WWW.TUNGZANGNEWS.COM

 


Tutak in Malaysia ZAM zum aa minpia Zomi 27000 bang pha ahihman in Tonzang township sang tamzaw cihna ahihi. ZAM lo aa minpia honpi khat omlai ding ahihman in Tonzang, Cikha gamkuam aa omzah mah om mawk dinghi.

Tuateng Khuado Oct 15 ni-in kibawl aa mipi 5000 sang aa tawm zaw hetlo ding kiphahi.
Khua 80 val, Pawlpi 20 val leh mimal, mihau teng panpihna tawh nasia tak in sun 12:00 pan nitaak nai 7 dong akitawn ziahziah ahihi. Security dingin Rela acihte cial uhhi. Zukham, ankham, kitawng kisel cihbang om hetlo ahihman in, midangte aa ding alamdang ahihloh hang hihbang mipi kisuktuahna abawl zel, namdang i mipih dangte aa ding a lamdang ahihi.
Khuado Committee a omhang agim atawl leh inntek sem ZAM makai palaite ahi uhhi. Thudotpi 7 om uh aa, papi samkang talkolh vive ahih uhhang khangnote zahmah in thanuam, kician, thapia takin kihel uhhi. A lamdang zah tha nei lai uhhi.

Makaite
Makaite tawh kisai gending tampi kanei het kei aa, atom in,"Hizah aa makai thei, makai zo tengin i Zogam ah ong makai mai le uhteh" cih ka lunggulh tha ong suak peuhmah hi. Ahihhang, Malaysia ah i Zogam sang mi kitam zaw ahihman in hih mipi teng kalsuan pih ding zong kisam veve kasahi. Piicing mahmah uh, pasal vai mahmah uh cih ziau ding himaihi. Khangno lai ngalhat lai vive ahi uhhi.

Thudotpi teng
7 pha uhhi. Pawlpi makai zong kihel uhhi. Kam aa kigengen sang ci-in drama ong lak uh aa ciapteh vilvel ding ong lakkhia thei uhhi. Zomite pawi neih teng, kha simna, Khuado khiatna cihte kiciansak mahmah tel mahmah uhhi. "Innlam ah kitaangsam mah loding maw, hihteng na tungmang khin hi ve uhcin" kacihtha ong suakhi.

Hunkeem MC tegel
Sm Deih Mang leh Francis Kham hizen uhhi. Academy piakna aa tezong hizah val hituanlohi. Sun thapaai mipi keemzo, mipi ciim saklo, kampau mal khat mahmah zong khial hetlo in omthei zen uhhi. Hungel dan siamlua kisa, Zolia leh Zotaang teelding aa kicial namdangte nangawn in a teelding uh mangngilh zah dongin hungeel nopci sak uhhi. Zolia, Zotaang teng stage tung ah hoihna kidem aa ong vaak kawmkal aa Pu Tun Za Kap tu, tangval melhoih 4 leh a pa uh "Zolia, Zotaang" cih a Pa phuahla sa kawm aa ong vaak hialhial pen kua mah zat ngeiloh, i muhkhaak ngeiloh gelsiamna hizen ahihman in, gamdangmi mat piading teng in a nasep ding uh a mangngilh zah na himawkhi.

Lasiamteng
Gamdang lengla teng in Malaysia Idol ah akihel ding uh deihsak ngam uhhi. Siamsa mahmah cihna ahihi.
Melhoihteng

Ka mo leh ka maak ding aa kadeih vive hizen hi. Ciltui kailiang in ong omsak, puteekpipi ong nuihmai sak zen uhhi.

Lungnop huai phadiak
Zolia, Zotaang, leh lasiam teng hun uk te'n a hopih sim in, Pasian leh ka Zomi aa ding" cih vive bulphuh uh ahihman in, Pasian leh Gideon aa ding namsau khat" cih otna ka bilkha ah kazakik aa, "Gideon Pasian mah Pasian aa i neih naak leh bel..." ci-in lungdamna khitui ong luangsakhi. Ong hangsan sakhi. Ong lungmuangsakhi. Tha ong dimsakhi. "Zomi cihding alau aa aliing teng aciahkik hang kalau nawn keihi"

Khua leh Pawlpi
Hihbang apian zawh nading in khua kipawlna pan khua 82 leh Pawlpi 20 val ii sepkhop, kipiakkhiatna ahihi. Pawlpi leh Khua in nasem khawm cihna hi aa, lungkim huai mahmah hi. Vaihawm siamna ahihi. Mihau khat in pia khia ziau cihbang hilo mikim, khua kim, Pawlpi kim kihelna hi aa mipi lungsim la phadeuhhi. Bishop Felix in, "Pua khawm leng zang, ne khawm leng lim" ongcih tangtang kaphawkhi. Akiseh, a satan zah bek hilo aval in pia khia ciat lai uhhi. Cihna ding kammal kamu nawn kei aa "Etteh huai tak hang ei guai" kacibekhi.

I mihau teng
Zomi sung aa a cithei zawdeuh teng in iksik hiaulo pia khia ziahziah, lawn khia ziahziah ahihlam katheihi. Kumsim aa a piakhia uh ahihlam zong ka theihpihhi. Amau thalawhsa, amau guak in zangding, ne ding, gai ding cih lungtang nei hetlo uh himawkhi. Amau panpihna, thapiakna omlo hileh hizah in nopci zolo ding ahihi.

Athupi penpen
Zongeina it, minam it mipi teng mahmah thupi lua kasahi. Nasep nusia, naupua, tu leh ta kaai kawm in ong kuan uhhi. Lunggulhna, tupna, lam etna lian mahmah nei uh ahihlam kathei aa, hihte Thungetna, panpihna, deihsakna, thapiakna, kipiakzawhna a omlaisiah i minam mailam ding cidam kasahi.
Zomi khanlawhna ong kipatcilna taktak hih Malaysia mun ahihman in, a khangkhang aa makai masate ka musak kik nuam hi. "Khitui naptui tawh na vawh navuah buhlomte ki at ta hi" ci-in ka kiko khia nuamhi.
Hihteng hang in 914-Zomi ah gualzawhna kingah aa, hihteng hangin Zomi tul zanih a kiciamteh hitahi. Hihte Thungetna hang aa gualzawhna pawi a khaam ding ihihi. Hihte lunggulhna, thuumna, tauna Pasian in za hi.
Minam aa ding galhangte, ahangsante, a kuankhia ngamte ahi uhhi. Paulap zong aa lau aa ling aa omte naciahkik uhhang hihteng a om laisiah kalau nawn kei hi.
"Pasian leh Zomi aa ding namsau khat"

Hang Khan Lian




-- 
Hang Khan Lian
Block 646#13-115
Jalan Tenaga
Singapore 410646
 


Comments




Leave a Reply