WWW.TUNGZANGNEWS.COM

 

Leitangnei Zomite leh Ngeina:

Mikim-in I-theih kimciat mahbang-in minam khat hihna akipsak thuguite' lak-ah "Ngeina (Culture)" alianpen ahihi. Hih 'Ngeina' sung-ah abulpi gui 2 omhi:

  •  Paukam (Language: adiak-in accent akici "awkaih/awsuah" akidang kiukiaute khempeuh akigawmkhawm-a akitheikim pau)
  • Khalam/Biaknalam Tawnzia (Spiritual/Religious Practice)
Paukam sung-ah nisim kizoptuahna-a akizangh "aw-tawh kammal akibawl paukhiat kam/kampau" hi-a, tua zom-a, tua kizopna awsuahte kiciantak-a gelhkhiat theih nading "lai awsuah laai", tua lai zangh-a thusinna tuamtuam: setlam, lamlam, khuaklam, pumpi cidamnalam, kiuknalam, thuluan tuamtuam, sahkhua khangkhaan nading siamsinna hiang tuamtuam-in kisin-a, tuate akisinna, akiciaptehna, akisehna, akitehna-in "lai" ahihi.

Paukam-pen suut thuahthuah kuullo sa-in khuaknei khempeuh-in "Zopau" cihteh: awkaih/awsuah tuamtuam: Dim, Saizang, Teizang, Siyang, Losau, Khuano, Paite, Simte, Vaiphei, Zo, Thahdo, Kuki,..... khempeuh Zopau hi-a, Kawl Gamukte' nelhsiahna/zawhkhumna ziak-in Kawlte-in "Zopau" kimlaai, tua paukam anei/apau minam upate dotlohsa-in "Tiddim Chin" hong cihsak uh-a, tuhun-in minam avei tiuteulo Zomi pawlkhat-in zuui uhhi. Tiddim Chin cih kammal-pen 1948 nungsang ciang-a hongpiang hi-a, kumpisaang akah khalo keima' pilehpu, nulehpate mahmah-in azat-uh kiza ngeilo-hi,
banghanghiam cihleh "Zomi leh Zopau leh Zogam" bekmah zanghden uhhi. Keizong ka' pupa' gam-ah suak-in khangkhia kahih man-in ka-tualniam mahmah-a, Tiddim Chin cihpen Kawlpi College ka-kah ciang-a aza-ngei panphiing kahihi. 

Paukam' guipi lianpen ahi "Lai" ahih mahbang-in Zomite inzong minam lianpi ahihna akip nading-a aphuulkhia Pu Pau Cin Hau-in 1899 kum-in "Lai" hong bawlkhia-hi (http://youtu.be/JXh2jimf0Io). Hih-pen Zolai: Zomi-in minam lianpi khat ahihna akipsak khuambulpi khat ahihi. Pu Pau Cin Hau-in koipan, kua-tawh, bangci gelhkhiat cihthu' sang-in "Zomi-in Zolai Nei" cih evidence kician mahmah, akip mahmah khat ahihi. Ahihleh kuateng-in thei/zanghthei? Laipian leh Siangsawn Pawlmite bek-in zanghthei cihciang kithei-hi. Ahang, aziak naakpi-in theihhuai ahihman-in anuai-ah:

Roman Alphabet: 1920 -1938 kikaal American missionary J. H. Cope-in Colonial Spirit mah-tawh English domination bulphuh ahihman-in Zomite' neihsa "Lai (Zolai)"-tawh Lai Siangtho hong letkhiat zomsuak lo-in Matthew Gospel azawhteh "Laimal kicinglo" cih paulap-in nei-in Roman Alphabet-tawh hong khupnelh sukziau-hi. Hih-pen Australia, Canada leh New Zealand diakdiak-ah "Assimilation Policy of the English Colonial Missionaries" ci-a, indigenous (leitangnei) minam khempeuh-in alianpi supna athuak-uh mulkimhuai kibawlsiatna ci-in tuhun-in naakpi-in kisin-hi. Zogam-ah Cope-in colonial lungsim neilo hileh Matthew Laibu agelh khinsa, zomsuak ding-in, Zomite' taangkoko lohsa-in leitung buppi-in hongthei, hongsaang khinzo dinghi.

Roman Alphabet zat ahoihna khat-ah; Type writer leh computer te-ah nuamtak-in kizangh pah thei-a, tua-pen tomkaal (short-term)' ading-a neekpah, zatpah ahihman-in ol-hi. A-ol khempeuh ahoih tawm mahmah-hi. Asiatna-pen: Zolai kinelhsiah pah-a, missionary te' vaangpi mah-in minam hongzo ahihman-in Zolai hong phulaam zolo-hi. Gam thupi mahmah khat hong suksiatsak suak-a, Zomi minam lianpi hihna lah nading-in English Alphabet hongsuak-a, minam sung-a upa makaaite' kihualloh kawmkawm-tawh hong-uk minamte-in "English hilel lomaw?...." ci-a hong thupi simlohna kilawh-hi. Tua baan-ah, English colonialism leh Burmanisation movement te' ziak-in tua "Zolai" -pen I' thupisim hetloh theihtheih nading kituak toto-a, tu-in "Laipian te' lai" kicihsak dinmun ciangdong tungta ahihman-in "Colonialism leh Burmanisation" masuan-pen Zomite-in lawhcingsak cihding-hi.

Zomi khat-in "Zolai" it kuul-a, a-it keileh Zomi hilo cihpen vaannuai thumaan ahihi. Zolai-pen Cope' ziak-in Roman Alphabet akizangh hi-a, tua-zong naakpi-in I-it uhhi (keibang-in it mahmah-ing, naakzat mahmah-ing). Tua tungvuum-ah, Nampi I' Hihna akilangksak tuhun-a Zotual Lai akici Pu Pau Cin Hau' Lai naakpi-in ka' it-hi. Colonialism-in hong nawkkha hikeileh tuhun-in mundang ahikei zong-in Tedim, Tonzaang tengbeek-ah kisin ding-a, computer maaitang-ah munla zihziah ding-a, tu-a FB khawng-a ki chat nungak tangvaalte-in tua lai-tawh ki chat ding himawk-a, ci-in ka' geelgeel-hi. Roman alphabet-pen "English-zong sim haksa kisa nawnlo pah" aci ki-om thei-a, kei' muhna-ah, "Zolai sim bang-a simtheih ciang-tawh akhiatna theikei lehang amawkna mah hilel" cihthu ahihi. Cope mawhsakna hilozaw-in, Zomite' supna, colonialism alawhcinna leh Burmanisation alawhcinna amaute' thahaatna hilo-in a-Zomite mahmah' ziak ahihna asuutnuam kahihi.

Khalam/Biaknalam Tawnzia: Hih-pen Zomi ataangpi Khazihmi (Christian) kisuak phialta-a, ahizong-in "Zomi-in Akip Akho Minam Khat" ahihna akilanghsak-pen Pupa' Tual Biakna ahihi. Khazih' thuluan leh Tualbiakna kikalh ahihman-in Biakna liinlian-ah Tual Biakna nusiat-pen ahidingmah ahihi. Ahizong-in, tua Tual Biakna pan-a agahkhia (pasian biakna ahilo) cialpite, thuciinte, khuahun etna cihte ahizong-in, nulehpa leh tate' kizopna, unau, beh leh phung, sungh leh pu, tú leh maak kizopna cihte khempeuh naakpi-a ahoih, apiicing, kingaknaneilo itna (unconditional love)-tawh kizopna khempeuh Colonialism leh Burmanization-in hong vuknelh-hi. Tua nampi nihte' khut-ah kimawlna ciangtang bang-in Zomite hongki lotsuk, lottoh man-in pupa' ngeinate thupi asading mi naakpi-in kiamsuk-a, I' ngeinate kinusia-hi - hihpen UN' khiatna-tawh hileh genocide (namneu vaatmaaina) ahihi. Atuam paukam, ngeina, biakna azangh mi khat-in tuabang azat zoptoh paisuak loh nading-a thahaatna leh vaangliatna-tawh khaaktanna-pen Namneu Vaatmaaina nam-khat ahihi. Zomi hong kimawlpih nampi nihte siam mahmah uh-a, a-Zomite mahmah hongzangh-in hong vaatmaai dikdek nana hi gige-hi. 

Atung-a pulaaksa AU, CAN, NZ cihte-a leitangnei minamte leuleu-pen Zomite-tawh athuakna kidang mahmah-a, colonist te-in alomlom-a athah, gankhawi bang-a azat, full-blood leh half-blood khen-a innkuan khenkhapsak, akhuatual-uh pan-a notkhia, atate thagum-tawh la-a khawi (Stolen Generation) cihte genzawh loh-in athuak uh-tawh kiton-in aminam itna lungsim-tawh tuni dongmah khitui-tawh suut ngeungeu laai uhhi. Zomite leuleu-pen tuabangliang a-omloh mahbang-in I' minam Identity abei nading, adau nading-in a-Zomi honkhat teekteekmah hongki zatsak se-a, veina taktak, minam itna taktak naakpi-in tawm-hi. Mindeih, sumdeih, thuneihna deih, tutphahdeuh ciangciang khawngbek-tawh kibuai luihluih den-a, Tual Gaal hunlaai longal Hero & Warrior kinei-lo cihtheih khop-in Hero/Warrior daanding-a I' sehsehte keekkeekmah-in a-Zomi mahmah lawhding/kicihding haksa sa-mahmah, eileh-ei' lak-ahbel "Zomi hihang" ci-ngam mahmah, nampi - aKawl aVaai lak-ah Chin mah hidenkei cihciang dinmun-ah akiphah dihdiah minam kihi laai-hi. Hihteng ahih nungsang, tua Tual Biakna hun laaipan-a agahkhia gah hoihte koici gahtheih ngeiding? Ngeina thupisimlo, theizong theilo, atheipen uut bilbel, zanghzong zanglo, asiampen uut bilbel., namdang' lak-ah Zomi I' Hihna pulaak ngamlo, eimi' lak-ah Hero daan, Warrior daan-a huumpi-neelkaai bang-a kiseh zawlaai! Hihte-pen minam it lohna hi-a, tuabang mite keekkeek minam masuan-ah anawngkaaipen mi hithei zawzek den-a, amaute' ziak mah-in I' Pupa' gam abeibei, amangmang ahihi.

Thukhupna: Tuni mahmah ciangdong Zomi-in Zomi ahihna kician tak-in kitelna nei naailo ahihziak-in, namdangte' zawhkhumna nuai-ah Zomi leh Zomi-mah kisual thapaai-in ki-om zeelzuul-a, hi aakisa diakte a-innteek deuh nuam-mah, abul deuh niam-mah, ahihkeileh Ngeina guipite: tumging, lasak, laam, cialpi tuamtuam cihte nangawn theilo, theihzong sawmlo, atheite' genlah saang tuanlo, lakam, paunaak, thuciin cihte-lah theilo, theihzong sawmlo, thupizong salo cihbang-in gilvahna ciang-tawh hi akisa naakpi-in kitam/kikhang sawnsawn ahihna laainat-huai tak-in akimuh man-in "mimal meetna, gilvah tuamna, minthan tuamna, vaangphat tuamna-in I-nei hetkei zong-in Zomi-ah ciahkim phot lehang" cihthu bulphuh-a honggelh kahihi. Atung-a Burmanisation, Colonialism leh Missionary te' hongpuak "minam vaatmaaina" -tawh kisai laibu-in reference kiciantak-leh academic tak-a ka' gelh laitak ahihi. Ahoihte ahoih-a I-muh theihding, asiate asia-a I-muh theihding mihing ngeina-maan hi-a, asia khat ahoih-a muh teeiteei-pen mibanglo cihna ahihi. Abangma-khempeuh ahoih-in mu mawk lehang taangthu kisuut thei ngeilo ding-a, Christianity-zong amawknapi suak dinghi. St. Paul-in "asia nate nana mudah un" acih mahbang-in asia apha theihkuul-a, it dingte it thei-in, muhdah dingte muhdah theihna-in mihing cidam hihna, Khazihmi hihna-zong ahihi. 

Zomi Pasian' Thupha!

Zokhai 
 


Comments




Leave a Reply