WWW.TUNGZANGNEWS.COM

 
Zomi Census Conference (24.01.2014)

RevThawng Do Thang phalna tawh Galilee AG Biakinnpi ah (Kawlpi)  2014 Jan, 24th ni in Zomi a deih khempeuh Conference kinei a ZCD Party ten hong makaih uh hi. ZCD Party te hanciamna tawh Meeting pai ding khempeuh sapna lai a bawngbawng, khua leh pawlpi khempeuh ah mi sam khol uh a, mi 600 val pai thei uh hi. A pai khempeuh nibup in ZCD pan Pu Do Cin Thang leh PuKhen Za Cin in nek leh dawn hong vaak uh hi. Amau tegel pen ZCD te huhna tawh galkaapte khumcipna sungpan hong suakta uh ahihi.

Zingsang nai 9 hong sat lian ciangin ZCD makai tengin Pulpit tung hong luah pah uh a, thungetna tawh hun kipan pah hi. Pu Gin Khan Pau in Chairman sem in, thukong hon thugenna ah hibangin thu hong gen hi: Hih Meeting pen ZCD te makaihna ahih hangin Party vai  hi peuhmah lo hi. National vai ahihna tawh kizuiin hih Meeting pen GZA leh ZYA ten hong makaih leh a kilawm zaw ahihi. Hih thu kuamah in don lo, thei lo ahihman in  ZCD President Pu Cin Sian Thang thu muhna tawh gen loh a phamawh thu teng a gen dingin Pulpit hong luah pak ka hi uh hi cih tawh thukong hong hon khit ciangin ZCD Chairman Pu Gin Kam Lian hong dingto in GZA thuvaikhak laidalpi “Mai ah hong tung ding Census vai tawh kisaiin Zomi ah kigawm photphot ni” cih thu hong sim khia hi. Tua khit ciangin hibangin thu hong gen leuleu hiUte naute aw GZA te hong thu vaikhak mah bangin hih Meeting pen Party vai hi peuhmah lo hi. Minampi vai ahihman in adiak in Pastorte tawh kisai zaw deuh in ken ka um hi. ZCD makaite leh Kumpi thunei U khin Yi tawh kimu khin in, Census vaisaipa hong thugen teng Zomi te tungah hong zasak masa khol bek lel ka hi uh hi. Asep abawl ding teng bel Zomi a kici khempeuh in ih sep khop ding thu ahihi ci-in thu hong gen hi.

Azom ah ZCD President Pu Cin Sian Thang in hibangin thugenna hong neito leuleu hi.“Zomi ka deih luat manin thong tampi vei ka kiat lawh banah ka zawn lawh dikdek hi. Ulehnaute aw Zomi kei bek ka hi kei a, no teng akipan mi tampi tak ih hihman in ih vekpi in ih sep khop loh a phamawh thu ahihi cih thu a gen dingin hatlo pipi mahin hong pai tentan ka hihi. Zomi deih peuh lehang ZCD Party ah Mee (Vote) nong pia kei uh zongin kei ka lungkim in ka lungdam veve ding hi. Zomi National vai pua khawm tek dingin hong cial leh hong zawn ka hihi” ciin tomkim takin thu hong gen hi. Hih thu teng hong kigen khit ciangin thu kidotna leh thu kidawnna tawh tawmvei sung kizom to hi. Sun an nek khit ciangin Dotna leh Dawnna hun kizom kik in nitaaklam nai 4 ciangin Meeting kihial bawl hi. Hih Meeting ah  kumpi lampan leh a pualam pan thukan mi 10 hong kihel uh hi.  Nitaak nai 4 hun mah in Nipidaw ah eilam pan gen khiat ding a thupi deuh teng kipuak thei pah hi. Tuaban ah tuani mah in Zomi Census Committee (ZCC) zong bung leh bengin kibawl pah in Committee a tamzaw khamtung lam Tedim+Cikha+Tonzang Myonee teng vaan dingin kiseh pah a, a dang teng zang dung  Kawlpi +Tamu kuam tengah a vaak dingin kiseh hi. Sakhankyi pan Bohkaan dong Rev. Go Za Suum leh Dr. Kham Suan Mung in tavuan ka la pah uh hi.

Meeting man ding ciangin hong kikhawm mipite thukimna kila in, 90% in Zomi ah thukimna bawl uh hi. Minam itna hanga Biakinn hong zangsak Rev.Thawng Do Thang tung leh Pasian tungah lungdam koh thungetna tawh nuam takin Meeting kizo thei hi.

Note: Unau Zote sungpan mi 10 sapna lai akipia lakah mi 7 hong kihel thei lo uh hi. Pu Khat Cin Thang, Dr. Kham Suan Mung leh Rev. Go Za Suum (kei) ka kihel uh hi.

2014 Zomi Census Conference ---------- Rev. Go Za Suum la tap:

1.   a) Simgam maalgam Zogam lei pan Zosuan tate, sinlung kaitui bang zawlna Zomi ci vai e.

b) Zomi ci peuh tui bang luang khawm Zolei tang bang damna ding hi e, lia leh tangte’n pak bang tawi vai e.

2. a) Tuan a pupa’n cinthu lel e khul a pianna Cimnuai ulehnau Zomi vontawite ih hi mel e,

   b) Zomi cileng sawt lo taikhua val ding a, Zogam ni bang taang sawn ding aw e.

(Zomi Census Conference sunga mipilte thugen tomno teng leh Dotna Dawnna teng zong a sawt lo in hong suak kik ding hi.)

Lai at: 

Rev. Go Za Suum. 

Ph. 010 2733 438.

 Email: amosgo10@gmail.com

 


Comments

Accidents are mostly take place on the roads but there are many other types of accidents. To know the reasons behind different types of accidents and the reality of accidents we can read this blog till end. so that this blog is important by all the means and communications.

Reply
07/31/2017 07:32

Liberal! this post is about the melodic show so those necessities to go in this show they purchase the tickets from this page and should go in light of the way that this stadium are immense and puzzling for the pleasure you do the wide that you offer this news to us.

Reply



Leave a Reply