WWW.TUNGZANGNEWS.COM

 
Kawlgam 2015 Kiteelna' Liimlehvaang Etkholhna 

__________________________________________

Kawlgam 2015 Kiteelna ahun-in hongnaai hiaihiai-a, ahizong-in suahtaakna (freedom), sahkhua thutanna (social justice), lungdeih thusun theihna (freedom of speech), mihing' hihtheihnate (human rights) cihte khempeuh-in kigii nei-in, huamtuam nei-a, huamlohtuam nei laailaai thonghi.

1947 February 12 ni-in Kawlgam Thuneihna leh Vaaihawmna nuai-ah Zogam pumpi kia-a, Zomi palaaiPu Thawng Za Khup-in lim nana kaai-a, Kawlgam huamkhat suakkhopding athukim minamte' palaaite inzong limkaai ciat uhhi (Hihte anua ciang-in Tribal Groups or Ethnic Groups [Thai Yin Tha - Mualmite]hong kici-hi). 1948 January 4 ni-in Kawlte leh Mualmiteng-in British khutnuai pan-inTopenna (independence) ngahkhawm uhhi.

Sat Swe Taik in Gamlutang seem-a, tua nung-ah U Nu-in hongseem leuleu-hi. Mualmi makaai upate' thumuhlohna leh alipkhap-huai Kawl thuneite' namneu nelhsiahna lungsim ziak-in kiukna paizia asialammawh kikheelna lianpi hongpiang-hi. U Nu' sep a-term acin ciang-in Mualmite' makaihna hun ahongtung dingpen laukhol-uh ahihman-in, "Gen. Ne Win-aw, vaaihawmna piangthei nawnkei, thuneihna hong lakhia in" ci-in U Nu-in Ne Win laikhaak-a, 1962 kum-in Revolutionary Council (Thaw Lan Ye Kaung Si)-in thuneihna hong lakhia peetmah-hi.

Mualmite-tawh thukimna UNION akici kipawlkhopna-ah "kipawl" hi nawnlo-in Kawlte' saltaang bang-a Mualmite hongkoih nading-in  Myanmah Susialit Laan Syin Pati ci-in thuneihna leencip Gaalkaap-in 1988 ciangdong hong ukcip-hi. Mualmite-pen Kawlte-tawh Topenna (Independence) ala-khawm kimlaai, topeng peuhmah lo-in, asia-mahmah, akawi mahmah To Thak (new master) khat' khutnuai-ahSaltaang kisuak-hi. Hih saltaanna hun sungteng Kawlte hitaleh Mualmite hitaleh naakpi tak-in khuaknimna (Brainwashing) [T. Zokhai, 2015: Khuaknimsa Zomite sung-ah cingtak kigelh) hongpiang-a, tungsiah maai-et, nuaisiah neu-et paiziapi-in hong vuknelh-hi. Tua thamlo-in, 1988 pan-in kiukna palaang gawp-a, 1990 kum ciang-in Gaalkaap-in Gamuk mun hongluah leuleu-a, amasa' sang-a asiazaw Lungsimlam leh Taksalam Bawlsiatna-tawh Khuaknimna (both psychological and physical brainwashing)-in hong nihthuah-hi.

Hongtungding Kiteelna-ah hong makaihte-pen atung-a khuaknimte leh khuaknimsate (brainwashers and brainwashed) ahihlam phawkding thupi-hi. Gamthukhun (Constitution) pahmalam-zong amau' deihbangbang-a agelh, kuamah awlmawh aneilo, kihtaakzong aneilo, kuamah akhuallo ngiatding-a akipantah, khuaknimsa vive-in hong makaihding ahihi. Aphualpi Ney Pye Daw-ahzong hihbang mite vive-mah amaang ahihi. Mualmite' mun gamlapi khawngpan-in mipi' kheem-a vote ngah nading khawng-a mawkciakciak dingpen ataktak-in Mualmite' ading ahaivaai mahmah khat ahihi. Hih khuaknimsate' makaihna nuai-ah khuaknimsa Mualmi makaai upate tuabang-in kheemna leh zolna azat laaiteng minam' phattuam nading om ngeilo dinghi.

Zomite' adingpen keimah mimal' upmawhthu-ah: 

Gamukte' party tuamtuam Kyiant Khai Ye cbt.... -in bangmah honglawh theilo/zolo dinghi, banghanghiam cihleh khuaknimsate' thuneihna nuai-ah Zomite' ading-in phalammawh khantohna peuhmah hongpia loding-a, abeisa hun-a mahbang-in soklek neunono-tawh hong kheembawl lelding muhsa ahihi. Minam minsel party te-zong tuamah ahihi, vote ngah-in kiteelna-ah lawhcing mahlehzong bangmahpi honghi hanhan hetlo dinghi, banghanghiam cihleh puanluui puanthak-tawh athuap viveahi-uhhi. Khuaknimsa vive hi-a, abeisa-a minam leh kiukna lamsang ideology hitaleh character, behaviour, belief etc akheel mateng akibang ahihi. 

Tua ahihman-in, minam-pen khuaknimna saltaanna (1948 - 2015 kikaal) hunpi sung-a muhzia, saanzia, upzia khempeuh suahkhia-in, gampualam leitung muntuamtuam-a minam tuamtuamte' kalsuanzia, thumuhzia, thuletzia, sepsuahziate ngaih-theih, zaak-theih, sin-theih, zat-theih nading naakpi-a hahkat kisam-hi. Minam-pen party tung-ah ding ngeilo ding-a, party khempeuh-pen minam' tung-ah adinding ahihi: deihna-ah - Political Party khempeuh-in Minam' Hiang hibek ding-a, Party' nuai-ah minam om ngeilo dinghi. Abeisa hunte khempeuh enkiik lehang Party ahihkeileh thuneihna anei pawlte' khutnuai-ah minam leh gam tangciak/awkcip-hi. Hih paizia akilumleh matang minam-in bangmah manh ngeilo ding-a, 2015 Kiteelna-in phattuamna hong piakloh baan-ah To Thak kineih behbehna suakding muhsa ahihi.

Zomite' saltaanna-pen (T. Zokhai, 2015: Khuaknimsa Zomite) laibu sung-ah dawl 4-in aneng-atawng-in kisuut-hi. 

Adawl Khatna - British Colonialism & Japanese Invasion

Adawl Nihna - Movement of Union of Burma 

Adawl Thumna - Revolutionary Council (1962-1988)

Adawl Liina - Military Government (1990 - Current).

Hih Saltaanna hunbi khempeuh sung-ah Zomite (Tribal Groups dangte-zong) bangzah-in hongki nelhsiah, hongki nuhnau, hongki paampaih leltak-hiam cihte ngaihsun lehang Kawl Gamukte-tawh mapankhop laaiteng lungmuanna, khamuanna, bitna, daihna cihte dimtak-a ngahding lampi om vetlo ahihi. Tua hi-a, Zomite' ading-in bangbang party minpua taleh:

·  Angsung khualna' sang-in minam khualna alianzaw thamlo-a, akhualna-pen huihbek-tawh bei thapaai lo-in asepsuah siam mi kisam-hi (khuate-ah development fund 100 ngah-in, ama' ip-ah 50, tungsiah maai-etna 20, nuaisiah kamhukna 20, sepsuahna 10 cihbang azanghte "minam huh-khawng sasa loding cihna ahihi).

·  Tungsiah maai-et lo-in, tungsiah-ah nuaisiahte' kisapte maaitang singhawng belh-a aphuutsak ngam, muhdah athuak-ngam ngalliamte kisam-hi (Zogam-ah huumpineelkaai bang-in hawk lualua-in Yangon or Ney Pye Daw khawng-ah ulian' khatpeuh niikmong, puanteenmong-peuh aleen khuukhuu hiloding cihna ahihi).

·  Om mawkmawk lo-a, hunlehmual zil-a phu-thei, nawt-thei, hawmsem-thei, vaaihawm-thei, mipi' lungdeih kaihkhopsiam kisam-hi (abeisa hun-a kumpi naseem cihte ataangpi om mawkmawk uh-a, lai simsim, maailam geelna gelhgelh, political, economic, social talk cihte nei ngeilo, mipi' lungdeih kaaikhawm ngeilo, thugen sunsunleh pulpit/stage bekbek-ah munla, mipi-tawh kipolhna/kithuahna-pen niamsa, munsaang bek-a om beubau cihte-in minam leh party/pawlpi kizopna kideidan sak-hi, to leh sal dinmun-mah ahihi, akhangto gamte-ah ulian om mawkmawk cihbang omlo-hi, hunngah zil-in mipi-tawh kimu den-in, kilawmta den-hi).

·  Mipi' ading mitsuam-a, gamukte leh mipi akitot akinial lehzong mipi' lam-ah apangngam, mipi' palaai aseem taktak-ngam, mipi' taángmi asuak taktak-ngam kisam-hi (abeisa hun khempeuh-ah mipi leh thuneihte aki-tukalh ciang-in taángmi [ko-za-hlee] daan-a mapang makaai upate-in thuneite, tungsiahte maai-et zawden uh-a, mipi' thusim-khawng puakpuak zawlaai thei-hi, hihbang palaai peuhmah mipi' ading kimanna nei kiuhkeuh lo-in gaal ahihi. Tua ahihman-in mipi' ading-in palaai maantaktak asuak ngamding ngalliam kisam-hi).

Hih ATOM-ah positive nucleus  (makaai upate) leh negative electrons (mipi) hong kihual naakleh 2015 Kiteelna-tawh akisailo, akipaaikaanlo minam lawhcinnate naakpi-in limci zawtham dinghi.
Tu-aciang dinmun-tawh Kawlgam 2015 Kiteelna-pen limci lo lualelding muhsa hi-a, Kiteelna bangbang asuak zong-in Zomi-pen Zomi-mah-a anuntaak, akalsuan kuul mawkding ahihman-in makaai upate ATOM taktak ahihding thupi-hi.
Kiteelna tung-ah Zomi adinleh puuk ding-a, minam tung-ah kiteelna adinleh minam dingtang dinghi. Zomite azuunding Zomite bekmah hi-a, Kawlte-in hongzuun peuhmahloh kum 68 sung kimu, kithuak, kivei-hi. Zomite mah-in minam aphungvuh keileh 2015 Kiteelna-in bangmah phattuamna hong lawhlo ding-a, to kibehlap toto leldinghi. Zomite' Topen nading-in saltaanna pan-a pusuak akisam ahihi. Saltaanna pan-a apaikhia-lo mi peuhmah topeng ngeilo-hi.
Zomi Pasian' Thupha!

Zokhai 

 


Comments

According to my teachers knowledge and information is great wealth therefore i visit many pages in a day and collect information and knowledge about new topics. For this purpose your page is very beneficial for me because here i easily obtain precious points for my important topics.

Reply
09/24/2016 02:17

Religious education is very importance for all the Muslims but unfortunately a large number of people bereft from this education. According to my teachers religious education gives information on every matter and teaches us to be sober and serious during the time of joy and comfort. Religious education consoles us with sweet words and enlightens our mind and soul with nice topics.

Reply



Leave a Reply