WWW.TUNGZANGNEWS.COM

 
Twinkle Twinkle Little Star – Part 1

Nasep tawm laitak in ka computer sung pan Utube ka et leh Sarah a kici numeino kum 5 a cing liailiai pan ii thuakna ka mu kha a, athu kigen teng ka ngaih ngaih leh a tawp hun tawh kituakin ka mit panin nuul gaih zawh loh ding khitui tampi hong luang hi.

Hih Sarah akici numeino pen naupang dangte mah bangin anu gil sungpan leitung khuavaak leh Pasian bawlsa leitung vantung hoihna teng a mu dingin 2007 kum in hong piang khia hi. Amel hoih in it huai mahmah ahihman in amah amu khempeuh in lungnopna ngah uh a, a maitaina in amah amu te hehna beisak zo in, amah a tawi kha te hampha akisa lo khat zong om lo hi. Ahizong in hih numeino Sarah pen mi nuamsa innsung pan hong khangkhia hi peuhmah lo hi. A pianna a nu leh a pa te zong mi dangte banga pilna siamna leh neih leh lamh kicing anei zong hi lo uh a, neektawm zongin ak bangin muh bangbang a ne te a hi uh hi. Sarah in tuate theihpih lo hi. A thei ahiphial zongin zawnna leh gentheihna in ama lungsim sunga om lungnopna mei bangin mitsak zo lo dinga, ama lungnopna hanga hong kilangkhia a maitaina pen zawnna hauhna cihte in khaktan zo tuan lo ding hi.

A muh khempeuh a hoih pen hi pahpah a, a neek khempeuh a lim pen hi pahpah lel hi. A silh bangbang hoih in hoih ta kei leh lungkim takin silh in, limlangh mai ah ki en lezong maitai takin sawtvei pipi mah ki en hi. Kizeem leh kipuah nuamsa mahmah napi naupang dangte tawh akibat lohna pen aneih bangbang a kipia bangbang lungkim takin sangin phun leh gensiat cih bangte nei ngei ngiat lo hi. Nursery hong kah theih tak ciangin a lawmte lakah a pil pen ahih loh hangin a lawmte theih teng mah thei a, a lawmte sak theih laa te zong sa thei gai hi. A B C leh One Two Three cihte zong a lawmte gen tawh kituak in siang takin gen thei veve hi. Naupang dangte mah bangin khaukan leh luai kivei cihte nuamsa mahmah a, tungtupeulip leh bukteh kineih cihte zong nuamsa hi. Inn ah aciah ciangin a tenna a inn uh pen mi inn nuai awng khat a saap uh hilel mah taleh ama aa dingin leitunga inn om khempeuh lakah a nuam pen leh ahoih pen hi a, White house leh KLCC hoihna in ama tenna inn hoih a sakna kiamsak tuan peuhmah lo in phawk khak in zong nei vet lo hi. Aneih sun uh ahi tutphah Sofa om lo tungah lungkim takin diangin laa sa a, “Twinkle Twinkle Little Star” cih laa bang pen tam veipi sa hi.

Leitung haksatna leh siatna cihbang a thei kha nai ngiat lo numeino ngek dikdek khat pen ahua mahmah ana om gige himawk hi. Sarah a hua mahmah pa in nikhat gusim in mun simtham khat ah bawlsia a, a elzaang guh leh a ngawng guh suktan sak ahihman in tuni ciang dong Sarah a nuntak lai hangin lupna tungah lum kawmsa in natna satna thuak in sih ding bek ngak in om den ta hi. Nidang a anui den leh a maitai mahmah numeino pen tu in anuih loh zawh kum tampi hi ta hi. Nidang a khuasung leh innkim aa vaak cihte nuam asa mahmah numeino pen tu in vaak thei cih thadah a khut a khe zong tangsak zo nawn lo a, ama ngawng takpi zong mi dang in a heeksak kei buang leh a taangsak zo nawn lo hi ta hi. Mi aa dingin leitung lian mahmah taleh ama aa dingin a kilupsakna lupna tung bek a leitung hi ta hi.

Ni danga zingni suak amuh nop man in zingsang a lol den numeino pen tu-in mi dangin innpua lam ah vaakpih kei buang uh leh ni-leh-kha zong amu thei nawn lo hi ta a, ni-leh-kha gen loh amah avehte leh amah a kemte mel lo buang mi dang mel zong mu nawn lo hi. Mit-phiat-kaal sunga si ziau thei ding dinmun ah cikzia het lo a bangmah thei nai lo “Twinkle Twinkle Little Star” sak tawh a lungkimzo lai numeino khat hih dinmun ah a tungsak ngam papi ginalo pa lungsim sungah bang lungsim om ahizen tam!! Sarah in zato ah a ki-aat ding ciangin a muan mahmah a pianna pa kiangah “Pa aw ka gei ah om den in maw” cia a kut ngaungau a pianna pa in tu-in sih hanmual liamsan khin sawnsawn hi. Sarah a kem ding anu bek om lai tazen hi. ( Dam in zomto lai ni)

Itna leh veina tawh Zo Sunni pan,

Francis Lamthang (Zomi Quavadis)

 


Comments




Leave a Reply