WWW.TUNGZANGNEWS.COM

 
Picture
Zomi Kipawlna: UN ECOSOC Lutna Thu
Zomi Kipawlna: UN ECOSOC Lutna Thu


Thumapi: United Nations Economic and Social Council (UN ECOSOC) sung ah Zomi Innkuan Kipawlna in July 14, 2014 ni in Non-Governmental Organization (NGO), Civil Society khat hihna toh“Consultative Status” dinmun ngahta ahihman in Leitung buppi huap a Zomi khempeuh sunglaitang mahmah in UN Khawmpi tuamtuam ah tatsat lou in UN Daan toh kituak in kum li (4) sung Palai sawlthei gige diing ahita hi. Kum li (4) abeichiang a, Zomi Innkuan USA in UNO ah ‘Activities Report’ apelut diing a, hiai kum li hunsung a anasep silbawlte lungtunhuai ahihleh kum li (4) dang ‘Consultative Status’dinmun pen behlap zel diing ahi hi.

August 1, 2014 ni a Executive Committee Press Released, Official thusuak; Pa Go Sawm Khup, President, Zomi Innkuan USA, Pa Do Khan Khup, General Secretary, Zomi Innkuan USA akipan “Thupulakna” abawl uh dungzui in “UN Conference” tuamtuam ah kumteng in kihelsuak theiden diing chihna hita hi. UN Main Bodies nga om hi: (1) General Assembly, (2) Security Council, (3) Economic and Social Council, (4) Trusteeship Council, & (5) International Court of Justice ahi hi. Tuate lak a khat, “Economic and Social Council” sung ah Issues tuamtuam genkhawm diing a Khawmpi ah Zomi Innkuan USA in Palai sawl in tangtak a thukup bawlthei diing in dinmun saang huntawk, “Consultative Status” angah ahita hi: (1) Indigenous Issues & (2) Civil Society Issuestuamtuam gelkhawm diing leh thukup bawltheihna dinmun, Observer lel hi lou in, ‘Consultative Status’ dinmun ngah in kihelthei vek diing hi.

UN ECOSOC sung ah United Nations Peoples’ Forum on Indigenous Issues (UNPFII) kichi zong om hi. Hiai pen ahihleh Indigenous Issues toh kisai liuliau genkhawmna Forum ahihman in Issues dangte ah ngaihdan kuptheihna hun ngah lou in ‘Observer’ hihna toh UN Khawmpi siim thei lel diing chihna ahi. UNPFII nuai ah ZORO in Member hihna angah akipan tunitan UN Conference ah Palai kumteng a sawl in ana kiheltou nilouh uhi. Himahleh, tunitan in “Consultative Status” dinmun bel ngah zou nai lou hi.

Zomi Innkuan USA Kipawlna pen US gamsung a om Zomi taangpi-taangtate, khua-le-tui ‘Community Organization’ khat hi a; 2005 kum a kiphut ahi hi. Kum 2009 in USA Sorkar theihpihna ngah in kipawlna piching khat a chiamteh in om hi. Kum 2010 in UN ECOSOC nuai ah Civil Society khat hihna toh ‘Observer Status’ dinmun ana ngah hi. ‘Consultative Status’ a ngahtheihna diing in kum 2012 a Zomi Innkuan USA in Kumsim Khawmpi aneihna ah makaipite leh mipite’n hanchiam diing in khensatna leh thupukna aneih uh dungzui in kalsuan touden uhi. United Nations E/2014/32 (Part II) Economic and Social Council thusuak: Report of the Committee on Non-Governmental Organization on its 2014 Resumed Session, (New York, 19 – 28, May and 06, June 2014) laimai peek 10 & 40-na ah “Consultative Status” dinmun angahna agelhthoh in, Zomi Innkuan USA min zong tuang velvol maimah hi. Ref: https://groups.google.com/forum/#!forum/zomi-innkuan-okc UN Conference ah Zomi Makaite Kihel:

A 65th veina UN DPI/NGO Conference pen UN Headquarters, Trusteeship Council Chamber (Conference Building), New York, USA ah August 27 – 29, 2014 ni thum sung Khawmpi neih in om a, gam 117, NGO 900 pan Tangmi (Representative) 4,000 val, kihelthei uhi. Tua sung ah Zomi Innkuan USA zong Civil Society khat ahih toh kiton in UN ECOSOC Consultative Status dinmun ngah ahihna toh Taangmi (Representative) diing in Pu Go Sawm Khup, President, ZIUSA; Pu Do Khan Khup, Gen. Secy., ZIUSA; Rev. Pau Khan Khai, Exe. Committee sung pan makai avek a gawm in palai 30 vel kihelthei uhi. Tua baan ah, Kawlgam akipan Pu Gin Kam Lian, Gen. Secy., Zomi Congress for Democracy; Siamah Esther Cingsan zong va kihelthei uh chih thu kiza hi.

Hiai, UN DPI/NGO Conference ah Mr. Ban Ki-Moon, UN General Secretary in Middle East lam a akhualzin laitak ahihman in, Video message pan khawmpi honna leh vaidawnna nei a, H. E. Mr. John W. Ashe, President of the 68th session of the General Assembly in zong thugenna hun sau lou nei hi. Tua baan ah, Ms. Samantha Power (Permanent Representative of the United States of America to the United Nations) in zong tutung Meeting a kihel NGO bangzah pha chihte leh lungdam thu tuamtuam pulakna nei hi. Tutung UN DPI/UNO Conference ah “2015 and Beyond” chih thubulphuh a nei in, hong tung diing, kum 2015 akipan leitung Khua-hun Kikhelna (Climate Change) bangchi kep diing, chihte leh zawnna (Proverty) bangci kiamsak diing, Mihing suahtakna ahihke’h zalenna (Human Rights) chih thute kikuppi in nei uhi.

Tua ahihman in tutung UN DPI/UNO Meeting ah Zomite zong UN ah thu kuppih (Consultative) khat hihna angah toh kiton in, tangmi (Representative) khat in kihelthei  taktakta ahihman in, mai lam Zogam leh Zomite maban puah leh zuun zia diing muhna leh hanchiamna thak kineithei semsem diing chih lametna toh thungetna hisak chiat le’ng deihhuai petmah hi. Abeisa hunte ah Zomite UN Khawmpi ah vakihel thei chih gen louh UN Zumpi nangawn amu kha lou mi-nam i hi a, tu petpet in ahihleh Pasian in namdangte toh kikim in hong lamtouta ahihman in Toupa min kiphat semsemta hen... Toupa aw, Zomite hong makaih in!  ( Ref: UN Live Webcast & Pu Do Khan Khup... Source: Translated by Tongsan Media Group)

Thukhupna:

Leitung buppi huap a Zomi Kipawlna tuamtuam hunkhop om ahihna ah, mailam hun ah Zomi Innkuan USA malakna thupi leh chiamteh thamching ahihna ah, India leh Myanmar gamsung a Zomi Kipawlna min tuamtuam ana om mahleh, a mi pen kibang, Zomi ngen kihi ahihman in mapangkhawm a, kalsuan zia ah pilvangtak a Zosuante in tuibang gawmna diing gelsiam kiphamoh mahmah diing in uphuai hi.

India State tuamtuam a om Zomi, Kuki, Hmar; Myanmar a om Zomi, Chin & Kachin; Mizoram a om Hmar, Mizo, Zomi, pau-le-ham tuamtuam azang mi kikhat, Nam khat (One Nation, i.e., Zo Nation) chihte tengteng Zomi hi vek, Zo suan-le-khaakte kihi vek mai chih pen pomsiam kiphamoh mahmah hi. UN Conference a palai kuamahpeuh, Zomi Innkuan USA hi in ZoRO hitaleh, mi tuamtuam in UN Khawmpi hun a thusun neih chiang a, customs & culture kibang, pu-pa tawndan kikhat anei Nam hihna phawk kawm a, unau hihna mangngilh mai lou a, Nam Khat hihna tawisang a mailam hun a nasep-silbawl kong tuamtuam ah “Issue Based” a paikhawm kiphamoh petmah ahihlam phawk gige a, makaipi, palai khat peuhpeuh in mailam saupi muhkholhna toh mipite lung-gulh suahtakna leh UN Declaration, 2007 dungzui a mahni deihtelna neithei diing tandong a kalsuan kisam tawntung diing ahi chih chiamteh tinten hoih mahmah diing hi.

Neek-le-dawn, khosakna toh kisai Zomite kiniam lawlai ahihman in, Socio-Economic Development puahphat kisam mahmah hi. Tua ahihman in, mailam hun ah Zomi Innkuan USA in Leitung buppi huap a Zomite a diing a mohpuakna saangtak nei ahihlam kiphawkden a UN ECOSOC sung a “Consultative Status” dinmun angah pen zat phattuamdan kizilsiam mahmah kul-le-poimoh masa hi peuhmah di’n uphuai hi. USA a om, Zomite baan ah India leh Myanmar gamsung a om, apawpawt zou lou Zomite makaipi dinmun luahtute: Zomi Innkuan USA zahna leh pahtawina i piak toh kiton in lungpi geel a, dinmun niam leh neektaak zonna a haksa diak mi tampitak om lai ahihman in apilpi a khanletna leh masawnna thupitak ahong piankhiat theihna diing in mabang pangkhawm chiat in, mailam hun a kalsuan zia ah kipumkhatna toh Zomi mainawt chi in kihanchiam chiat le’ng i chi ahi. 

By: Dr. R. Sanga (Imphal, India)



 


Comments




Leave a Reply