasem te by~Pu Tongseal
Pastor te khasum ciang ciang een huai het het lo, ha zaat huai het het lo lel hi:
 
Pastor te khasum neek na een leh bel a hi hetlo khat in kituat zaw mai in. Mite'n 10 a ngah leh a mah in 1 hi pan aa; 10 aa 1 a pia te, Topa in vantung kongkhakte hong in, thupha azah tampi piakbeh ding ci lai hi ven. Tua ahihciang in, 10 aa 1 a nee te i duhgawh igeen siat sang zing, 10 aa 1 piak hanciam zaw leng, Topa in a zah tampi a thupha te hong pia zaw ding hi. Pasian in a 100 a 1000 in hong piak beh thei hi. 
 
Pastor te pen mihing mah hi in, kicin laakna tampi nei ciat ding uh hi:
L S T sung, Moses, David, Abram, Jakop, Aron, Miriam, Peter te en in, mi cingtaak mi siangtho te hipah het lo hi. Ei bang vive mawhnei te vive mah Topa in ama nasem ding in, a teel te hi. Khialhna kicin zawhlo na tampi neiciat uh hi. Mawhna lianpipi te bawl uh hi. Ahizong in, prophet, kumpi, pastor, makaai pi, siampi te in Topa in zangh veve hi. Satan ii a zawh hun, a zat hun zong om veve hi. Hi phial ta leh, midang sang in, Topa in amau mah teel zaw veve lai hi. Korah, Dathan and Abiram Number 16 Chapter sim zelzel in.  Korah te lawmta 3 un, Moses te Unau makaihna langdo uh hi. Pasian naseem te khat pepeuh pen, i langdo ciangin ... ih theih ding ah Pasian a langdo zong ki hi gige thei hi. Israel upa 250 te un, Korah te lawmta 3 teng panpih uh hi. Ahizong in, Vanpan meikuang kia suk aa, Korah te lawmta 3 leh Israel upa 250 te a innkuan khempeuh un mei in  haal tum aa, lei kihong in valh tum lai hi. 
 
Pastor te i hawmthawh sangin, a nasepna pawlpi mite'n i panpih ding hi zaw hi. 
 
Pastor te i phunsan san sang in, thungetna tawh naakpitak in i panpih ding hi zaw hi.
 
Pawlpi lian pipi te, Pastor khasum tampipi sangte zong Vangam tung pah tuanlo ding.
Mihau te vangam tunding sang, Saipi khat phimbil vang sung lutding baihzaw ding cileng. 
Pawlpi neucik te, Pastor khasum khamlah te zong, Vangam taan pah ding cih om lo.  
 
Bangbang icii zong in, Pastor te i hawm thawh ma in, ama septeng semding kituat phot leng. 
Ama sep teng, ka seem takpi thei ding hiam? A ma sinsa, theihsa teng ka thei takpi hiam? 
Cih te zong, ei le ei ki et-kaak ding kisam masa kha ding hi. 
 
Pastor te a gensiasia te pen, mi gina te hi khol lo thei zaw hi. Pastor khempeuh mite'n a hoih aa
muh kim ding thubaih hi tuanlo hi. Ih hawmthawh aa leh a zah tampi a hoih zaw ding in, 
ei zong, Pastor sem pah leng aa... mi khempeuh diksak ding hanciam pong mawk leng.
Mi khempeuh deihsak ding, pawlpi mite khempeuh ii hong iit zuahzuah ding bel ahi theilo hi. 
 
Pastor te un, a iit a pawlpi mite a thuhilh, a  taai taai a kul ni zong om ding aa, a ciim te'n 
lungdam ding uh hi. A ciim lo zaw deuh te'n Pastor te mudah pah ding hi. Pawlpi mi te
sung pan, en leuleu le hang... a pii cing mahmah pawlpi mi sang, a pii cing lo pawlpi mi
a tamzaw hi den lai ding cih phawk tawntung a kul a hi hi. 
 
Pawlpi khangto het lo, Noah pawlpi pen khasiangtho a neihlo hang hipah tuanlo hi. 
Zeisu in, Khaa Siangtho zang in, Noah tung tawn in, mipi te kum 120 sung thu hilh hi. 
Khasiangtho zat in, Noah naseem ahihang in, pawlpi mi khangtuanlo, Noah innkuan bek taanglai. 
Thumaan pawlpi pen, akhan zuahzuah tuanlo hang, Pasian in a cii ding in, leitung ah a koih zong hi thei gige hi.
 
Pawlpi khangto zuahzuah icih te zong pen, Khasiangtho panpihna hang hipah khol lo thei hi. 
Kong taanzaau tawn a hihman in, ol lua, baih lua zawzen in, tua lampi a tawn mi tam hi lel hi. 
Kong kawciik a zuan tawm mahmah ding hi, lampi haksa ding hi, ahizong in nuntak tawntungna hong tun ding. 
Topa sapmi a tam hang in, a teel mi tawm ding hi. 
 
Lot te pawlpi zong, a mau innkuan mah hi pah hi. Pawlpi khangto hanhan hetlo uh hi.  
 
 
Pawlpi mite un a Sia te a iit om leh tua a iit te mahmah zong a mudah pah pawlpi mi om lai hi.  
 
Pu Tongseal

 


Comments




Leave a Reply