WWW.TUNGZANGNEWS.COM

 
Zomite mah bangin leitung kihei



Zomite mah bangin leitung pen a hoih a deih, a khangto nuam, a nuam a tawldam a deih ahi hi. A hoih a deih manin research bawlna dingin sum tampi beiin nasem uh a, handphone hoihnono bawlkhia in mawtaw hoihnono bawl in vanleng hoih nono tawh khualzin uh hi. Zomite mah bangin a nuam ding deih in inn lam in a sang theithei lam in huihlak pan leitung suk-et in vasa nangawn a nuai vuah lengsak nuam uh hi. Zomite mah bangin leitung in khedap zong a tulsang theithei bulh in a niamna uh dindel in kahto uh hi. Zomite mah bangin leitungin a lum theithei ding zanpuan bawl in, vasa mul, tuu mul tawh bawlin, pangpat leh patzaap tawh bawl in neel mikmek a, naipuan tawh bawl in maat zitzet hi. Zomite mah bangin leitungin tui siangtho dawn nuam in tuinin khempeuh a dawnma un khaihsiang uh a, Zogam dung leh vai ah a luang ngelhngelh tuite banga vot kiuhkeuh in dawn nuam uh ahih manin a votbawm ah koih in zuak tanghial uh hi. Zomite in tuivot buang lei kullo in deihzahzah khuanawl ah a luan ziahziah hi. Zomite sanga tenna niamzaw zangsungah teengte in tui in niin tampi a taihkhop khit ciangin ngah  pan uh ahih manin a khaihsiangloh uh a phamawh hi a, leipian hilo hi. Zomite tenna ah huih diik ding siangtho takin nung hiauhiau ahih manin Vaphual nangawn in huih dikna ding nakvang golpi a neih kullo in a nakvang neu ciuciau lel hi!

Zomi mah bangin minam dang khempeuh zong khangto nuam ahih manin amau pau leh ham ciat puah uh a, la phuak in sa tek uh hi. Amau nuntakna a lak thei ding limpiahna leh limlahnate bawl in gualnuam uh hi. Zomite mah bangin nek leh dawn a kisaplohna ding un hanciam in sem uh a, ahi zongin a kholsiam, a zeeksiam Zomi zah in tamlo zel uh hi. 

Leitung ah a haksa mahmah ki itna a thupi bawl tampi a om hangin Zomite zah a Vaphual itna a nei tamlo kha mai ding hi. Zomite in a mite uh it lua ahih manin khatveivei "akpi nawi hawm" bang thei uh a. Zomite in mite it in ama nektang, ama tan taang nangawn a piak khiat ngamlai in midangte in Zomite tan ding nangawn sunkim khuaphat laitak in zong sut ngam mawk uh hi. Zomite in amau thupina nangawn gen ngamlo in 'kiniamkhiat' uh a, leitung mi pawlkhat in bel midangte thupina nangawn amau thupina ciin kisialpih ngam uh hi. 

Zomite mah bangin leitung zong khua lian ah teng nuam uh a, khuapi bawl behbeh in khua golsak semsem uh hi. Zomite mah bangin leitung zong khangthakte khualna tawh kalsuan in pilna delh uh hi. Gam thumna, gam lina dong in delh in a sum neih khempeuh nangawn uh sungkhia in pilna zong uh hi. Zomite mah bangin leitung zong kingeksak ut a, zol bawlbawl, ngek bawlbawl leng nop a sak hun om hi. Zomite mah bangin leitung zong kiphasak nuam in kisial nuam uh a om gega thei uh hi. Zomite mah bangin leitung zong nuihpihpih ding, lampihpih ding a ut hun om hi. Zomite mah bangin leitung in zong a hoih thu vive za in a sum tawm bei theithei hileh ut uh hi. Zomite mah bangin leitung zong sum beilo a deih peuhpeuh ngah theih hileh ut uh hi. Zomite mah bangin leitungin zong milian suak in ulian suak in mite in pahtawi in vandak in pai luanluan leh ut hi. Zomite mah bangin leitung in lawm kisam a, lawmbawl leng nuamsa in it bawl leng nuamsa hi. Zomi mah bangin leitung zong hong bawlpa thupha sangin a hawmkhia ziahziah hileng ki ut hi. 

Tua hi a, leitung in Zomi khengin bangmah hih tuanlo ahih manin leitung zong Zomite deih bangbanga kihei hilel hi. I tunna ciang a kikim ding bek a thupi hi. 

Zomi khangnote ading a kong gelh hi. Lungdam. 


Hau Za Cin
Phuitong Liim
www.hauzacin.blogspot.com
 
 


Comments

Very nice picture are posted up there specially in which people running because of rain. The white ship is looking very nice we can see so many people are happy to see that.

Reply
02/02/2017 07:00

lucky patcher app ios

Reply



Leave a Reply