WWW.TUNGZANGNEWS.COM

 
ZO NGEINA IT KEI LENG MINAM ITNA ZONG BEI DING
=========================================
By Hang Cin Hau B.Min, Khualai Veng, Tedim Khuapi

1962 kum pan 2010 ciang dong ki-ukna tawh kizui-in pau le ham, ngeina
leh nikten puan silh ziate tampi tak kilamdang a, kep ding leh zun
ding tampi kem kha loin i mangngilh khin hi. Tampi tak mah thusim nawn
loin nusia khin dek hi hang.

Kumpilui U Ne Win in Kawlgam mite in pau, lai leh ngeinate bei lo,
mangthang loin akip nadingin Sagaing Taizintha Phuanphiuzi Teikpan
Sangpi ah kemin sinsak hi. Kawlgam sungah Kawl, Shan, Karen, Mon, Zomi
(Chin), Kayah, Kachin, Rakhine mite kigawmin ateng khawm ihi hi. Gam
khatah i ten hangin i pau, i lai, i ngeina, i biakna leh silh zia ten
ziate kibang het lo hi.

Ngeina hoih in mite pilsak, navaksakin thukhualsak hi. Pasian leh kim
le pam tawh hong kilemsak hi. Gtn. Zomite in zi neih pasal neihna
thupisak mahmah i hih manin zi kima lo, kilaih themthum lo hi. Zo
ngeina hoih nupa kizopna thupisak i hih manin nupa kikhen zong tam lo
hi hang. Tua in nuntakna ah thumanna leh cihtakna hong neisak hi. Ngal
ha paaksa tum kik lo, ci-in aciampeel nuam lote, thuciam kamciamna
thute ah zong amuanhuai minamte ihi hi.

Kawlgam tangthu ah galkap Zomi galkap tampi in anuntakna uh pia-in
Kawlgam na hu uh hi. Zuau phuakin kamciam a peel pahpah khut tung
lumleh abang mite aneumuh mahmah minamte ihi hi. Hausa upa makaite in
meigong tagahte, pemtate leh mipoite hehpihin itna leh thukhualna tawh
akimakaih minamte ihi hi. Amau’ angsung vaite sangin midangte’ adingin
hun leh nuntakna azang zaw minamte ihi hi. Zo ngeina tampite pen Lai
Siangtho tawh akituak tam mahmah hi. Zo ngeina ahih nak leh lawki vai
sa kha ihih manin tampi tak mansuah dek ta hi hang.

Zo ngeina kepna, zunna leh zatna ah i thanem khak ding nakpi-in patauh
huai ka sa hi. Zo ngeina hoihte pawlkhat nusia ihih manin Pasian leh
kim le pam tawh kilem zah dingin kilem zo lo dekdek hi hang. Zomite
sungah minam itna leh veina, thumanna leh cihtakna akiam tawh hong
kibatna pen Zo ngeina hoih tampi i nusiat man ahi hi. Tua ahih manin
Zo ngeina hoihte kemin puahin zunin pibawl le hang i gam i minam kikep
kihuaina leh kalsuannate ah thupha hong hi ding hi.
----------------------------------------------------------

Lungdam,

Rev. Thang Van Lian
Tedim Post Editor
 


Comments




Leave a Reply