WWW.TUNGZANGNEWS.COM

 
Picture
Tedim Post Vol.1, No. 11, September 20, 2014
TEDIM POST

T E D I M  T H U  K I  Z A K N A  L A I

A Weekly News of Zomi Youth Association - Tedim

Vol.1, No. 11, September 20, 2014 Motto: "Kipumkhatin mainawt khawm ni"  Estd. 2014

Editorial....

MI PICINGTE IN NIN PHENG PAIH LO

Khantohna in kimlepam siatna pawlkhat tawh ton khawm hamtang hi. Kimlepam siatnate lakah nin pheng paihna in asiahuai pente lakah khat ahi hi. Um le bel siantho nading, inn sung inn kim siantho nading leh khuasung siantho nadingin kumpite leh NGO-te in sum tampi bei-in nasem uh hi.

Zogam zong khantoh lam amanawh laitak hi a, nin paih dan i siam kei leh kimlepam siatna hong pi-ang ding hi. Kimlepam sia leh mihingte zong bit tuan lo ding hi. Tua ahih manin nin pheng paih lo a, nin bung tawh khol hamtangin tua pan nin paihna munah paih ciat ding thupi mahmah hi. Sakollam Social Society-te in veng sung lampi dungah nin bung koih uh a, veng sung siangthosak tuam mahmah hi.

Tua banah Chin Institute of Social Science, Falam khuapi pan Tedim khuapi sung Kam Hau Road dung tengah nin bungpi 10 hong koih uh a lungdam huai mahmah hi. Nin bungte kuaman guk dingin ngaihsun se lo ahih manin zong lungdam huai hi. Akul bangin mimalte in hanciam a nin bung behlap ding leh nin paih nading munte bek ah nin paih ding hi ta hi.

Sumbukpite leh sumbuk neute akipan mipi khempeuh in nin pheng paih het loh ding hanciam huai hi. Kumpi in zong tu-in Tedim khuapi sung nin bua ding mawtaw thak khat hong nei thei ta ahih manin khuapi sung siantho nading maban limci khat akinei thei suak hi. Pasian’ tate tawh akilawm khawm khua leh tui siangtho, kimlepam siangtho nei dingin mipite in hanciam ciat ni.

Gamkhangtote in nin pheng paih lo uh a, minam picingte in kimlepam siantho nading hanciam uh hi. Khantoh lam amanawh minam picing ding akithawi Zomite in zong nin pheng paih loin kimlepam siantho nad-ing hah ngaihsut ciat ni.

TEDIM ROAD KILIM PUAH MAHMAH

Tedim – September 20 `Tedim khuapi sung Tedim Road dung teng pen Ministry of Construction pan kilimzik beh mahmah a, Lawibual veng khang sang pan Sia Khawm Pau’ sangah paisukin RC Biakinn tun ma lui ciang tai khat sung kisem masa phot ding hi, ci hi.

Tedim Road cih pen Galpi Nihna hun sung a kibawl Manipur State khuapi Imphal pan Lamka ah tua pan Singat-Behiang-Khenman-Cikha-Tonzang-Ted im-Kalaymyo dong atung suak lamzikpi min hi a, kam phen a kul kilkel lo Zomite tam tenna pen dung teng hi-in Imphal pan Tedim tai 165, Tedim pan Kalaymyo tai 53, akigawm tai 218 bang sau dingin kiciamteh hi.

Tedim khuapi sung diakah Nailung mual pan lamnuai ah paisukin Lawibual Tuiphum biakinn mai ah suak khia a, BEHS No. 5 gei ah pialsuk kikin RC biakinn mai ah, TCBC Biakinn tual ah, Khukpi Veng ah tua pan Timothy Bible School inn kun Sakollam vengah paisuak hi. Nidangin aminthang mahmah ngei Mangvom Mangkang in atheih Tedim Road hi, kici hi.

HEILEI KHUA AH A KHAWN KHONG ZATO KIHONG

Heilei – September 17 Zomi Development Foundation-te in Heilei khua ah September 17, 2014 ni-in Zomiland a khawn khong zato hong thei ta uh a, hih ni mahin zankim nai 12 dong cina velin zatui zong man ngen loin hawm khia uh hi, cih thu kiza hi. Cina kivel khempeuh 200 val pha hi, ci hi. Khua sung a pitek putek mi 15-te zong man ngen loin thaza thawlpi khai uh hi.

Heilei Hausa leh mipite in lungdam maitai takin muak uh, ci hi. ZDF in Cikha gam Haiciin khua ah zato khat, Tonzang huamah Zampi khua leh Tedim gamah Heilei khua cih bangin khua 3 ah man ngen lo akhawnkhong zato hong khin uh a, mailamah hon beh toto dingin geelna kinei hi, cih Makaipi Pu Paul Pau in Tedim Post ah gen hi.

GRACE SPECIALIST CLINIC KIHONG

Tedim – September 18 Tedim Civil Hospital a Siavuan om teng ki pawlin apualam zato cina bawlna clinic khat Bah-45 (Avung Niangtui sai mai) ah September 5, 2015 pan kipan hong ta uh hi, cih kiza hi. Nipi ni lo buang ut hun hunin damlote kilak thei hi, ci hi. Specialist-te anuai abang hi. 1. Dr. Kyaw Thet Tun, MBBS, M.Med. Sc. (Medic:

အေထြေထြေရာဂါအထူ

းကုသမားေတာ္)

2.

Dr. Phyo Swe Win Tin, MBBS, M.Med. Sc. (Ortho: အရိ ုးအေၾကာအထူးကုဆရာ၀န



) 3.

Dr. Win Thidar Hlaing, MBBS, M.Med. Sc. (O.G:

သားဖြ

ားမီးယပ္အထူးကုေဆးခန္း

) 4.

Dr. Vel Chin Sang, MBBS, M.Med. Sc. (Surg:

ခြ

ဲစိတ္အထူးကုဆရာ၀န္

) 5.

Dr. Nan Mo Hom, MBBS, M.Med. Sc. (Anae:

ေမ့ေဆးအထူ

းကုဆရာ၀န္

)

UK PAN SCOTLAND TUAM DIN LO DING

Edinburgh - September 20 Britain kici United Kingdom nuai a kum sawt pi sung a om Scotland gam mite sungah UK pan tuam din ding vai nakpi takin genna leh kinialna a om khit nungin Democracy ngeina om bangin mipi ngaihsutna vote kila a, mipi za sung pan sawm giat le li val (84.5%) vote khia uh hi. 55.3% in tuam din lo ding, 44.7% in tuam din ding, cih vote piakna pan kilang khia ta hi. Scotland mipi atamzawte’ ngaihsutna ah tuam din loh ding in zo ahih manin US President, EU makai pite leh leitung gam tuamtuam makaipite in lungdam huai thu ahih zia gen ciat uh hi. (VOA)

IN SECURITY COUNCIL IN ISLAMMIGILOTE MAWH PAIH

New York – 20 Islamic State (IS) kici Syria leh Iraq gam a om Muslim paikhial migilote tawh kisai-in UN Security Council in September 20, 2014 ni-in mawh paih a, lei tung gambup in Iraq kumpi huh ciat dingin hanthawn uh hi. US-te’ gamdang vaisaipi Pu John Kerry makaih hih gam 15 thu kikupna ah avekpi-un thukim diam uh ahi hi. Hih IS migilote in US Journalist nih leh UK Jour-nalist khat ngawng tannin that khin uh hi.

A galvan koihna teng uh France galvanlengte in September 19 ni-in kap gawp khin hi, cih thu Iraq galkap uliante in gen uh hi. CIA-te in IS galkapte 10000 kim pha ding, acih uh pen 30000 val pha ding hi, ci-in tunai deuh lamin gen khia kik uh hi.

US, UK, EU leh Australia gamte in IS-te a zung dongin a lot khiat zawh nading uh kithutuakin a sep san laitak uh ahi hi. Thau peuh suang a mihingpihte nangawn athusimlote’ gualleh zia leitung in amu ding hi ta hi. (VOA)

ZYA-DALKHAI KHUADO PAWI

Dalkhai – September 15 September 12-14, 2014 kikal teng ZYA makaih na tawh Khuado pawi bawlin khuazangbup tukpeng kisui uh a, akhatna ngahte in a letsong ngah khem peuh uh ZYA fund dingin pia pah uh hi, cih thu Pa Sut Lam Thang, ZYA-Dalkhai President tungtawnin kiza hi.

TU NIPI KAL TEDIM POST WORD GAME

Anuai a laimalte Mikang kam suaksak in. Mal 30 dong aphi theite tungah Ks. 10000/- ta hong ki pia ding hi. Dawnnate anuai a ph. no. ah puak in. Ph: 09400464770. Sms bek khak ding, call lo ding. 1. TAIDM 2. MUPEL 3. RENOYR 4. NAMEUH 5. POMOH

LUNGDAMNA

1. Pa Kap Thawn Mung, Tedim Post Translator leh Nu Ning Khan Lun te in September 16 ni in tanu nei uh hi. 2. Pa Suang Za Nang, Vice President, ZYA-Tedim leh Nu That Lam Dim te in September 18 ni in tanu nei uh hi.

CYCLE HAWLTE’ THEIH DING

1. Na lutang pammaih lai hi, cycle lukhu khu den in.

2. Zu kham sa-in hawl kei ham tang in.

3. Khua sungah dam tak hawl lel in.

4. Hausa/biakna siate in cycle thu lim gen ciat ni.

5. Nang tuahsiat phamawh lo a, midang na taih khak kiphal lo hi.

6. Mi tam taih pen khualamte ahih manin khua lamte kidop huai diak hi.

7. Mi taih kha tata sum liau zolote hi nuam pha mahmah laidep ahih lam phawk in.

8. Kumpi thukhunte zui kim leng kisik om ngei lo pen hi. Cycle/driving license nei ham tang in.

Published by Pa Tuang Gin Mang (Gi Gin), President, ZYA-Tedim, Lawibual - 32, Kam Hau Road, Tedim. Ph : 50562

 


Comments




Leave a Reply