WWW.TUNGZANGNEWS.COM

 
Internet ah Dahna lam ahi a, Lungdamna lam ahizongin i suahsak zel
kawmkal ah meltheih lawm-gual, zattangzang nei khol lo mi pawl pen
kisuah ngei lo hi. Mi khempeuh i huamkim zawh vat sam loh hangin i
theihsun pawlkhatte a theinuam giugiaute' ading ngaihsutna tawh a
kihawmsawn i hi hi.

A. Amasa-in NOPNA: MOPAWI LUNGDAMPIHNA.

1. Tg. Khai Khan Suan (M.Th), Thangnuai/Sozang leh Lia Hau Sian Nem
(Nurse B.A, Eng.) Lawibual Tedim te in April 17, 2014 ni-in Sozang EBC
biakinn ah pumkhat suahna nei uh hi.

2. Pastor Tg. Thang Zom Khai Nahnuai-Yangon leh Lia Mang Ngaih
Khawm (Khawmnu) Revd Cin Khan Thang leh Nu Hau Khen Cingte' tanu,
Hallelujah AG, Monywa te in 21-6-2014 ni-in Emmanuel BC, Yangon ah
pumkhatsuahna nei uh hi.

3. Sia Thang Khan Pau (Cikha khua) AG pawlpi phutte' tanu, Lia Don
Ngaih Lian (Liannu) M.Div. NLC, B'lore; tulaitak Paradise AG LST
sangaj lecturer leh Tg. Thawm Khen Thang (Khen Thang) te July 5, 2014
ni-in Cikha A.G biakinnah pumkhatsuahna nei uh hi.

4. Kalaymyo Seikkantha a teeng, Pa Pum Za Kam Laitui (Mm. Airforce
Rtd.) leh Nuang te' tapa, Tg. Pum Kim Mang (a) Kim Mang, (Computer,
Yangon) leh Lia Awi Lam Niang, Laituite in 19.7.2014 ni-in AMC,
Kalaymyo ah Revd Go Za Nang tungtawnin pumkhatsuahna nei uh hi.

5. (Pa Pum Thang) leh Nu Hau Niang, Kansau-Kalaymyo te tapa, Tg. Pau
Suan Mang (Mangpu) Tulsa, USA leh Sia Lian Do Thang, Emmanuel BC (Nu*)
tanu, Lia Niang Nuam Kim (a) Nuam Kim (B.A) te in 12-9-2014 ni-in
AMC, Kalaymyo ah Revd Go Za Nang' tungtawnin pumkhatsuahna nei uh hi.

6. Pastor Pau Hau Lian (a) Lianpu (B.Th) Mesenger ZBC, Munlai leh Lia
Ning Ngo Niang (a) Nuboih (B.A) te in 13-9-2014 ni-in Munlai Tuiphum
biakinn ah Revd Thang Tung Nung (KZBA) tungtawnin pumkhatsuahna nei
hi.

(Hih a tunga teng pen Invitation ngah pawlkhat teng hi a, a mun
gamlate bang ki pai zo lo, contact phone lah ngah lo cihteng tawh ka
pahtaeina leh ka uapna kawm zong ahi hi. Mopawi Photo pawlkhat kpng
khak sawm leh hong lemvat kei ei).

B. DAHNA LAM PAWLKHAT: -

1. Thangnuai khua, Pa Kim Suak leh Nu Cin Luan Cingte' tapa neu pen,
Tg. Kam Sian Khual (Kum 25) in August nipi nihna hunpawlin phakam gam
panin tuikia-in hong nusia hi.

2. Tg. Kham Khan Thang (Kum 33) SDA, khualui Sim Suangzang, Tahan,
Law-kah-tee in Sept.19, 2014 ni-in hong nusia hi.

3. Malaysia pan a zi le ta' kiang kawm dinga hong ciah ahi, Pa
Thangno (a minpi thei lo), Ngalbual R.C leh a naupa hong ciah uh a,
hong tunni a nitaklam teh Khua ciah nading Car ticket lei a pai a
zinpa tawh Motor lamzikpi a kanna uh panin Zomi mah cycle hawlkhat in
na phulum mawk hi.

A mun pen Tahan leh Munlai gamgi lamzikpi tung hi a, khualmial madiak
ci hi. Pa Thangno pen a pualam a lianna om lo hi ta leh zaempah ahih
manin Kalay zato kipuahpah a, ni khat khit ciangin hong nusia, a
zanzan mahin a khual ngalbual ah kipua to hi. Ta 4 nei-in a neu pen
bang nursery kahlai cih kigen hi. A taihkhate' lampanin thuum ih a,
sum Ks.15 lakh tawh vai siangsak thei uh cih kiza hi. A zinpa pen a
khe kitanin tudong mah Kawlpi zato ah lumlai ahi hi. Dahhuai mahmah
zel mawk hang ei.

4. Laihawmte leh internet ah ka muh khak loh galkap zalian khat leh a
migi pha mahmah leh mi pammaih mahmah khat ahi, Captain Mang Khan
Thang Rtd. (Kum 57) Hatlang beh, pianna Muizawl, Kalaymyo in sikhang
natna tawh hong nusia hi. A pawpi Galilee A.G ah pawlpi chairman,
lai-at leh sumkem cihteah mapang den a, a omna Sanmyo a inn ah zong
zatuisun sai phuan ahi hi.

Tua lo misi a dangdangte pen a thu kicing theih kim loh tawh ci-in it
loh ngaih loh a om loh hangin sihsia deuh leh khangdawng tunai diak,
telcian teng hibek hi a, kuamah deidanna cibang danin na ngaihsun kei
un.

NB: Mailamah a zaw diakin Kalaymyo huam Zomite' sungah dahna-nopna
cih hibang dan a suah zel ding mi tampi in i lunggulh a leh kpng na
hanciam nuam hi. Tua dan hi khol lo a, net dimsak lak cih lam khawnga
a na la peuh i om zel a leh pen vau tam veve cihbang dan ahi hi.

Tuadang pawlkhatte zing leh thai lamah zom ni-in tuni ading hih i
thu-lu bang ciang hisak ni. Omna ciatah Topa'n thupha hong pia kim tek
ta hen.

-- 

Peter Khampu
CMedia, Kalay

"...Na hoih sep ding cimtak kei ni, a hun a tun' ciangin a gah i at
ding hi" (Gal.6:9).



__._,_.___
 


Comments




Leave a Reply