WWW.TUNGZANGNEWS.COM

 
Zomi GS nihte leh Malaysia Zomite holimna

Malaysia ah Zomite kum bangzah hiam khat ih om khit hangin tutunga Pu Gin Kam Lian leh Dr. Do Suan Mung tawh holimna ih neih khop theih zah a hun thupi kinei nai lo hi cileng kikhial khol lo kha ding hi. Amau tegel pen Zomite hong makaih Zomi Party ZNC/ZCD leh Zomi kipawlna lakah a lianpen GZA panin General Secretary a sem uh hi in, thugen laa gen zong siam in gamsung gampua thupiang leh tulaitak ih Zogam ih Zomite dinmun leh Kawlgam paizia avom akaang kician takin hong gen thei uh hi.

GZA Genral Secretary Dr. Do Suan Mung in Simleivai (Politics) a thupitzia leh a piangthak khat in minamvai leh gamvai a nawl khin theih loh zia limtak in hong gen hi. Ama genna ah “Leitung tawn lo in vantunggam Direct in kitung thei lo ahihman in mihing khempeuh aa dingin Simleivai (Politics) pen a kimangngilh bawl thei lo thu khat ahihi” ci hi. Himah hi, ih biak Pasian mahmah inzong leitung mihingte hong vei in ih nuntaakzia hong puah pha nuam ahihman in khatbek a neihsun a Tapa Zeisu leitungah hong sawl suk tangial hi. Politics thupi lo hi leh Pasian in a teeltuam Israel mite a makaih dingin makai picing, gaalkap hangsan leh kumpi liante na pia lo kha ding hi. Dr. Do Suan Mung in Laisiangtho sung thute pansan in Politics a thupitzia kician takin hong genna tawh kizuiin piangthak kici a minam itna leh veina a nei lo, makai hibuang a makaih mite lampi maan a totpih lo te aa dingin khanlawh huai in kipuah phat huai mahmah hi. Ama thugen khit cianga hong gingkhia khutbetna thawm ka zak ciangin a thukim lo leh a lungkim zo lo kuamah om lo hileh kilawm ka sa hi. Kei naleng inzong ka khut kuhpi heh lam mangngilh in khut ka beng dapdap kha mai hi!


Tua tawh akizom in ZNC/ZCD Party pan in General Secretary Pu Gin Kam Lian in thugenna hong nei pah hi. “Zomi thu pen Zomi mah in gen leh hoih pen ding hi” cih tawh Pu Gin Kam Lian in a thugen hong panto hi. “Tua ahihman in Kawl Party pangbel lo in Zomi tawh a tuam din ih hihi. Seventhday pawlpi sungah om in voksa neek ding a thupitzia gengen mawk lehang hong kihawl khia ding hi. Tua mah bangin namdang Party pangbeel in ei Zomi thu va gengen mawk lehang ei thugen kuaman hong ngaihsak lo dinga, kuamah in zong hong gensak lo ding hi” ci hi. A thugen zomto kik a “Tua ahihman in Zomi Party ZNC/ZCD a kiphuan hi in, tun kum 25 val khin ta hi. Ahizong in muh theih ding gualzawhna kinei nai lo ahihman in mipi in zong hong muang zo taktak nai lo uh hi” ci hi. Ahi lua hi. Bang hang hiam cileh Democracy maan lo omna Kawlgam sungah Party te’n na sem thei taktak nai lo uh hi. Thautawi a gamlak zuatna tawh kisai ama genna ah “Thau tawi khempeuh a hangsan cihna hi lo hi. Thau tawi lo khempeuh zong a meidawi cihna hi pah tuan lo hi. Ko thautawi lo teng pen Kumpite’n a ut hunhun un hong tuah khia thei uh hi. Tua hun ciangin lau in ka taai kei uh hi” ci hi. ZNC/ZCD in minam aa ding Kumpi tungah thu tawh laa tawh a sep khiatna te zong tom kim takin hong gen a, mipite’n ih muhpih loh lawhcinna te leh ih theihpih khak loh amau thuakna te zong hong gen hi. Chin tawh kisai ama genna ah “Chinte pen a mudah leh ahua keei hi lo hi hang. Ahizongin amau hangin ei Zomi te’n phattuamna khat zong tuni ciang dong ngah nai lo hi hang. Ei Zomi pawlkhat amau sungah ih va kihel zelna hangin ei vaang tawh amau pahttuamna tampi ngah lawh zaw uh hi” ci hi. Hih thu ah ei Zomite mitvaak huai in, pilvaan hun mahmah ta hi. Bang hang hiam cileh Chin ih kicihna hangin hamphatna khat zong ngah lo ih hih leh Chin ih kicih loh manin zong supna om het lo ding hi cih thu kilang mahmah hi. Ei innkuan sungah kial tung napi bang hangin midangte anlehtui va pia thapai masa ding ih hi hiam? Chin makai khat tawh USA ah a kihona uh  hibangin gen hi, “Chin leh Zomi bangci kipawl kik theih ding ih hiam? ci-in hong dong a, ken bel Chin leh Zomi kigamla lua mahmah ta ih hihman in kipawlkhop kik theih ding baih lo kha ding hi ka ci hi” ci hi. ZBC tawh a kipawl khawm kimlai amau CBC tawh hong taisan khit nungsang ei Zomite’n nungdelh a ih va mai-et keei a kulna khat zong om lo takpi hi. Ahihangin Chinte a hua leh a mudah hi peuhmah lo hi hang. Amaute pen Ngeina leh Pau leh ham ah ih kinai pih pente ahi uh hi. (Azom pen Zomidaily ah Youtube tawh hoih takin na en ciat un.)

Malaysia gamah Chinte pangbel Zomi kipawlna khat leh nih a om hangin Unau innkuan minam khat ih hihna a bei hi tuan peuhmah lo hi. Pu Gin Kam Lian cih mah bangin ei Zomite Chinte sungah khat leh nih ih va kihel kiau zelna hangin Chinte in phattuamna na ngahngah uh a, ei ngah ding bel tu ciangciang om nai lo hi cileng kikhial lo kha ding hi. Pu Gin Kam Lian in “Satan a kikim ding kimlai hong kikim loh ciangin a kilungkim lo hi” na ci hi. Human Rights violation ih cih pen tua hipipen lo ding hiam? Zomi tawh ih dinna Party ZNC/ ZCD phungvuh in, tui helloh Zomi teng Zomi min tawh ih kipawlna, tulaitak leh mailam hun ding ih geelkhopna Zomi Zumpi ZAM (Zomi Association of Malaysia) pen ih hihtheih zah in thapia in thungetsak tawntung ni.

Zo Sunni pa’n Itna tak  tawh,

Francis Lamthang (Zomi Quavadis)
 


Comments

07/06/2016 11:48

People like to visit Malaysia because that is really amazing place and that is lie a hub of tourist. I am also planing to visit Malaysia in my holiday next time because i heard too much about that.

Reply



Leave a Reply