WWW.TUNGZANGNEWS.COM

 
Pil Vai Sa Ing

Malaysia ah November 24-28, 2014 ka zin hi. Sangnaupang honkhat tawh hun zang khawm in amaute bangci in Christian nuntakna ah picingsak ding, pattah ding cih khawng ka kikum uh hi. Christian nuntakna gina tak nei a picing taka pattah dan ding a huh ka hi uh hi. An kivak in mun khat ah kigiak khawm a, khuasungah Pasian thu tangko (street evangelism, Street E) zong ka neihpih, pattah uh hi. Ka lungsim hong khoih leh ka en, ka deihngawh pawlkhat kong gelh nuam hi. Eng, deihngawh cih ciangin etteh huai leh etteh pha gamtatna ka muhte a gen nuam ka hi hi. A picinna uh leh a kipattahna uh a hoih ding dan ka en man hi. Zomi te in zong hih bangin i hih ciangin mite mit ah kilawm in mite in a khangto minam in hong mu ding hi cih ka phawk man hi. 

1. An Kicinglo: Zingsang khat pen an a kivaikhak tawm hong kipuak deuh hiam, ahih kei leh annek ankamlim hi ding hiam an hong beih vat mawk hi. Malaysia leh Singapore khawngah mipi annek ding a kivaikhak ciangin a kicinglo cih pen a lamdang, a maizumhuai, a kilawmlo leh ahitheilo thu hi. Ahi zongin upmawh hetloh in hong cinglo vat mawk hi! Anne nailo mi 8 ding khawng omlai hi. Hong pai deudeu in hong kigual uh a, an beita cih gen ding hong nuam mello hi. Genloh phamawhta ahih manin ka gen uh a, themcik na ngak lai un a dang kivaikhak kik in tuzawh minute 15 ciang hong tung ding hi, ka ci uh hi. Tuani zingsang anhawm pen kei mawhpuak hi a, ka lung hong nuam hetlo hi. Anhawm kilaih den napi kei hun sese ciang hih bang hong piang cih pen ka lungnuamlo hi. Ahi zongin ka upmawh hetloh in khangnote in kamkhat zong paulo, phun cih thadah hehmai, lungkimloh mel cih bang melpuam pua kuamah omlo in a theilo, an duhlo bang keek in om thei uh hi. Picin vai kasa a, picing gamtat uh, lungsim kikemzo uh kasa hi. Hizah a pilvang thei khangno om cih ka muh ciang ka ngaihsutna hong sau vak mahmah hi. 

Tan 10 ka sim laiin Tonsim ah mipi annek khopna khat om a, tualpi ah mipi kigual in an kidawh a, eima pakan ciat tawh kine hi. A dawh masa ding, a ngah masa ding bang kituh in kilai phial, kitawng phial in kinawk ngengngang uh hi. An ngahlo om lo napi a dawh kik nuam, nihvei a dawh nuamte bangin a mai vuah mi tam kigual leh 'ka gilkial kik man ding hi, kinawh un' ciin kiko vava thei mawk uh hi. Ciamnuih hilo, heh phial maha awsang tawh kiko uh ahih manin hong 'khantoh loh vai' pian hi. Khantoh loh vai cih ciangin lungduai zolo, lungsim picing zolo deuh cihna hi. 

Banghang in mihing in i deih i duh i ngah pahpah loh ciangin kilungduai zolo hiam cih pen lungsim thuk sinna neite in a genna ah eima lungsim i kidek zawhloh man hi, ci uh hi. Kidek zolo cih pen ngaihsutna tom nei cih na hi a, a huam kim in ngaihsutna neilo cihna zong ahi hi. A huam kim in ngaihsutna cih ciangin mihing a kibanglo vive i hih na ah midangte lungsim ding, midang te ngaihsut ding bang hiam cih theihpih, muhpih, ngaihsutpih cih pen a kisam thu hong hita hi. Tua pen lungsim manlang leh pilna sang sinna neih man hilo in mihing khat in a huamkim in ngaihsut siamna gina tak nei maw neilo cih a kilahna ahi hi. Tua ahih manin ka tuah thu a khangnote in amau lungsim kemzo, kidekzo uh, phunlo cih pen -- an hawmte lungsim ah noplohna a om ding behlap khak ding kidawm, an kicinglo pen kamtam leh phun hat thu tawh hong kicing pah dinghilo cih thei, heh mahmah in awnggawp, gensia gawp, hang gawp taleng tua dinmun lian pen kibawlpha pah ding hituanlo cih thei uh hi. A kisam khempeuh a kisaipihte in sem uh a, a kisam vante kaikhawm kik in a hun a tun ciangin hong lem lel ding hi cih tel uh hi. 

An kicinlohna pen amau an ne nunungte gawtna leh bawlsiatna, engbawlna leh simmawhna hilo a, a ne masate deihsak zawkna leh anne masate bek khualna hilo cih thei uh hi. Hih bang thu pen a om thei mah hi a, kua peuh tungah tung thei in amau bek a kithuaksak hi cih om tuanlo ahihna tel uh hi. Naupang, khangno kum 14-18 kikal khawng dingte in hih banga lungsim picingtak, Zomi te in 'papi lungsim, nupi lungsim' i cih lungsim pua thei uh cih pen a lamdang leh a etteh huai, a en huai, a deih huai lungsim puakzia ahi hi. 

2. Lup Hun Nai 11pm: Zan lup hun, mei suhmit hun pen zan nai 11 hi a, tua zawh ciang mi khempeuh ihmu pah in daipah khip khep cih hituanlo hi. Ahi zongin zan nai 11 a sat ding ciangin khangnote in a lupna uh bawl in, a delhphah uh phah in a lum lian thei dingin kithawi khin uh a, a holim in ging ngaih mahmah veve hi. Ahi zongin zan nai 11 hong sat lian leh mi khat peuh in 'lup hunta' ciin gen ziau a, meivak suhmitna tawh a kinai penin meivak sumit lian in amau lupna ding mun tek zuanpah uh hi. Hilh hilh, sawlsawl, gengen kullo uh hi. Tua banga tuam hilh a om khak ding zong a ut uh hivetlo cih kilangpah hi. A hun kiciangtansa om a, a hun cingta ahih manin makaite gelsa pen zuih ding hiziau hi. 

1993 kum ahi tam maw, Lamka ah Bethany Christian College ah Camping kinei a, kei zong ka lawmte zuiin ka kihel hi. Zan lup hun ding ciangin Camp Makaipa in lup hunta ciin hong gen khit ciang dak hong sat ging a, mei sumit hi. Ahi zongin thakhat in mite hong awng ziaizuai in 'ka lupna ka bawl khin nai kei mei tawm hong vak laiun' cih bang peuh tawh hong ging ngeingai hi. A dangte in zong amau hih nop khat, amau kiman nailohna hong tangko in meivak lai dingin hong ngen uh hi. Mei a kivakkik ahihloh hangin tua hun cin cianga makaite na hih pen a phatuamlo lama lehkaih kik sawm teitei nopna lungsim a lamdang, a khangto laitak minam, society i hi cih a kilatna ahi hi. 

Hih Malaysia ah Chinese khangnote in amau dinmun thei a, makaite dinmun thei a, amau ngaihsutna leh makaite ngaihsutna ah tua bang hi ding cih mukhol thei uh hi cih kilang hi. Makaite zahtak cih pen makaite zahtak a kulna om hi cih a theih uh ciangin a zahtak uh hi a, a mawk zahtak uh hi tuan samlo hi. Amau zong makai ahih loh lam uh leh makaite zong amau mah banga hun khat lai khangno, naupang ahi uh cih tel mahmah uh cihna hi. Makaite in a kam uh tawh a gen uh pen 'hih un' ci a gen kikkik kullo in a bil vuah khatvei za peuh le uh zui hamtang ding hanciam uh hi. Makaite thusimlo leh neumuh, simmawh bawl, zahtak bawllo cih khawng omlo himai hi. A dik hetlo in a sep uh leh bel zahtak deklo, gen ngam mahmah kik lel uh hi. A hangsanna uh pen thudik gupna, thuman genna, a hi bang lianlian a kalsuanna in zang thei uh hi. 

3. Amau pau thei sitset uh: Malaysia Chinese khangnote in a tenna gam uh Malaysia pau thei khinlo uh hi. A kisam khuasung vakna, khualzinna, annekna ding ciang bel thei lel uh a, ahi zongin a tampi theilo uh hi. Haivai si e cihnop huai phial hi. A taktak in a pilvai mahmah na hizaw hi. Banghang hiam cih leh amau' amau pau Chinese ahih kei leh Mandarin pen hoihtak, gina takin thei sitset uh hi. Pau thei, gelh thei, sim thei uh hi. Tua manin a pau uh, a minam uh, a ngeina uh mangthanglo in kembit uh hi. India gam Kolkatta leh Shillong khawngah zong Chinese hon khat kum tampi, khang tampi om uh a, a pau uh leh a ngeina uh cihte khawng kem tinten lai mawk uh hi. 

Amau pau bek a theih uh pen a dangte a simmawhna maw, a thusimlohna maw, amau bek a kiliatsakna uh maw cih lam hilo in amau minam a kep bitna uh leh a minam hihna uh a angtanna uh ahi hi. Zomi te adingin hih vai ah zong etteh tak kasa a, i mipilte in Zomi te zong China gamke khat Mongolia pan kipan hiding hi hang a cih uh pen a hi takpi mah ahi tam cih nop hong huai semsem hi. 

4. Liangko kikim in om siam uh: A nu leh pa pattah siamna ahi diam, ahih kei leh a sangkahna uh pan a kipattahna uh hi ding hiam, ahih kei leh a minam sung vuah a kipattahna uh hiding hiam, a biakna uh pan a theih uh hi ding hiam thei kei ing, liangko kikim in om siam uh hi. Liangko kikim in omsiam ka cih ciangin kuamah a kiliansak, a kineusak, a kisimmawh, leh a kitung et cih bang omlo in a kikim vive in kimu thei, kikhol thei uh hi. Mihingte pen a kikim in kuamah omlo hi hang. A hauzaw deuh om hi hang. A pilzaw deuh om hi hang. A teizaw leh a khuamu zaw deuh zong om hi hang. Melhoihna leh hihtheih, septheih zong kibanglo hi. Ahi zongin a khangto nailo minam sung leh mite lak ah ahithei zaw deuh om leh a dangte tungah kiliansak nuam, kiphasak nuam thei uh hi. Tua bang kiliatsakna tutung ka khualzinna vuah omlo hi. 

Pawlkhat pen a nu leh pate in BMW Car tawh hong kha a, pawlkhat pen Mercedes Benz Car tawh hong kikha a, pawlkhat pen car ngeina tawh hong kikha uh hi. Pawlkhat leuleu pen Bus in a honpi in hong kha a, pawlkhat pen amau neih sun bicycle khawng tawh hong pai uh hi. Pawlkhat in tuate zong neilo in khe tawh hong kuan uh a, a mun ah giaksuak zong tampi om hi. Ahi zongin a kikholhna vuah a haute tate in zong a hauhna uh suanglo, kiphatsakpihlo in a lawmte tawh a kibangin hihkhawm tek uh hi. Kiliansak in gamtalo uh hi. Annek zong a kibang ne uh a, mihaute tate bang inn ah a limzaw nek ding a bawl ding tawh om ding hinapi mipi tawh kibangin ne liailiai uh hi. A nu leh pate in a tuamin bawlsak tuanlo, ngek bawl tuanlo in leitung nuntakna a theih ding uh a deih ahih ding ka um tinten hi. Mun pawlkhat hileh 'hih mipi annek khawng ken ne nuam keng, ne thei kei ing' a ci ding uh hi. Mi bek bang ne, mi silh bang mah silh lel, mi omdan leh mite hih khempeuh hih lel uh a, etlawm in thupi a, etteh tak mahmah hi. 

5. Tate Pattahna Thupisak uh hiding: Ka lungsim a hong suak thu lian mahmah khat pen a nu leh pate in a tate uh a pattahna uh hoih mahmah hiding hi cih hi. A hoih a hoihlo zong thutuam in thupisak uh hi ding hi, ka ci hi. Banghang hiam cih leh tano nei khat om hi. A tano pen midangte in a mawk hopih ding, a noh ding deih khollo hi. A kilawm, a gina in a ta mite in a hopih hiam cih en sitset uh hi. A khangto nailo minam sungah hileh a neizaw deuhte tate mipi in kizahtak bawl in bangmah kicih ngamlo a, ki maiet zaw phial hi. A zawngte tate khawng pen simmawh bawl in ciamnuih bawlna, engbawlna leh zawhthawhna tawh a kibawl thei hi. Mihing khat ahihna zahtaksak ding cih hilo in a nu leh pa hauhna leh liatna vang teng khawng tawh kitungnung koih pian mawk hi. A khangto minam leh a khangto gam ah tua bang omlo in mi khempeuh liangko kikima nungta thei ding in kipattah uh hi. 

Hih thu ah a nu leh pa in a tate uh pattah siam kasa hi. A haute lah siam, a pilte lah siam, a zawngte in lah siam sem kasa hi. 

Hih bang gamtatna khempeuh ka ngaihsut, ka muh ciang ka eng a, hampha kasa a, kei minam sungah zong gina takin hong om in hong vaitham leh ka deih mahmah hi. I biak Pasian in hong kem dinga Zomite zong gual tawh tan bang kim dingin hong siam ding hi. Tua dingin nang leh kei in tavuan i nei hi. Minam dangte a neu tung uh pan a gamtat uh pilvai a, Zomi te zong a khanghamte bek hilo in i khangno leh naupangte gamtat hong pilvai mahmah ta hi. I vekpi in a khangto minamte tawh liangko kikim in laitual i lenkhopna leitung hong nuam semsem hi. 

Hau Za Cin

Phuitong Liim

www.hauzacin.blogspot.com
 


Comments

A very interesting and beneficial topic has discussed here and we will easily inspire by that discussion. But still need to research about this topic more and make a better flow of knowledge to share with others because this is really important.

Reply



Leave a Reply