WWW.TUNGZANGNEWS.COM

 
Dear a zahtakhuai Zomi u leh nau nu leh pa te aw;
 Chin state gammkee, Tedim uksung, Tuivial khua pan a beisa June khasunga Pateh nekhial in dipkuathuai leh lipkhap huai taka a nuntakna uh ong beisan Pa Thang Suan Khai ( Naulak beh ) leh a tapa thum teng lainatpihna sum a beisa kha khat lai a kipan USA gamsung a om beh leh phung te vaihawmna leh a lainatpih Zomi te mapankhopna tawh a ki kaikhawm sumtang US $ 7,649 ( Tul Sagih leh Zaguk leh Sawmli leh Kua ) kawlgam sum in Ks 7,343,040 ( Teng Sawm Sagih leh Teng Thum leh Tul Sawmli leh Tulthum leh Sawmli )  kingah in Pa Thang Suan Khai te pata teng a nusiat a nungtalai a innkuanpih te kiangah lainatpihna sum khempeuh kawlpi khuasunga om Agape biak innpi ah thupi leh picingtak in apna ki nei khinta hi.

Hih lainatpihna sum ki apna ah USA gamsung pana lainatpihna sum kaikhawm thusapi khat a hi Pu Neng Khaw Hau ( Nahnuai ) leh a naupa Rev. Dr. Mungtawng (FGA ), Rev. Thawngno, kawlpi khuasunga om beh leh phung makai a hithei sunteng banah a zahtakhuai Pasian nasem sia  pawlkhat leh meltheih tanau a hitheisun teng zong hih lainatpihna sum kiapna hun ah va kihel thei uh hi. hih lainatpihna sum kiapna ah a paikhawm mipi teng Pa Thang Suan Khai te pata teng i ong nusiat a nungta lai a innkuanpih tengin vok gol mahmah khat tawh an nekpihna zong na nei thei uh hi.

Hibanga lainatpihna sum i ngah theih nadinga USA gamsung  mun tuamtuam, state tuamtuam pana thusa sema a gim a tawl thusapi teng a hizongin Zo phualva lungtang pua a mipih sapih sisanpih te i tuahsiatna, dongtuahna ah lainatpih taka itna lahkhiatna in neihval lamval a hi hetlo tha gui thatang tawh na thalawhsa na sum na paai te uh iksik hetlo a ong piakhia Zomi pih khempeuh tungah nakpi takin lungdam hi ungh cih lungdamthu kongpuak uh hi.

Hibang vaihawmna pen a vaihawm pawl ngaihsutna ah Zomi movement leh Zomi te ki gawmkhopkikna vai thupi mahmah khat in ka ngaihsun uh hi. khua leh tui, biakna pawlpi, kampau awkaih i kibatlohna hangin i Zomi sungah a ki khen thaang kuankuan dinmunah i tun laitakin  a ki nusia thei, a ki pampaih thei hetlo i hihna  beh khat phung khat i hihna in teltak in ong lakkhia a hihmanin hibang vai a kihawm hi a beh leh phung vai ul tunsakna lam hilo zaw in Beh tamngai tum a a ki khenthaang kuan Zomi te a kaikhawm kik a ki nei ka hi uh hi. mailam Zomi tawh kisai minambup vaihawmna vailianpi te ah hibang vaihawmna te hangin i sanggam pawl khat a mit uh ong keuh ta ding uha Zomi hih a beisa te sangin nuam ongsa semsem ding uh hi. i biak Pasian in Zomi te a ki it, a ki khual, a kipum khat thei liailiai dingin ong makaih den tahen! 

Genbehna : Lainatpihna sum ngahna sazian leh sum kiapna photo pawl khat Attach file ah ong khakkhawm ingh. hisunga min teng pen keikianga ong kipuak dandan a kong suahsak hi-in min leh puam pawlkhat pen  a kicianzaw deih in kingen kik zel himah leh a min nei te phalna kizahtaksak a hihmanin ngah dandan a kong suahsak a hihi. hih sazian tawh kisai puahphat ding, behlap ding a om leh banghun banghun in ki puah, kibehlap thei den hi.

Zomi sungah
Pa Thang Suan Khai ong nusiat a innkuanpih teng leh lainatpihna sumkaikhawm thusapi teng taang;in
Pa Tual Sawm Lian
Tulsa,OK
September 25, 2014
pathangsuankhaitepatatenglainatpihnasumkaihkhopvaipulakna.pdf
File Size: 83 kb
File Type: pdf
Download File

pu_thang_suan_khai_te_pata_teng_lainat_pihna_sumngahna_-_sheet1_6.pdf
File Size: 111 kb
File Type: pdf
Download File

 


Comments




Leave a Reply