WWW.TUNGZANGNEWS.COM

 
KALAYMYO THUTHANG PAWLKHAT & DAHNA-NOPNA


Dear All,

Tunai Kalaymyo lam thuthang pawlkhat hong hawmsawn kik ing. Ommuan a
phawkkhak teng hi a, a tuamin thu kikan man kim lo ahih manin a kihel
lote theihsiam a ding hi.

DAHNA LEH NOPNA:

Dahna tawh kisai-in tunai teng hih i sanggam teng in hong nusia hi.

1. Pa Pum Za Kam (Kum 75) khualui Kapteel, tulaitak Kalaymyo Sayadaw
veeng ah teeng uh a, Leipi Pawipi ah om hi. Feb.7, 2015 ni-in thaguina
leh sunglam damlohna tawh hong nusia hi. Pa Kam pen palik Sergent
(Rtd.) hi a, Taungzalatt Zodamtui ah zong vaisai khat ahi hi.

2.  Pa Do Sian Lang (Kum 57) Chianthagyi khua, Revd Pau Khan Suan
(G/S, SKVBA) upa in Feb.16, 2015 ni-in hong nusia a, 17 ni-in kivui
hi. Pa Lang pen Pyidawtha siakhak leh Chianthagyi BC te ah upa leh
makai zong a sem kawikawi khat ahih manin KVBC Dept.tuamtuam panin Sia
le siama te'n gal ciat uh hi.

3.  Nu Niang Ngaih Vung (Vungno) kum 42 Tulsa in zong Feb.15, 2015
ni-in hong nusia cih kiza a, dahpihna thu i puak hi. Apa (Awn Za
Thang) leh a nu Pi Dah Cingte pen Saipimual khuasuak hi a, Lamka ah
teeng uh hi.

4.  Pa Nang Sian Mung (Kum 47) khualui Mualnuam-Tahan in zan hal ni'n
hong nusia a, zani-in kivui cih kiza hi.

5.  Pa En Za Dal (Kum 75) Khualui, Saipimual, tulaitak Tahan (CBCM) in
zani, Feb.18, 2015 (AM.10:15) hunin hong nusia hi. A sumlam damlo den
hi a, zanni zingsang pan gimvat a hong nusia pah ahi hi. Pa Dal pen
Galkap pension khat hi a, Saipimual a om lai Hausa sawt veipi a sem
khat ahi hi. Tulaitak a pawlpi CBCM, Tahan ah zong a hatlai-in zumlam
ah hunbit na sawtvei khopmah a sem hi a, mi nunnem leh mi citak mahmah
ahi hi. Ko aa dingin ka tu-laigil khat uh zong ahi hi. Dr.Vum Khan
Khual (ZTS) i a makpa zong ahi hi.

A tapa Tg.Khaitawng pen Minuamsa Video ah hun sawtpi nasem, Video &
Editing a sem khat zong ahi hi. Amah Yangon ah Mopawi sim dingin pai
a,man man lo-in, tuni hong tung to kik ding ahi hi. Pa Dal luang pen
zing teh 20/2/2015 (Friday) 2:00 PM hunin Sihvui hunbawlna om ding a,
Revd Phum Duma in hehnepna hunpi zang ding cih kiza hi.

(Dah-le-kapte' ading thungetna tawh phawkpih ciat ni).

MOPAWI LUNGDAMPIHNA PAWLKHAT:-

1. Pa Thang Khaw Tuan leh Nu Niang Huai (Leitawhtan, Tedim) te' tapa,
Tg.Zam Khan Mung (Mungboih) FL, USA leh Pa Gin Khan Suan
(Saipimual-Kalaymyo) leh (Nu Niang Khaw Ciin) te' tanu neu pen, Lia
Man Khan Niang (Nianglek) Tulsa, (keima naunu) te in Jan.30, 2015
ni-in, Far East Mission Church, Tulsa ah pumkhat suahna nei uh hi.

2.  (Pa Cin Ngaih Thang) leh Nu Thang Ngaih Zen (Saipimual-Tulsa, USA)
te' tapa neu pen, Tg.Nang Lian Sang (Sangpi) (Dr.Do Kham} upa' tapa
neupen leh Revd Sian Za Lian (Lianbawi) khualui Haupi,  Kalay EBC
Pastor leh Nu Dim En Hau te' tanu upen Lia Cing Zam Dim (Zam Dim)
Tulsa te in Feb.14, 2015 ni-in Tualsa ZBCM biakinn ah pumkhat suahna
nei uh hi.

3.  Tg.Mung Tul Sai (Saipi) USA in zong Feb.6, 2015 ni-in Kawlpi ah zi
nei cih kiza hi.

4.  Tg.Nang Sian Cin (Cinpi) Zomi laphuak leh lasa siam pen in zong
Feb.7, 2015 ni-in zinei cih kiza ahih manin pumkhat suak sanggam teng
i lungdampih hi.


AMC, KALAY IN PEARL JUBILEE BAWL:

Agape Ministries Center (AMC) Kalay in pawlpi phuhzawh (kum 30) cinna
leh Revd Daniel Khen (Associate Pastor, AMC) Pasian' nasep zawh kum 30
cinna gawmkhawmin, Feb.13, 2015 (Friday) ni-in bawl uh hi. Pawlpi mi
khempheuh leh pawlpi tuamtuam pan Pasian' nasem honkhat sam uh a,
ankuang umna nei uh hi. Nitak pen Jubilee Service in zang uh hi.

Hih hun sungah Revd Daniel Khen leh Revd Tuan Suan Thang (Senior
Ptr.Phualpi AG) in thugenna nei uh a, Revd Go Za Nang, innteek Siapipa
in hanthotna limcitak nei hi. Lasiam VC Mang leh a tanu in sa a, Lia
CingCing in zong sa a, tha kingah mahmah hi.


VEENG SUNG LAMPITE KULTAL LAMPI TAWH KIBAWL ZIAHZIAH

Kalaymyo khuasung veeng sungah Kattaza, kultal lampi kiphah zihziah ta
hi. Sum bei ahih leh bel Sibin kumpi lampan in a lang hong sik uh a,
eimau a lang kisi ahi hi. Eimau kong lampi ciat, feet khat
Ks.3000-3500 cihbangin kipia tek hi.

Hibang lampi bawl theihna dingin a lunggulhte in veeng hausate'
tungtawnin Lampi Committee phuan uh a, tua pan bullam ah ki ziau to
ahi hi. A siau ma sasa kisepsak ahih manin a thei kha lo, a phawk kha
lote in hibang chance hoih tak a om laitak in bilpil huai kasa hi.
Tuabanah veeng sung ah motor cycle hat hawl luate thudam tawh control
na dingin lampi kho-bo te a pilvaangte in koih ciat ciat uh ahi hi.


ZRDP NASEPNA MAI NAWT TOTO.

H.Vum Nang veina leh hanciamna tawh a kipan ZRDP, Zogam sung Laipi
bawlnate nasiatakin kipan thei ta ahi hi. A beisa in Cikha lam teng
nawt a, tu-in Kawl Dimzang gam panin khamtung lam nawt to sak a, Kumpi
lam leh mihaute JCB in zong deihsak takin panpih hi. Vum Nang ahih keh
Nyipyidaw lokuanna in nei thei ta a, vanleng tawh kileh zialzial ahi
hi. Zomi leh Zomi a it tampite' lakah a biik pawl i theih ciat tek
ahih manin thu-le-la mahmah tawh zong ZRDP nasepna thapiak ciat ni,
cih zong i kizawn hi.


PYIDAWTHA KHUASNG ZONG KULTAL LAMPI KIPAN TA.

Kawlzang Zomite khuapi khat ahi, Pyidawtha khung sung zong khua taw
lampan kipan in kultal lampi bawlbawl ta uh a, SDA biakinn khang, JK
Kam te' inn pam ciang zoto ta uh a, i khantohna khat ahih manin
angtanhuai mahmah ka sa hi. Tuaban ah Pyidawtha khuataw Leipi zong
hoih mahmah ta ahi hi.

G.T.U  KALAY IN SANG ZAWHPAWI KHAAM TA.

Government Technology of University (GTU) in Feb.15, 2015 ni-in sang
zawh pawipi, lukhu-nelkai piakna nei uh hi. Sang zo mi 200 val lakah
Zomi honkhat zong kihel uh hi. Pa Thang Suan Kham (habot Khamtawng) i
tapa, Tg.Thang Sian Lian (Sian Lian) in zong B.Tech.hong ngah a, ka
holim kha uh hi. Hih sang pen i zaksa bangin Exam paper teng kilawn
mang a, a kilunghimawh mahmah pen a dandan hong om kik thei suak a hih
manin sangman i naute teng i lungdam pih hi.

KUMCIN PAWI KIPAWL SAN LAITAK.

Kawlzang leh Zogam ah Kumcinpawl tusung teng amun mun ah kilimbawl
mahmah a, ZCLS in zong March kha bullam ah B.M meeting Nanphalon ah
neih ding geel uh hi.

Pa Kai Mung (Tungzang-Kalaymyo) Shalom te in Motor Manlong hoih
mahmahte khat hong kumthak bullamin hong neih beh hi. Shan Taungtann
line bus tawh kizom uh hi. Ih minam sungah hibang motor te a nei ki om
kawmkawm ta ahi hi. Chin Taungtann line bus ah zong manlong hoih
mahmahte guk bang a taina ah Zomi te a thum bang kihel a, kibeh lai
thei lai kha maitak ahi hi. Hite zong i minam leh khuasung khantohna
khat ahih manin lungdampihna thu i gen hi.

AUSTRALIA AH ZIN.

Australia ah Semninar pia dingin Revd Kham Khen Tual (Associate
Pastor, AMC, Kalay) zong Australia tungkhin ta cih thu kiza hi. Pasian
in a thakin na kithuahpih ta hen.

TAN 10 LAIVUAN DING NAI TA.

March 13, 2015 ni a kipan Kawlgambup Tan sawmte'n Exam na nei ta ding
uh ahih manin thungetna tawh laivuan ding i ta i naute phawk ciat ni.
Maikum a kipan Tan sawm zo cih pen tawn 11 ciang a sin khit teh tan 10
zo hi pan ding cih thuging om zel ahih manin tukum a lai kia te pen a
hamsia tuam hong suak ding ahih manin kipatau sim tek mahmah ahi hi.

Gengen leng hong tam to ding ahih mani hi ciang tawh hialbawl phot ni.
Hih thute tawh kisai ka maan, photo kep khak pawlkhat hong khak ing,
na na etsak pong le uh teh ahi ve. Ka lungdam.

Peter Khampu.






--

Peter Khampu
CMedia, Kalay

"...Na hoih sep ding cimtak kei ni, a hun a tun' ciangin  a gah i at
ding hi" (Gal.6:9).

 


Comments

I visit this page always because i can get beneficent knowledge here for sharing with my students and friends. I will keep visiting here to get more beneficent knowledge here always because me and my students need it.

Reply
05/09/2017 05:24

If you are looking for jobs

Reply
06/13/2017 08:27

New Year is the perfect time for everyone to make a good New Year resolution and stand on that throughout the year

Reply



Leave a Reply