WWW.TUNGZANGNEWS.COM

 
ZOMI PUAN HONG CIHSAK ZAWSOP!

 

Kum 2010 Chennai, India ka Sang kahna ah a ngeina bangin Sang te'n kumsim a, abawl uh Cultures Day ki bawl hi. Ka Sang uah Kawl gam mi Chin State pan Khalkha, Matu, Zotung leh etc omin ngeina puan a puatengin ka silhtek uh hi.

Kei zong ngeina ni  cih buang a beisa in kisilh khakei mah leh ngeina puan inn lam pan-a ka vaikhak ka nu'n hong khak ngahta ka hih manin ka silh hi. Zotungte khat in nang a na ngeina puan kuate a, ahia? cih hong donga Tedimta hi e, ka cih leh ka kianga Matute papisa kum 30 kim ding khat ahi Paouk in “ehda Tedim ohsa mahouh bu, Zomi yuya ohsa be'”(tua pen Tedimta hikei Zomite ngeina puan hi) hong cisak giap a Tedim ka lawh lanlan bel ka koitak ahia khat hong nop hetlo hi. Kam khat zong ka dawngngam peuhmah kei hi. Ka ngaihsut kikkik leh Tedim cih pen mun min Khua min himawk a, minam min a hong ciamteh aom phial zongin a hithei ngeiding peuhmah ahilo Literature leh History base tawh enleng zong ahi thei tuanding na hilo mawk a, khial kakisa peuhmah hi. I theihpih loh hang lawmte pawlkhat bel ZOMI ahih lam uh na kitel mahmah mawk uh hi.

Tedim leh Tonzang, Cikha etc, te pen Khua min vive hi-a,Tedim minam aom leh Tonzang minam, Cikha minam etc zong aom kulding dan hi mawk hi. Hite zat dan pen I siamkei a, minam min peuh I sakkhak mawk leh bel I minamsungah ki pumkhatna sangin ki pumkhat loh na hong khangzaw dinga, a tawpna ah “Pangpalek tungnung kituh vanlai ah mang,” cih paunak a I neih tawh I ki bangkha dingin ka lamen hi. Kawl kumpite leh India Kumpi te’n I minam min ahilopi tawh hong ciamteh uha, tuate pen I minam min I sak’ khakteh amau zong nuam mahmah in uknopzong hong sa semsemding uh nahi mawk hi. Minam khat ahih lam uh hong kitel le-uh hong ki pumkhat le-uh ki ukzolo ding, cih ei sangin na telzaw uh hi. Tua ahih manin bangci leh ki khenkhamthei ding, bangci leh cimang theiding uh hiam, cih lamsang hanciamzaw uh hileh kilawm kasa hi, adiak in Kawl galkap kumpite hong uk dan.

Ngeina puanlam gen kikleng, ka lawm Zotungte khat kiangah bang hangin no I ngeina puan leh Khalkhata kibang mawk ahia” cih khatvei ka dot leh amau neilo in ko a, hong guksak, hong zatsak uh hi, ci-in hong dawng mawk hi. Hici bang thute ka zakteh ei ngeina puan pen kuamah a, I guksak lah hilo, kua mah a tawh zong ki bangkhin tuanlo ahih manin zunhuai, puahhuai zathuai kasa semsem a, Pasian in ZOMI a hong bawl ka angtang’ semsem hi. I ngeina puan bek hilo, a tuamtuamte ah zong I zat dan pilvanghuai, zaisakhuai kasa hi. Minam kician a kiciamteh peuhmah in ngeina kician na neitek uh hi.

Khaibawi

 


Comments




Leave a Reply