WWW.TUNGZANGNEWS.COM

 
Zomi Times Asimteng,

7 September 2014 hong khak ung. Internet hoihlohna leh manlahna
hangin hong kikhak zo pan hi. Hong telsiam un.

Endikpawl
Zomi Times
Kalaymyo

...........................................................................................................................................................................

ZOMI TIMES WEEKLY NEWS
PINLONG, KALAYMYO
7 SEPTEMBER 2014

KAWLGAM MI PHAZAH KITEL TA, MILLION 51 PHA
2014 August 30 ni-in Kawl kumpi in 2014 misimna ah Kawlgam mi phazah
Million 51 val hi ci-in pulak hi. 2014 Misimna pen March 30-10 April
sung Kawlgambup ah kinei a, 2014 April 29 ni zankim hunin Kawlgam mi
ahilo, gamdang mi Palaizum omte tawh kigawmin 51419420 hi-a, pasal
24821176 leh numei 2659824 pha hi. Pasal sangin numei 1777068 (1.7
million) tamzaw a, numei 51.8% leh pasal 48.2% hi-in numei 100 ciangin
pasal 93 pha hi. State leh Region sung mi tampen Yangon Region -
7355075 (7.4 million-14.3%) hi-a, anihna Ayawady Region -6175123 (6.2
million-12.01%), athumna Mandalay Region -6145588 (6.1 million-11.95%)
hiin hih Region 3-Yangon, Ayawady leh Mandalay kigawm 19675786 (19
million) pen Kawlgambup mimal i 38.3% pha hi. Mi atawmpen Kayah State
0.56%, Chin state 0.93% leh Nipidaw 2.25% hi-a, Kawlgambup mimal i
3.7% bek pha hi ci-in yangon Kandawgyi Palace hotel ah August 30,
zingsang nai 10:00 hunin Misimna zumpi mangpi U Khin Yi in tangko hi.
1983 misimna ah Khuaveng 941 kisim kha lo a, 2014 misimna ah Khuaveng
25, khua 97 (Rakhine-Mgdaw, Mrauk U, Sittwe leh Kachin KIA uk thuate,
bek kisimkha lo-in upmawhzah kiguang hi). Gamdang - USA, French, UK,
Sweden, Switzerland, Phillippine, Japan leh Netherland panin
Observation mission hong paite in Census Observation Mission Report ah
Misimna thu Kawlgam mipi 92% in za kha hi ci-in gen hi ci-in misimna
mangpi U Khin Yi in gen hi. UNFFA palai mangpi Ms. Janet E. Jackson in
Kawlgam misimna huhna thu gen hi. Kawlgam ah amasapen misimna 1972
kumin India tawh kinei khawm hi. 1881 kum panin kum 10 halin masimna
om a, 1891-1941 sung kum 10 simin Kawlgambup ah misimna kinei hi.
Suahtakna ngah 1948 khit ciangin 1973 leh 1983 kumin kibawl a, 1983
khit kum 30 ciangin misimna kinei kik pan hi.
Kawlgam khuapi ah ateng mimal 14864119 (kawlgambup mimal i 29.6%)
hi-a, Yangon 5.2 million (70.1%) leh Mandalay 1.23 million om a,
khuapi mi atawmpen Haka 48266 leh atawm nihna Tavoy 125239 ahi hi.
Kachin gam ah mipi i 36% khuapi ah teng a, khuapiteng atawmpen
gamkhen in Magwe 15.1% leh Ayawaddy 14.1% (khuapi sangin khuano ah
ateng tamzaw cihna hi) ahi hi. Khuapi om mi phazah Yangon -5209541,
Mandalay -1225133, Nipidaw -1158367, Pagu -491130, PhaAn - 421415,
Taunggyi -380665, Monywa -371963, Myitkyina -305347, Magwe -288883,
Molmein -288120, Pahthein-286684, Sittwe-149348, Loikaw-128837, Taroy
125239 leh Haka 48266( khuapi a om tawmzaw ding) ahi hi.
2015 May kha ciangin code neisa minam 135 miphazah kisuah dinga,
Kiteelna hunin code 914 kigelh teng zong code neisate amau code zui
minampi sung ah kihel dinga, code nei nailo minam athakte code nambat
thak pia-in minampi kibehlap ding hi. Danu leh Beik minamte in Kawl hi
kei ung ci-in Code 914 ah gelh uh a, Zomi in zong Chin hikei ung ci-in
code 914 ah gelh hi. Pwo Kayin leh Shanni minamte in zong Kayin leh
Shan hinapi code nei khalo ahih manin code 914 ah khum uhi. Hih Code
914 ah Rohinja leh Bengalite in kigelh khalo a, lauhuaina bangmah omlo
hi. U Khin Yi in tun zong akhelnuam lai a'om leh kikhel thei lai hi
ci-in gen hi. Rakhine Bengali leh Rohinja minamte gammi hihna ding
kisitna Immigration + Population zum ah census tawh kisailo-in nei
uhi. Yangon ah zong Yangon Chief Minister U Myint Swe Makpa leh atate
in Kawlgammi hihna ngen uh a, September 1 ni-in kipia hi cih kigen hi.
Hibang hileh Daw Aung San Suh Kyi tate in zong ngah thei ta ding hi.
MAL, Democray

ZOGAM THUTHANG (ZOGAM NEWS)

Chin State Misimna 2009 v/s 2014
Township (Khuapiuk) 2014 % 2009
1. Tedim 87389 18.26% 87251
2. Tonzang 21261 4.44% 19155
3. cikha 11139 2.33% 10320
4. Rih 6622 1.38% 5390
5. Falam 41395 8.65% 44351
6. Haka 48266 10.05% 48731
7. Thantlang 50363 10.52% 51164
8. Mindat 42540 8.89% 39871
9. Matupi 39355 8.22% 39556
10. Rezua 12202 2.55% 13500
11. Kanpetlet 21259 4.44% 19049
12. Paletwa 64806 13.54% 80063
13. Sami 32093 6.70% 80063
Total 450166 458401
Note: Tedim, Tonzang, Cikha, Rih, Mindat, kanpalet, Paletwa mimal
khang Falam, haka, Thantlang, Matupi, Rezua mimal kiam a, naupang asi
tam leh gamdangpem tam hiding hi.Zomite tamna sagaing Region ah Zomi
tul 60 val om dingin ki-um hi.
14 Kalay Myone 347363 (Zomi 15% 52104)
15 Tamu Myone 59315 (Zomi 15% 8897)
16 Khampat Myone 38699 (Zomi 15% 5409)
Note: Kalaymyo ah mimal 100,000 val pha a, Zomi 10000 val om dingin
ki-um hi. Te din-Tonzang-Cikha leh Rih kigawmin 125411 pha-a,
Kalay-Tamu-Khampat 66410 tarh kigawm leh 191821 pha ding hi. Yangon
leh adang ah 2000 val om leh 211821 pha thei ding hi. Zominam

Kawlpi-Gangaw Zingkaling Lei Kisia, Mawtaw 50 Awk:
Kalay, September 1-August 29 ni panin guahciin a, August 30 ni-in
Kalay-Gangaw kikal Zingkaling lei kisia-in Mawtaw 50 val awkcip hi
ci-in Aunggaba Mawtawhawl khat in gen hi. Tutung guahciin hangin
mawtaw lamsia, meileng lamsia tampi om hi. Chindwin gun zong Mawlaih
ah tuitehna 1230 lauhuai sangin asangzaw 1236cm tungto a, Kalewa ah
zong lauhuai dinmun khengin khuapi veng munniamte ah tuilet hici-in
kiza hi. Kawlgam mun tampi ah tuiletin kumpi in huhna pia hi.MOS/DT

Tedim Misi Kiphong Kik:
Tedim, August 20-Chin State, Tedim khua, Sakollam ah ateng U Vung Suan
Pau in atapa Gin Lam Thang (kum 36) pen samin thu asit leh si-a,
akivui khit kha 3 ciangin August 19 ni nai 1:00pm pawlin aluang
kiphong kik hi cih kiza hi. Tedim zatomang, Thukhenmang, Palikmang leh
ulian venghausate tawh aluang phongin zato kipuak hi cih kigen hi. Gin
Lam Thang zi Cing Lun Mang in Kalaymyo palikzum ah akhiat ciangin
P.432/2014/khialhna 325/302 tawh Kawlpi palikte in thubawlin Tedim
palikzum apto uh a, Tedim athu atun ciangin misiluang kiphong kik hi
ciin kigen hi. Thu tuamtuam akigen hangin Zatomang in ko muhna mipi
tung ah gen kiphallo a, Palikzum kipuak hi ci hi. Pa Vung Suan Pau in
thukikup ding om hi ci-in hong sam a, ka pasal 29 ni kol bulhin March
30 ni kei zong hong bulh hi. Mawtawpei khau tawh hong satin nitak nai
5 pawlin kei hong khah hi. Tedim ah om ngam nawnlo-in Kawlpi ah ka bu
hi. May 24 ni-in ka pasal si a, inn ah hong kipuak hi cih phone ka
ngah a, lau-in ka pasal gal ngamlo-in palik zong ka ko ngam kei hi. Pa
Vung Suan Pau neih Hornbill Nursing Home ah zato kahin sikhang
lungtang natna tawh si hi ci-in Gin Lam Thang innkuan kiang ah gen hi.
Pa Vung Suan Pau in Gin Lam Thang pen 2001 kumin India Calcutta ah
sumkhek dingin koih hi. 2009 kum in kiman a, ka pasal kep US$160000/-
ka ap hi. Ka pasal asuahtak ciangin sumte lawmte in hong lasak hi ciin
ka ngetkik uleh Pa Pau in kei sum hi, tampi hong khem lai nuteh ciin
asitna panin hibang thu apiang hi ciin azi Cing Lun Mang in gen
hi.Kalaynews

KAWLGAM THUTHANG (MYANMAR NEWS)
State / Region zui mi phazah
Gam Pasal + Numei = vekpi
1. Kachin 877644 + 811990 = 1689654
2. Kayah 143461 + 143277 = 286738
3. Kayin 775375 + 797282 = 1572657
4. Chin 230005 + 248685 = 478690
5. Sagaing 2518155 + 2802144 = 5320299
6. Tanintazi 700403 + 706030 = 1406434
7. Pagu 2324214 + 2539241 = 4863455
8. Magwe 1814995 + 2097718 = 3912711
9. Madalay 2919725 + 3225868 = 6145588
10. Mon 986454 + 1063828 = 2050282
11. Rakhine 1529606 + 1659357 = 3188963
12. Yangon 3517416 + 3837589 = 7355175
13. Shan 2918259 + 2907125 = 5815384
14. Ayawady 3010195 + 3064928 = 6175123
15. Nipidaw 565180 + 593086 = 1158367
24821176 + 2698244 = 51419420 Democracy Today 2 s 14

Mon Dakpi Kizong lai:
Yangon, August 31, Mon kumpite Dama sedi dakpi pen tudong zong lai a,
kimu hi akicih hangin akician om nailo hi ci-in kigen hi. Pawl khat in
gulpi in vialhkhumin kem hi a ci om a, Yangon ah piteek khat Gulpi
samnei Dakpi kempen ding sunglutin pau-in khuaphawk lo-in om a, Dakpi
tawhna sik khuam in hong delh kha hi, hong lakhia le uh cin Dakpi mu
ding ci-in awng ziahziah hi ki ci hi. DT

Chindwin Gun Khang:
Monywa, August 30 - Chindwin gun khangin hat lua a, September 1-3 sung
tembaw khawl dingin Private tembaw Committee Makai U Taung Ngunt in
gen hi. Chindwin gundung ah tembaw pawl 9 pan mipua tembaw 125 leh
vangpua pawl 12 pan tembaw 470 kihel hi. Monywa ah tuikhang tehna
centimetre 1000 ah 969 cm tungin tui hual khauhlua hangin lauhuai hi.
Chindwin tui khang lauhuaitehna tung khutpi 18 (pi khat leh alang)
tamzaw hi. DT

President U Thein Sein Europe Zin:
Frankfurt, Sept 2 - Kawlgam President U Thein Sein pen Germany ah
zinin Germany chancellor Angel Markel in vaidawnna nei hi. 2013 Feb
25-8 March sung Europe gam 5 - Norway, Finland, Austria, Belgium leh
Italy zin a, 2013 July 14-20 sung UK leh French zin hi. U Thein Sein
aa dingin Europe khualzinna 3 veina hi ta hi. MAL3

Rakhine Gam ah Meimual Puakkham:
Kyuakphiu,Sept 2 - Rakhine gam Kyaukphiu, Silahchaung khuagei tailang
ah Buanlei meimual om a, August 31, nitaklam 5:45 hunin puakkhamin
Baunlei suangtuite vantung lam ah pi 50 lengto a, lo Eka 40 val
buantuisa in vulhnelh hi.MAL

Kawlgam Nungak Melhoihte Kilang:
China-Asean Nungak melhoih kidemna ah Image Pageant 2014 winner Indra
Shriko in ngah a, Chawsuh Linn Phiu Htant in 1st Runner Up ngah hi.
Hih pen August 29 ni-in China gam ah 10 veina China- Asean Image
Pageant 2014 ah Asean gam 10 leh China pan nungak 65 kidemna hi. MAL

Numei Galkap Omta:
2014 August 28 niin Yangon - Mawbi numei galkap sang ah Degree ngahsa
numei galkapbo batch No.1 Sangpawi om a, Sr. Gen. Min Aung Hlaing in
thugenna nei hi. Numei sangzote officer rank kipia pah a, kawlgam ah
numei galkap sinna amasapen ahi hi.MAL 29 A 14

LEITUNG THUTHANG (WORLD NEWS)

Thai Kumpi Ding:
Bangkok, Sept. 1 - Thai galkap PM in kumpi panmun gualhna pulak a,
galkaplui tampi kihel hi ci-in Thai PM Gen. Prayut Chan'0' Cha in gen
hi. Thai PM in Dy. PM mi 5 leh member 32 tawh kumpi dinga, ulian 12
pen galkaplui vive koih hi.Xinhua/OT

Pakistan Buaina Sang:
Islamabad, August 31- Pakistan khuapi Islamabad ah PM Nawaf Sharif
deihlohna tawh alangpang Amran Khan makaiin mi 25000 val in PM Inn
manawhin lamzuihna nei uh a, August 30-31 ni 2 sung buaina nasia-in
palikte in mipi khenkham a, mi 300 val liam hi. Mipi uangtat
gamtatsiatna hangin palikte in buangnai thautangtawh kap uh a, khitui
bomb zong zang uhi. Mipi in Crane mawtaw khat nei-in President Innmai
dong lutsak hia 2014 kiteelna ah vote gn hi ci-in PM atawp ding ngen
uh a, atawp mateng kiphin ding ci-in avau hangin PM sharif in mipi
vote tawh acing hing, tawplo ding ci-in gen hi.CNA,DT

Ebola Natna Hangin Nigeria sang kikhak:
Nigeria gam ah Ebola natna hangin October kha bei dong sangkhak dingin
kumpi in gen hi. Nigeria gam ah misi 5 om ta a, Guinea, Libesia leh
Sieraleon gam ah 1400 si ta hi. ebola natna om gamte ah vanleng
kipaisak nawn lo hi. BBC

Russia Putin In Ukraine Nisuahna Gam Piak Ding Ngen:
Russia, Ukraine leh OCSI kimuhna ah Vladilir Putin in hangsan takin
Ukraine nisuahna gamte suahtakna pia uh ciin ngen hi. Kumbul lamin
Russia in Ukraine kumpi gam Crimea Russia kampaute paulapin laksak a,
tun zong Ukraine nisuahna gamteng alaksak dingin kipan ahih manin UNO,
USA leh EU in thumanlo hi ciin Sanction tampi koih uhi. BBC

Chin State Ah MBBS Zosate Kideih:
Chin State ah MBBS zosate 39 kideih a, August khabulin 39 akideihna
lak ah 37 in laiphahin 33 bek kimuhna ah pai hi. Adiakin lupna 16
zatote ah MBBS ngah omlo-in blue staff nurse in tavuan la hi.MAL31A14

Editorial ...............
TULAI KAWLGAM DINMUN - 3
TULAI KAWLGAM SUNG AMINTHANG DEUHTE
1. Minam Kemcing Upadi(Thukhun - Dan)
Hithu pen biakna kepna dingin minam kepcingna kisam hi cih thu
tungtawnin hong piang hi a, adiakin Buddhist mite khat biakna dang a
apai ciangin nasakna panin hong piang hi phadeuh hi. Hi Minam Kemcing
upadi bawl dingin Gambup Innpi nangawn ah committee phuanin vaihawmna
neih dingin khensatna a'omtei hangin tun tua thu tawh kisai akigen
hong kidang zawdeuh ta hi.
2. Mon Kumpi Dakpi - Damasedi Dak Vai:
Tulaitakin hih Dakpi tuisung panin khuatkhia dingin Mon minam tuisiam
U San Linn leh alawmte in hanciam uh a, kimu ta hi akicih ciangin
akilakhia zo ta ding hiam ciin alunglut a a'en mi tampi pai a, tua
Dakpi gulpi in kem hi ciin tua gulpi asunglut nupi khat bang om hi.
Ahi zongin kimu ta hi kici napi tudong kilamdanna om tuanlo ahih manin
a'en zong nisim kiamzaw ta hi cih kigen hi.
3. UNFC leh Tualsuak Thautawite Vai:
UNFC ah tualsuak thautawite avekin kihello hi. Ahi zongin amau
kipawlna pen akip akho hileh Kawl kumpi aa dingin zong alauhuai maw
amuanhuai dinmun ciang ahithei ding ahih manin Kawlgam mipi in lunglut
veve hi. Kumpi leh tualsuak thautawite kimuhna 2 vei om khin ta a,
thu kikup ding zong tampi om nawnlo hita leh UNFC panin KNU tawpna
hangin kumpi leh tualsuak thautawite kihona abuaizo tam ciin
alunghimawh pawlkhat zong om hi.
4. NLD leh 88 Sangnaupang Nasepna 436 Singnature Campaign Vai:
NLD leh 88 Sangnaupangte vaihawmna tawh Kawlgam 2008 Danbupi Puahna
dingin Dan 436 puah masak kisam hi cin signature campaign bawl uh a,
million 5 dektak ngah uhi. Kawlgam vote tawi mi khempeuh i 25% bang
angah hi zenzen leh USDP kumpi in akhel noploh 59 A 1-2 kikhel thei
ding hita leh lam-etna sangin tawm ngahzaw a, Gambup Innpi ukpi U Shwe
Mann in zong hih 436 signautre campaign hangin Innpi thukhun bawlna
ding ah kikhelna om zolo ding hi cin pulak hi. Hithu hangin Democracy
force lamte aa dingin thasanna ding akisap laina thu hong phawksak hi.
5. FPTP leh PR Kiteelna Vai:
FPTP Kiteelna - First Past Take Post (atam ngahpen kumpi) ding cihna
hi a, PR kiteelna pen Proportional Representative(vote 10% angah
pepeuh MP ngah ding) cihna hi a, Constituency khat ah MP 2 leh 3 om
ding cihna ahi hi. PR kiteelna kizang hileh Kuangluina mun pan FPTP
ngeina tawh mi 1 bek MP ding hita leh PR ah 2 leh 3 MP om ding a, kua
pen in amau kuangluina mun minpua ding hiam cih zong akicianlo suak
hi. PR kizang leh vote 10% ngah nak leh MP kisuak thei ahih manin
party neuneu tampi omin mihoih hoihlo tampi Innpi sung tungin buain
lian ding hi ciin Demecracy deihte in gen a, USDP leh NDF party pawl
in mi khempeuh kiheltheihna ding hoih hi cin gen uhi. Tulaitak izatsa
USDP kumpi pen FPTP kumpi - azote/ MP tam ngahpen party in kumpi ding
hi a, 2015 ciangin azo party ahi ding kilam-en zolo uh ahitam ciin
agen zong om hi. NLD party in bel hoihtakin kiteel hileh 2012
by-election bangin azo party ahi dingin kilam-en uh a, kumpi dinna ah
kithutuahpihloh partyte tawh semkhawm leng buaina piang ding hi ciin
PR party kipawlkhawm kumpi ding deihlo uhi. Adiakin tualsuak minam
party khempeuh in PR kizang leh ei mitawmte in cikmah hunin ulian
kumpi minister kisuak ngeilo ding hi ciin nial vinven uh a, Kawlte bek
in hong uk den ding hi ciin lauthawng uhi. Sia Lang Khan Khai
 


Comments




Leave a Reply