WWW.TUNGZANGNEWS.COM

 
Dear It le ngaih mipih teng,

A theinuamte' ading Kalaymyolam thu pawlkhat hong gelh kik ing. (thulu
neu 11 om ding hi).

1. Tunung a i gensa maban zomin, Taxes, USA pan Kawlgam hong zin,
Revd Dim Lun Zam (Zamnu) pen Kalay No.2 Section panin W.M te' sapna
tawh Phualpi A.G ah cialpi lawhcingtakin a bawl khit teh (tu nung a i
suahsa), Hakha leh Tedim BAG ah zong thusinpihna leh cialpi va nei
kawikawi a, Oct.19, 2014 (sunday) sun hong ciah suk a, nitakin AMC,
Kalaymyo ah hunzatna manphatakin nei thei hi. Sianu pen thugen-lagen a
kivak banah a diakdiakin Healing lamah Pasian in hong zatsak mahmah
khat ahi hi.

2. ZRDP Crusade & Maban:-

Zogam Rural Development Programe makaipi ahi, H.Vum Nang veina tawh a
pianna Saipimualkhual ah Oct. 9-11, 2014 sungteng Crusade limcitak
bawl hi. Khuasungah pawlpi nih om a, Tuiphum leh A.G ahi hi.
Kipawlkhawmin bawlpih a, lawhcing mahmah cih thu kiza hi. Tua munah
Counseling leh Speaker dingin Revd Vungh Kap (Tuilang A.G) in makaih
hi.

Tuaban ah Motor lampi zikna tawh kisai-in tulaitak Chikha Town le
Khenman khua kikal teng kumpi' bugzet tawh a sepsak san laitak ahi hi.
Hih ZRDP lampi bawlna in ahih leh sum masak lo zaw a, gamsung kikawmna
nuam ding, lampi hoih ding cih bulphuh ahih manin sum om loh ciang
nangawnin a bat tawh nasemte ahi uh, cih pen mipi in i lungsim lhat ah
theihpih huai kasa hi. Sum lo tawh kisem thei lo ahih manin bul lam ah
siauzel siau zel in, H.Vum Nang pen buai mahmah mai hi. A beisa ah
mimal tungtawn a ih mapanpihna te zong lungdam mahmah a, limtak mahin
ciamteh ahi hi.

3. Dahna thu lam panin, Tg. Pau Suan Khup (kum 24), Pa Vungh Suan
Thang' tapa, Myothit BC, Kalay, Khualui Kapteel in, Oct.11, 2014 ni
za-in Motor accidentna tawh hong nusia a, 13 ni-in kivui hi. Tedim pan
Haimual car tawh a zan ciah uh hi a, 12:00 Pm. hunpawlin Taakhual khua
pam panin motor lampial in hong nusia hi. Tua lo a dangte kawng kitan
tawh a liam a bai mi li bang zato tung ahi hi.

4. Bawhlung kidemna a munmun ah om.

Munlai tualpi ah kum sim a a neih zel uh ahi, khua-kim-khuapam leh
veeng tuamtuam panin Bawlung kidemna pen Munlaitualpi ah a kidem zawh
uh sawt khin dek ta ci uh. Mizo lamte'n zong a munmun ah kipan ta.
ZOFA te zong mai kalsung kipan ta ding cih kiza hi. Bawlung uk gige
napi a phawk lha lote khuadak khiat ding hin teh.

5. Thukizakna laihawm pawlkhat kikhawlsak pak kici:

Sanggam Falamte in tukum March kha pan kipan nisim (daily news) a
hawmkhiat den uh, "Falam Post" (Copy 700) pen tungsiah lampan
kikhaksak cih kiza hi.

Tuaban ah Hakha Post zong khaksak uh a, tu'n bel ngah kik nuam dan uh
hileh kilawm, cih ciang kiza hi.

Tu'n Tedim Post zong Registrar lo tawh hawmkhiat loh ding cih thuging
kiza ahih manin vaisaite in tungsiah lamah phuut toh dingin geelna nei
uh hi, cih thu khawng kiza veh ee..thethup mawk peuhmah.

6. Home Mission Crusade:-

Galilee pawlpi mi, (Revd Mang Cin Thang) innkuanpihte' hanciamna tawh
kum sim a a neih zel uh Crusade pen Oct.22-24, 2014 sungteng Galilee
A.G Biakinn ah bawl ding kipanpan ta uh hi. Tua dingin Monywa,
Hallelujah A.G Pawlpi panin Revd Cin Khan Thang (a) Thangpute nupa le
a tapa, Pastor Kimpu (Singapore), Tg.Sangpi & a lawmte pawlkhat in zai
ziahziah ta, cih thu kiza hi.

7. Crusade om ding:-

Kalay No.2 Section Thusina om ding:-

Kalay No.2 Section te' vaihawmna tawh tukha, Oct. 29-31, 2014 sungteng
Agape A.G (AMC) biakinn ah thusina leh biakpiakna cialpi om ding ahi
hi.

Tua munah Revd Dr Go Chin Zam (Zambawi, O.M, Myanmar) in thusinpihna
leh hanthotna pia ding ahih manin nitaksim a pai zozo kihel huai ding
hi, cih deihsak thu ih i kizasak hi.

8. ZCLS makaite' khualzinna

Zolai Masawnzia tawh kisai kikuptuahna pen Oct. 14-17, 2014 sung teng
Lamka khuapi ah kibawl a, Kawlgam panin mi 4 va kihel thei uh hi. Revd
Hau Khen Kham ( Exercutive Secretary, ZCLS makaihna tawh, Pa Kam Za
Kham, Sia Cinpi leh Sia Khup Lian Suumte va kihel thei uh hi.

9. God Trio Partners (GTP) Kawlgam ading palaipi khat ahi, Siapi Revd
Mang Za Suan (Australia) makaihna tawh Oct. 22-24, 2014 sungteng
Yangon ah thusinna thupitak nei ding uh hi.
Kawlgam sung mun tuamtuam pan kikaikha ding uh a, Kalaymyo pan a pai
bebek zong tulai Bus thakte dim khat val paisuk uh hi.

Hih GTP nasep kipat pen 1990 kiim pan hi a, a thubulphuhpi diak uh
ahih leh (a) Kuankhia ding (2) Thungetna tawh (3) Piakkhiatna tawh hi
a, hong maimawt toto uh hi.

10. ZCLS Kalay, Myanmar in Website nei ta.

Tunung lam a i kizaksalna tungtawnin Malay a om, Sia Joseph Khaipi'
(SDA) ii hong panpihna tawh a kinei zo suak
ahih manin ih lungdam mahmah hi.Amau innkuan leh a mabante ah Topa'n a
thakin thupha hong piaksak ta hen.

www.zcls-myanmar.com, hi a, E-mail Id zong hong bawlsak pah hi.
Website ah pen thu tam kiguang mannai lo ahih manin damdamin i semto
ding hi, cih i kizasak hi.

11. Pata Ki-that.

Kalaymyo, Natchaung khua ah Oct.9, 2014 ni-in U Kyaw Shwe (Kum 48) leh
a tapa Maung Tu Tu (Kum 28) kikamtam kha uh a, kitawngin kilai gawp uh
ahih manin a tapa in "nanchetku" pi khat a sau ding khat tawh a pa lu
vatsak a, Mandalay zato dong kipuak hi.

A pa damzo lo-in Oct.20, 2014 ni-in zato pan si ci hi. A tapa zong
Palik ten manpah uh a, mithat case tawh thong sungah kem uh hi.
Palikte' genna ah a Pa' khuaksungah si luang, tuabanah a pangpi khawng
zong kizeep, cih gen uh hi.

Natchuang khuate' genna ah khua kisat tawh hibang kithahna a masa pen
ahih manin dahhuai kada mahmah uh a, mailam ah hibang hong om nawn loh
nading limtakin kimapang ding hi, cih gen uh hi.

Muhsakna:- Hih misokpa' nanchetku pen guta-buluh khawng vaat nading
leh apa a cin a huut nading khawng hi leh kilawm zaw buang mataw...

12. Pawlpi zui-in Hall tuamtuam kibehlap.

EFCM leh Sanggam namdangte in mipi khawllhop theihna Hall golpipi
hong nei masa uh hi.

Eimite' sungah Tahan BC te'n nungkum khatin nei. Tu'n Leipi te'n zong
Hall golpi, a sungah khuam omsak lo, a hoih mahmah khat zat theih ding
ciangin zo ta uh hi. ZBCM huangpi sungah zong limtakin a bawlbawl
laitak uh ahi hi. Tua lo a bawl sawmsawm lai zong om hi. (gen lhsk loh
zong om theitak hi).

NB: Inn nupi nasep sem kawm a i zakkhak teng a kihawm sawn pak zel
ihi hi. Thu-lu tuamtuamin guang leng na Inbox uh hong dim nianua kha
leh cihna tawh a gawm zing ihi hi. Laisim mimalte' tungah lungdam, ka
gelh thaman om ci ning.

** Ih khuahun zong zingsang bang hong votsim hiauhiau pian ta hi.
Nuambek lian cih ding hi.

Deihsakna tawh,
Peter Khampu

-- 

Peter Khampu
CMedia, Kalay

"...Na hoih sep ding cimtak kei ni, a hun a tun' ciangin a gah i at
ding hi" (Gal.6:9).
 


Comments




Leave a Reply