WWW.TUNGZANGNEWS.COM

 
Picture
Singapore ah Kum 67-cinna Zomi Nam Ni Nuamtakin Kibawl

Leitung mun tuamtuam ah a kibawl mah bangin Singapore ah zong Zomi Nam Ni a kum 67-cinna nuamtak in kibawl hi. Mipi kidim zihziah in Zomi lasiamte in Zogam ngaih late sa kelkel uh a, Zolia Zotaang te Zopuan tawh kizem sitset in hong pai diamdiam uh hi. Upate in Zomi leh Zogam maban a gen ban vuah Zomi Nam Ni hong piankhiatna thu limci takin gen thei uh a, mipi kitai in thutheihna tampi kibehlap bek hilo in minam itna zong hong khang hanhan hi. 

Zomi a hong bawl Pasian tung ah lungdamkohna leh minambup adinga thungetna Rev. Thang Suan Kim, Tonzang in hong neihsak a Amen ciin mipi in kithukim diam hi. Zomi, Zogam leh mailam hun khempeuh Pasian deihna bang bek a kalsuan ding ihih ban ah Ama khutsung ngiat ah ki-ap in sep ding a kisam khempeuh Zomi bup in sem in a kisam banga kalsuan dingin kihanciam sawm hi. Tua ahih manin a kumkum in Topa in Zomite hong laptohna kimu in kiciamteh hi. 

Zomi Nam Ni ading kithawikholhna:

Kum simin Theinosih Kha hong tun ciangin Zomi Innkuan Singapore in Zomi Nam Ni adingin vai khempeuh gelna kinei pah a, tukum in zong a kisam dingte ngaihsun in gelna leh vaihawmna kipanpah hi. Zomi sungah laitan zo thak khempeuh (a beisa kum sungin, Zomi Nam Ni leh Zomi Nam Ni kikal a laitan zo thak teng) min kikaikhawm in Pahtawina Laipi kipia hi. Banghang hiam cih leh Zomi leh Zogam hong tawisang in hong lamsang bek thamlo Zomi hih hong angtangsak ngiat uh ahih manin khutbeng a pahtawi bek hilo in laidal ngiat tawh ciamteh in pahtawina a kipia ahi hi. 

Zoliate in Zomi Nam Ni hong tung ding cih a theihsa uh ahih mah bangin a puansilh ding uh, a nikten ding uh, a puanza silh ding uh, a khedap bulh ding uh cih bangin na vaikhak khol khin uh hi. Na vaihawm khin uh a, lawmte a mansa dimdiam in na om phitphet uh hi. Zotaang te zong na omkhong tuanlo a, a puansilh ding uh puan khuidan nam tuamtuam (special design fashion) na bawlsak uh, na vaikhak khin uh hi. Kilawm in siangtho sitset uh a, Vaphual hon singgah bawm bangin pak liatluat in etlawm mahmah uh hi. Zomi Nam Ni zatna innpi sung dimin pak phiupheu in tu diudeu uh a, a mai ah dingin khuadak leng etlawm in mittai ngaungau hi. Zomi hih mah nuam ngaungau ei! 

A mun ding, a hun zat dan ding hungelna, a kisa ding la nam khempeuh ban ah lathak phuak nuam tampite in na phuak khol in a ni hong tun cianga diangkhia lian dingin ama pek pan na kigingkhol khin uh hi. 

Puankhai Ding Hong Pia Uh: 

A ngeina bangin tukum zong Singapore a om Zomi khempeuh leh Malaysia a om Zomi khempeuh in Zomi Nam Ni kizangkhawm kik a, a thupi mahmah in Malaysia khuapi Kuala Lumpur ah kizang masa hi. Ki-am lua mahmah ahih manin ni khat bek kizang utlo a, ni thum sung kizang sitset hi. Zinmang Dr. Go Chin Zam in, "Zomite i minam ni zat ding kilawplua ahih manin ni khat bek zat ding kihawmthawh a, ni thum kizang hi,"  a cih mah bangin nuamtak in Zomi Nam Ni nithum sung kizang hi. Singapore pan in zong mi 14 in va kisim thei in nuam kisa mahmah hi. Ka ciah lam uh ciangin khut guak in hong ciahsak hetlo in Singapore ah ka zat dinguh puankhai a kilawm mahmah hong puasak uh a, ka suan deda ngei uh leh kilawm lua peuhmah in Zolia leh Zotaang te bang maan kila ziahziah in etlawm mahmah hi. Lungdam ung kong it sanggam Zomi :)

Nek ding hong sik:

Zomi Nam Ni kibawl ding cih a theih phet un Lia Lunboih, Lia Zamkhek, Lia Nuampi te in neih man hilo, Zomite hong itna leh hong nekngaih man un ann hong vak nuam ung ci ahih manun LUNGDAMNA LIANPI tawh kisang a, ann limci mahmah gilvah phitphet in kine a kilungdam mahmah hi. Zomi Nam Ni zat kik ding hun bang kingaklah tuam pah hi. Hih banga Zomi hong it, hong huai Zoliate Topa in a zah tampi in thupha pia in hong phungvuhsak kikta hen. A mel uh lah hoih, a thukhualna uh lah nasia in a kisam khempeuh ah sawl kullo a a tai ziahziahte ahi uh hi. Ann bek hilo in singgah bawngnawi sungah diahsa hong dawnsak lai uh in i mel bang hoih pah dandan hi. 

Hunzat nuam mahmah:

Kikhop makaih Dr. Lun leh Lia Nem Lun in mipi mai ah a Zopuan silh uh kilawm tak tawh hong dingin mipite hong kikhutletsak in "Zomi Nam Ni zat nuam" ciin maitai siuseu in vei leh taka teng ka kisawk ngeingai uh hi. Tua khit ciangin Hun Apna thungen Sia Benson Lian in hong nei a, Dr. Hau Za Cin in Zomi Nam Ni hong pianna thu tomno, kicing tak in hong gen a, Zogam ngaihla hoih nono Lia Cingno, Lia Deih Cing, Lia Lam Vung, Lia Uappi, etc te in hong sa ziahziah uh hi. 

Mipi in muhnop a sak penpen ahih leh Zomi Costume Show cih tawh Zopuan silh kilawmte lahna Lia Muangnu leh Lia Lunboih in hong nei uh a, numei 7 leh pasal 7 kitel khia in mipi mai ah a Zopuan silhte uh hong lak ziahziah uh a, nakpi takin kilawp in khut kibeng ziahziah hi. Zonupite in a hoih leh kilawm pen mi nih hong teel khia uh a, Lia Cing Lam Vung leh Tg. Lian Sawm Sing (Singpi) in letsong hoih mahmah zong ngah uh hi. A kihel khempeuh hoih in etlawm mahmah uh hi: Lia Mary Sian, Lia Mansen, Lia Honey Huai, Lia Lunsan, Lia Zonu, Lia Nuampi leh Tg. Thang Khua Dal, Tg. Steven Mung, Tg. Lian Tuang, Tg. Biak  Lian, Tg. Chinkhanlun, Tg. Khup. 

Zomi leh Zogam Lei cih thu kicing takin Pu Hang Khan Lian in hong gen hi. Zogam leh Zolei sungah Zomi te in zingvai i hawm ngeina thute kicing takin hong gen a, leitung hun kikhel hanga hun tuamtuam i tuakte zong hong gen a, tuni in zong i gam leh lei ah i maban omte hong pulak a, mipi kidai dide hi. Bilsik a ngaihsut a khuadak a sep khiat ding tampi hong luikhia hi. Zolia leh Zotaang te in mawhpuakna lianpi i nei hi. 

La kiphuak: 

Zomi Nam Ni a sak dingin la makai, lasam leh khuangtum Pa Langh Suan Mung in la dawngkhat hong phuak khit ciangin, "Kei a bek hun kei veh aw, hong huh dih un," ciin a kikona aw za in a phuak ngeilo pi in kei bang zong dawng nih tak ka behlap sak hi. Pa Pau Khan Khup in zong Bu Zelman phuah hong puak a, la dawng 5 tak sak ding a kinei hong suak a, mipi a kihel khempeuh 150 val in kikawi a lam, khe vei diamdiam in ka sa uh a, a lai ah Upate hong lam keukeu in kilawm mahmah hi. 

Hun lah nuam in mipi kitai mahmah himah leh nitak nai 7 hong naih ciangin mipi in hong domsang Pasian phatna la sa in khut kibeng ziahziah a, Zomi te hong siam, hong huai Pasian kiangah lungdamkohna leh Topa Thupha Piakna tawh Rev. Thang Suan Kim in hunte khakna hong neihsak hi. Nek leh dawn a ding thungetna zong hong nei a, mipi Zola sa lam diamdiamte zong khut kilet kham nailo, khe vik nuamsa panpan in hun in hong ngak zo nawnlo ahih manin ka kikhen phot uh hi. 

Gilvah taka ann ka nek khop khit uh ciangin "Mai kum Zomi Nam Ni ah kimu kik ni aw" ciin lungsim saupi tawh ka kikhenta uh hi. Mangpha, ihmut nuam aw, it leh ngaih teng aw... 

Topa in Zomi leh Zogam hong siamta hen. 

Hau Za Cin

Phuitong Liim

www.hauzacin.blogspot.com

 


Comments

Singapore is a very beautiful country and so many people going there to visit and enjoy the beauty of Singapore. I hope i will go there to get some beautiful memories of my life.

Reply

People like to visit Malaysia because that is really amazing place and that is lie a hub of tourist. I am also planing to visit Malaysia in my holiday next time because i heard too much about that.

Reply



Leave a Reply