WWW.TUNGZANGNEWS.COM

 
Innlam - Tedim

I hamsat, i zawn i ngau, i gilkial, i dangtaak i thuum i tau nate Topa in ong za ahihman in, innlam Zogam ah kumpi sung aa nasemte khasum khan ban ah Kawlzangte sang azahnih (double) ngah uh ahihman in inn lam ah sum ong tamtuam mahmah, nuntakna ong kol tuam mahmah aa, hihbang lamdangtak aa ong vaihawmsak Topa tung lungdam koh niloh ding, lungdam koh mangngilh hetloh ding ahihi.

Hih khasum double ngah na hangin:

1. Biakinn, Pawlpi khempeuh ah sehsuah khang tuampah takpi ahihman in, sehsuah piak citak ihihlam kimu theihi. Tedim aa Pawlpi liante ah sehsuah bebek thein 1000 val to pah zihziah ahihman in, gammial nasepna taangzai tuam mahmah in ka umhi.

2. Niangtuisai, ansai, sumbuuksai, sasai, singgah theipuam zuakte bek in zong van khawng tuam uhhi.

3. Lungdambawl phalbi do nading puanlum athaklai second hand hoih nono atawmman tawh ong kizuak sawnsawn ahihman in, lamdungteng (leivuilak mah ah) ah puanlum nam tuamtuam kilei, kizuak zihziahhi. Phalbi do ong nuam zawdeuh hipahhi.

4. Tedim khuapi sung bang ah innthak tampi kilam ahihman in GZA Khawmpi 2014 ii Lungtup, kum 2020 ma peuhmah aa inn hoih 500 peuhmah lamzawh nading icih ii 20% bang 2014 sungin kipan khin dingin kamuhi. Tulian bangin gamdangmite zin tun theih nading innpi lian mahmah 3 bang kilam aa ong mankhin leh khuasung lawm tuam mahmah dinghi.

5. Khasum khanbek hilo kumpi sung pan nasep (adiakdiak lampi ziik) tampi ong om ahihman in sepding neilo aa mimawk vaak ki om nawnlo zahphial hi aa, nitha tawh nikhat ninih sung cialpak ding mi ngahhak mahmah tahi. Nasep kinei kim cihding ahihi.

6. Kumpi sung nasep hoih ahihman in nidang aa a ki eng mahmah NGO aa semte nangawn kumpi nasep semnuam zawta uhhi.

7. Hihtawh kizui in, nidang aa sangnaupang kahnuam atam mahmah Laisiangtho sangte ah sang kahmel om nuam nawnlo in, abeisa 2014 bang Falam aa nidang aa ZTC icih Lst sangpi bang B.Th kum khatna kah kuamah om nawnlo zah ahihi. Akah teiteite pen a uuk takpi hipah ahihman in genhak nawnlo uh hihtuakhi.

8. Sumthalawhna tam, sum ong tam ahihman in, alungdam huai mahmah khat in Tedim ah guta om nawnlo, zuau khem om nawnlo, sum mawk nget om nawnlo cihphial ding ong hiziauhi. Nidangin i beel i kuang khat nitaak inn sung tum mangngilh lehang mangpha khaaksa, zingsang teh kimu kik nawnlo hitaleh, tu'n tuaci nawnlohi. I hamsat luatman hikei leh, Zomite i cihtak, kuhkalna bei nailo cih kilang kasa aa lungdam huai deuhdeuh kasahi. (Ygn khawng hilo Zogam bek genna ahihi)

9. Zogam ah Zomite tangthu kilaihta hi. Abeisa in gamdang mi, Biakna nasemte ong zin in i Pawlpi ah ong kikhawm hileh, ong sumpi khiat leh love gift tawm ong piak uh tawh kum khat bang kinaak theituam hitaleh, tu in gamdang mite lamsap sikh, sunsiah kitun dinmun hitahi. Tangthu kilumlet ahihi. CMBC in Sangmang Nelson ong tunzawh kum 75 cinna pawipi bawl uh aa tua pawipi ah Nelson suan leh khaak 4 leh a makaih ding khat USA gam pan lamsap sikh, sunsiah kiguat beh zo lai ahihman in Zogam, Zomite tangthu kilaih a cingam kahihi.

10. Kumpi nasem te'n a nasep na ah thu aneih khaakding kilau ciatta, khasum kikhamlel ahihman in golhguuk cihluat om nawnlo ziauhi. Golhguuk a lam en tanghtangh teng pen a zalian lam ahauhsawm tengbek hipiantahi.

11. Lungdam huai leh cidam, daupai, lungkim huai kasak mahmah khat in Tedim ah Saturday sim in nupi(numei) antan thunget om aa, tua mun ah Pawlpi deidan omlo in numei teng in antan thunget neikhawm uhhi. Hih in i gam i lei, i minam cidam sak mahmah ding Topa maipha ong musak mahmah dingin ka umhi. Papi (pasal), Khangno teleh adiakdiak i Biakna Siateng, i Pawlpi Siateng tukhawm aa Topa maipha ong zong khop ding hun i ngaaklah mahmahhi.

Thunget laiding kisam honkhat kamuhi.

1. Kawlgam khuapi adiakdiak Ygn khawng aa akithehthang i mipihte'n innlam zuankik citak, kuhkal tak aa nuntak ong sawm kik nading uh


2. I gam makai adiakdiak uliante leh i taangmi te'n kumpi in i gam ong puah laitak cihtakna, kuhkalna, thuman thutak tawh ong makaih, na ongsep nading uh kisam lai kasahi. Gtn in 2014 April sung in Tedim khuapi sung Sezang pan Mualtuk dong tar road 18' aa bawlding i MP te'n kumpi tung pan ong ngahkhia uhhi. Gina tak in kibawl hileh khuasung lampi vom dikdek ding hinapi, kigina bawllo ahihman in tu'n khuasung teng leivui kaai kei mawkhi. 
A omsa 12' pan lam nawltuak 3' abehlap nateng uh ginalo ahihman in a selna in leivui vukkik uh aa khua sung lampi aa theihsa leivui a kaai kei ahihi. Hihpen i supna lianpi ahihi. Kumpi ciaptehna ah Tedim khuasung lampi tar road 18' in kiciamteh khin ding aa budget ong kiakik nawn pak hetlo ding hi. Ahihhang ataktak ciang alui 12' nangawn leivui tawh kivuk kik ahihi.

Hihpen tungsiah thuneite, MPte, khuanu khuapa te'n gina tak pulaak huai leh mipi mahmah in thuneite'n deihsakna tawh ong etcik nading uh Thunget huai mai in ka umhi.

Khuasung khatvei vaakphei lehang leivui i lubuuk dim aa kikhu hipahhi.
Kumpi sum tawh nasepna khat peuh ah quality control, a sit vilvel a om ding kisam mahmah kasa hi.

Tua ahihman in golhguukne, tawmvei sung aa hauhding a sawmteng i makai teng, tungsiah thunei teng a ci kahihi.

Tu aa zah ciphotni ei guai.

Hang Khan Lian





-- 

Hang Khan Lian
Block 646#13-115
Jalan Tenaga
Singapore 410646
 


Comments

08/14/2015 08:39

This is a kind of fear that every single girl of this world has. She fears to talk and to work with the unknown people. This is a major problem that is faced by the many of the women from us.

Reply

Whilst various other program code generators utilizes several formulas as well as outstanding web servers, that are effective sufficient to produce Xbox Live totally free codes which are functioning utilizing a number of hash tables.

Reply



Leave a Reply