WWW.TUNGZANGNEWS.COM

 
Banghang ZOMI AKSI?


Dr. Cin Do Kham hong nutsiat lai-in pammaih sa leh nasa ngeungau ka hih manin la dawngkhat ka phuah a, "ZOMI AKSI" ka ci hi. Tu in kum khat hong cingto hita a, zingciangin Tulsa-USA ah Zomi Gospel Concert tawh gawmin phawkna hun kibawl ding hi. Tua laia group song ding Mrs. Kham (siapa zi) ii hong ngetna tawh la dawngkhat ka bawl leuleu a, "KHANGTHAK KHAICI" ka ci hi. 


Kei mimal tungah nahoih hong sepna hang leh ka kimeltheihna hang hi zawloin, hong nutsiat taktak ciangin leitung kiuli a om Zomi teng ii lungtang zinling bangin hong lokgawp zo a, kidah in ki thanemin ki lungleng gai tek ahih manin ama thupitna ka phawk sansan hi. Kuakua tawh kiho le hang a kam uh pan "Ih Zomi makaipa in hong nusia, tun kuan hong makai zo nawn mawk ding?" cih ka limzak mahmah hi. Zomi bup mi a tampen ii dah khopna, ka theih khialh kei leh, kei khangah tu a bek ka thei pan hi. 



GZI & GZA ah makai ahih sam hangin makai ahihna sangin a veina lian ka sa zaw hi. Vote tawh makai dinga a kitel thunei makai nam hiloin, deihsak kipumpiakna leh veina bulphuh makai, a kipumpiak tawm makai nam ahi zaw in ka mu hi. Makai in kikoih kei leh zong ong gen kammalte ki lamdang tuan in ka um tuan kei hi. Tua manin deihsakna- veina tawh makai lungtang a puak lam ka telpih mahmah hi. A kisawl nasem hiloin, sep huai a sak a sem giap ngam makai hoih khat ahi hi. 



Leitung bup a om Zomi khempeuh phial kidah a, akpi mu in a mat ciang a khuangai aknote bang kisa in Zomi ih khateem hi. 
Kap buabua loin, kidiik niloh hi hang, khuangai hi hang.
Ngiahsun le hang tu mahmah in zong ih nakngekna in ih mit mong tengah kitui naam zolai hi. 



A neih deihsakna, thuakzawhna, maisakna, veina teng leh Mipi in ait a phawkna danteng ka gawmkhop ciang, tehpih theih pak ding a omlo a mahbek tuam om velval ahih main AKSI cih min a pia ngam ka hi hi. Ciin ding zuih ding thu hoih tampi hong lak ahih manin Khangthakte adingin KHAICI bang ka sa hi. 



Khazih leh minam itna sungah

JK Kam 
ITNA LEIBA

 


Comments




Leave a Reply