WWW.TUNGZANGNEWS.COM

 
Laibu pulakna: ZOMI IN DIASPORA (A Kithehthang Zomite)

Sia Rev. Dr. JM Ngul Khan Pau in a leitung bup ah a kithehthang Zomite Ama' hong piak Lungdamna Thu gen ding i hihna thu a gelhna laibu ZOMI IN DIASPORA cih tu in Zokam tawh i sim theih dingin Rev. Ngul Cin Thang in hong teisak ahih manin nakpi takin siate gel tungah lungdam hang. Hih laibu a pian theih nadingin a kin, a omkhong theilo, a tutmun nangawng pan dingkhia ngam vetlo zah donga hanciam a sem ngitnget Sia Job Thawngno tungah zong nakpi takin lungdam hi. A sem a bawl om taleh sum leh pai kisam zel ahih manin tua dingin a angvan Rev. Dr. Go Chin Zam tungah nakpi lungdam i ko hi. Hih laibu pen tuma kum khat laiin hong suak khin ding ciin a kigen ka zak hiauhiau hinapi tun hong suak thei pan ahih manin laibu bawl baih vetlo ahihna kilang kasa hi. Bangbang hileh a lei, a sim, a ngah kha peuh in hamphat pih ding cih ka um hi. 

ZOMI IN DIASPORA (English) pen July 2012 in kikhen a, ZOMI IN DIASPORA (Zokam) pen October 2013 in kikhen hi. Laibu bawlpa in ZAHTAK PIAKNA ciin "Pastor, mipil leh ka sanggam ahi, Zokam, Mangkam-a la a gelhgelh hong nusia khinsa Rev. Khup Za Go' "Angsung thutheih het lo a Zomi leh Zokam khantoh nading na sepkhiatte, kote leh khang sawnsawnte tungah zaam suksuk ding hi," cih gelh hi. 

Diaspora cih a khiatna pen 'a pupa gam pana pemkhia peuhpeuh genna hi' ci pak ni, a theihbaih dingin. 

Hih laibu pen Sia Paupu in Global Research Institute, Fuller Theological Seminary, USA pan Zomite thu a kanna pan a muh khiatte a gelhna ahi hi. Leitung gam tuamtuam a om Zomi te tung ah hih banga gam tuamtuam ah i tun kawikawina a hang dongin thu a kanna pan a muhkhiatte a gelh ahi hi. Tu laitak gam 35 ah Zomi om hi. Tua gam 35 a om Zomite kiang pan in a dot hamtang dotna khat pen: "Gam tuamtuama hong thehthang Pasian in bang ngimna nei hi ding hiam?" cih hi. Banghang hiam cih leh eite pen, "teeltuam, siampi nam, Pasian neihsa minam, minam siangtho, Pasian mi, khuamial sung panin hong samkhia in khuavak hong tunpih hi," (1 Peter 2:9). 

Siapa thukanna ah tu laitak a gam leh mipi vai tawh kawlgam nusia a taikhiate thu kihel nailo hi. Tuate thu pen ei khangthakte gelh ding, kan dingin hong nusiat lai hi. Hih laibu pen Zomite adingin hih bang lam kigelhna laibu masa suak hi. Banghang hiam cih leh etteh ding cih omlo, hih bang laibu a gelhsa kuamah omlo ahih man hi. Laibu khupna ah a deihna gelh a, tua pen - Pasian in hih banga hong thehthang pen ngimna khat nei a hong thehthang hi, tua ngimna thei in a ngimna i tangtunsak ding i mawhpuak hi ci hi. 

Siapa in a hih kithehthang cih tawh kisai kan masa phot hi. Pasian in minam a bawl ciangin a kampau leh ngeina zong guan a, a tenna ding mun uh zong a sehsa in nei hi. Lai Siangtho sunga kithehthangte thu teng kan dikdek in tua khit ciang leitung thu a kithehthangte tangthu kan leuleu a, tuate khit ciang Zomite thu ah lutto hi. 

A kithehthangte lak ah Pasian nasepna, a kithehthangte Pasian nasem a kizatna cihte suut toto hi. A khangto dinga kithehthangte thu zong hel hi. 

Zomite thu lompi khat a gelh ban ah i kithehthangna a hang lompi khat kigelh hi. I kithehthang ciangin i tuah thu tampi om a tuate zong pawlkhat gelh hi. A gensa mah bangin a mite min gelhlo ahih manin a kua tuah hiam cih kitheilo a nop peuhmah hi. I kipattah hiam, i kihuai hiam, i kim i pam ah haksatna i muhte a noptuamna dingin i sem hiam cihte zong kan hi. 

Gamdang tungte peuhmah in sim ding hi. Gamdang tung dingte in zong sim ding hi. I tuak ding thute kithei dinga, i tuak ciang bangci nawk ding cih zong kithei pah ding hi. 

Hih teng tawh laibu mai lemna khawlbawl ning. A bu na sim ciang ka gen teng sanga tamzaw thu kiphum hi cih na tel ding hi. 

Ka lungdam. 

Bawlphat theih hileh: 

Laimai nuai gual ah: Zomi in Diaspora for World Evangelism cih ding pen Zomi Dispersion for World Evangelization kici kha :(

Hau Za Cin

Phuitong Liim

www.hauzacin.blogspot.com

 


Comments

I saw things that are going around us. It refers to the situation that we face or we may face in our daily routine, or we see in news. I think it is helpful because we may know about many thing with the help of these pictures.

Reply



Leave a Reply