WWW.TUNGZANGNEWS.COM

 

Z.Y.A MOTOR VAI ZAKSAKNA: Gamsung gampua panin Pasian leh Zomi a it a kuama peuh panpihna tawh kilei Z.Y.A Kalay Motor pen tuni ciang sum kingah sang 52val deuh hi a, Motor man Mandalay pan kalaymyo tun nading a bei, Licence bawlna, hankuang koihna Steel tau a kipan a kisam nengneng bawlna tawh Sang 60kim bei hi. Tua ahih manin Motor leina ding gamsung gampua a kuama peuhin kipiathei lai hi cih zong kong zasak uh hi. Z.Y.A NEWS TATMAN ZAKSAKNA: Z.Y.A kalsim thuthang tatmante palai (Agent)te tungtawnin nong puak ciat manun i lungdam hi. 2014 kum tatman Ks. 1500/- a pia nailo peuhmah in October kha sungin na Agent te tunguah na na piakciatna ding un i kizasak hi. October kha sungin tatman pia lote hong kikhak zo nawnlo ding hi cih i kitheisak hi.
ZOFA PAN ZAKSAKNA: A 9 veina ZOFA-Cup pen Oct. 27, 2014 ni-in kipanta dinga Team 16bek kila ding ahih manin a min pia masasa in kisang ding hi. (1) Pawlpi min tawh kihelte in pawlpi pan kum 23 tungsiah mi 3 leh namdang mi kum 23 nuaisiah 3 la thei ding hi. (2) Pawlpi min a hilo, mindang khatpeuh tawh hong kihel Team te kum 23 nuaisiah Zomi bek kisang ding hi.
Note: Tukum ZOFA-Cup pen Kentucky Zomi Innkuan (USA)te in hong Sponsor dinga, thupitak in kibawl ding hi. Na sawm uh leh na min uh pia mengmeng un. NO. 4 TANSAWM SANGINN LAM KIPAN: Pasian in Zomite hong khuallua in a om ngei lo leh a om thei dingin i upngam vet loh ahi Santa hanlui munah Mucu zong om nai lopi-in No.4 Tansawm sang Kumpi in hong pia in Sept. 18, 2014 ni-in SKVBA G.S Rev. Suan Za Kam in apna thungetna nei in khuamnote phutna kinei in a nuai-a bangin a limtawh kiciantak in kibawl khin ta hi. Zomi tampi mipil misiam hong piankhiatna phualpi dingin Topa'n thupha hong piaksak hen.
DIMZANG AH NUPA KITHAT: Dimzang khua a teng Nu Cing Lam Vung a lawmpa (Kawlte) tawh kitawngin tua panin a lawmpa in that a, Kalaymyo panin a luang Z.Y.A in Dimzang ah vakha hi. Hih nupate in ta (3) neikhin uh a, a lawmpa zong gilbem kidenna pah cih thu kiza hi.
PANGSAK LIA CING LAWH DIM VAI: Z.Y.A News panin huhna hong kingen Pangsak khuami Lia Cing Lawh Dim, Singapore innteng a om pen, tu in a omna kithei khiata banah nu le pa tawh zong kihothei in sum zong khaktheita cih thu kong tangko uh hi. ZOGAM LE NAGA GAMAH ELECTRIC MEI: Kawlgam nitumna lam Zomi, Laimi, Khumi le Naga te teenna kuam dungsuk ah Electric mei Mega Watts 1200 a piakhia zo dingin Dammun tampi ah bawl ding geelna kinei a, Thamanthi daampan MW 660, Shwe Sagyii daampan MW 520, Mowlaih daampan MW 380, Meitei gunpan MW 40, Pyinta daam leh Kalewa suang meihol pan MW 600 ngah bawl sawm uh a Zogam ah a sawt loin mei nuamta ding hi. INTERNATIONAL FESTIVAL PAWI: US gam Bowling Green Kentucky khuapi ah Sept. 27, 2014 ni ciangin International Festival leitungbup pawi ni thapai in kibawl ding gam 20 panin minam 50te in amau ngeina lamte lakin van leh nate lahna leh neek leh dawnte kiciapsakna nei in, Zomi Innkuan Ken- tucky te in zong Zomi ngeina laam tuamtuam lahna thupitak nei ding cih thu kiza hi. Mi 2000 kim pha ding lamen uh a, lutman mikhat $51ta ding ci uh hi. Zomite leitung minam 50te tawh liangkokikim in Topa'n hong koihna hi.
LUNGDAMPIHNA: (Pa Ngun Uk) le Nu Dim Lam Cingte tapa Tg. Mung Sian Hon in Pa Dai Lian Pau le Nu Vum Khan Cingte tanu Lia Cing San Kim tawh Sept. 20, 2014 (Sat) ni-in siangtho kiteenna neithei uh cih thu i zak manin Z.Y.A Weekly News pan lungdampihna i pulak hi. Lia Sankim pen Singapore pan Z.Y.A ading huhna sum hong donsak Pasian le Zomi a it mahmah Zolia khat ahi hi.
sept_19_2014.pdf
File Size: 176 kb
File Type: pdf
Download File

 


Comments




Leave a Reply