WWW.TUNGZANGNEWS.COM

 
Numei holsan

Hang Khan Lian

Oct 02, 2015, Ygn

“Numei holsan, nataw tutphahsuk peuh!” Keicih hilo, mi cih. Ke’n bel cihsawmlo, ci ngeilo ding!

Leitung minam tampi sungpan Zomi, Singtaang numeite mah pahtaak huai pen kasahi.

Ama’ sungpan aa piang gige, a ma’ beh leh phung min pua hiaulo, beh leh phung dangding honkhat, pantah sihpih dekliang, a ma’ pattah aa mi suakte’n a beh uh kisaktheihpih mahmah, apantahnu simmawh nuam lai, cih pen, tuazah aa kipiakkhiatna dang omnawnlo kasahi. Kingeina sehmaw, i ngeina hilua maw, kipiakkhiatna lianlua, a lamdangpi ahihi.

Zomi, Singtaang mite ta in ong neih uhhang a lemlawh uh om hetlo, a kisaktheih nading a omhetlo, kasuan kakhaak acih nading uh omlo ahihi.

Tuazah aa kipiakhia khin te’n cimthoihna in a tate’ inn khawng haal gawp in I umhiam?

Paulap bangbang a om zongin, ‘Inn hal’ cihlimlim pen ngongtatna ahihman in ahoihna om kei mah. Inn genloh lobuuk nangawn akihalsak ngei hetlo minam ihihi. Innhal bek hikei, kithah kihenna, thatang suang aa kithuhilhna, maituam kipiakna, kivuakna cih ngongtatna tawh kizom khatzong ahoih om kei!

Nupi gal zawh


Zawhkhit ciang, a kisam nawnlo, a uanglua aa gamtat thuahna pulakna kammal ahihi.

Banghang hih kammal ong piang hiding hiam cih ngaihsunkik hilehang:

Nidang lai in thu omlopi aa kisim, kithat, kiman minamte ihihi. Pasal ngalhat honkhat in khua khat valuh, vasiim, a pasal teng uh thahsak, a ngawng tan, alu la, a naupang teng uh saal aa man, tuabang atuak nupi teng a gualzawhkik khaak uhciang a kikholkhol a hehna, athuakna teng uh puakkham kik, lungkim zolo ahihman un akisam nawnlo zah in uangtat kha uh hingel ding i sehkholh sak theihi.

Zomite pen i nuamni ciang hanlasa, thau lawn, I lungdamna a puakkhamsak minam, i dah i kahciang minsial aa thaulawn aa a puakkham nuam hamtangte ihihi. A uangdeuh, aval deuh aa lungdam nam, dah nam kici thei hihang.

Arab spring icih, 2011 kiim pawl aa Arab gamteng biakna ukcipna pan democracy kalsuandan ong mat uhciang, upmawh hetloh a lamdangpi khat ong piangkhia khat in (extremist) a uanglua, luangkheng gamtatna ahi IS icihte ong piangkhiasak mawkhi.

Kawlgam ah 1988, 8888 mipi sinso, galkap kumpi NeWin ongkiat laitak, mihing takpi ngawng kitanna tawh ong kizom kha mawkhi. Mundang takei leh Tedim bek ah zong kumpi inn teng haal ding, jail sung aa omteng khahding a vaihawm man na om aa Siamsin sangnaupangteng in huu, khaam man hikei leh ngongtatna a kitung ziau dektak ahihi.

Aki ukcip, akihencip, akinencip, apatau, alau niloh, kol bulh nuntakna khat a suahtaak aa, tua suahtaakna or kikhahkhiatna or gualzawhna in tulehtu in lungkim pahna ong tutloh ciang,

(a)   tua suahtaakna kizang khial, kivalzat hamtang theihi.

(b)   Tuabang ihsuahtaak ciang akikhialkha den khatin, “thudik thuman (justice) in gualzo khin cihtawh lungkim ding hinapi, thagum, alel leh azo, gualzawh ding kungmui in nei suakkha pahpah hihang”. Tuapen ahihi, “Nupi galzawh icih”. Thu tawh nungtalo, khangcingtak nailo, vaaltat nuam hamtang! cihna hi.

Atelnop dingin, zuphual aa kibuan thudik thuman cih ngaihsun nawnlo, a zo a lel kituh gamtatna ahihi.

Banghang hih kipiakkhiatna lianpi anei Singtaang numeite hici tat kha ahihiam? Banghang inn haal, khutkhial uh a hihiam? Hiciang aa gamtat khaak nading in athuakna uh bangciang omkhin aa, bangzah ciang dipkua, lau, patau in om sakkha ihihiam? Atawsawn tha, theihnop huai, theihkhiat huai masa kasahi.

MLA makaite ahi aa, minam Makai, lumtawi, teitawite ahizongin bangci gamtat, sum/golhguuk bangci neek, maituam bangzah in ngah, ipsung aa kiguang bangzah om, nuntakna bangzah in beilawh cihte a cian theih ka hihetkeihi. Om bel om leh kilawmhi.

Ka theih khat in, kuanglui nuam khatpeuh in ama’ utthu in, suakta tak in kuanglui theilo, phalna kisam masa cih hi aa, tua limlim in Lamka Zomite suakta hetlo cihna ahihi. I mipihte tung Burma aa Ne Win leh galkap mangte bang linlian gamta cihna ahihi.

“Inn haal cih limlim” ci aa mawhsak om aa, “numei holsan” aci tawh, “numei ginalo” a ci tawh i ut i dah in kobawl ngeingai hihang.

Hih i Nute’ khitui, i luan khaak sakklam i ngaihsun kaak kha ngei hiam?

Ataktak in, asung aa piang, asuan akhaakte nangawn amau min leh puam, beh leh phung min pua khalo hih Singtaang numei te’n, (kei lungsim bang pua hileh) Zogam, Zolei, Zomi amangthang zong in, Zogam a bei zongin a awlmawh nading, amau’ minsiat nading omlohi.

Tuading kimlai,

Meigong nupi khat in atapa neihsun taisan ngam, a nungngat ngamzah dingin atapa in bangci bawl hiding hiam? Bawlsia, tatsia, hin gimsak luata, nuntak gimnamsak nawnlo, akhualnopna tha om nawnlo, a awmbing luata;

“Singtaang Nupite tamlawhna” cihkhat kaza kha aa, tuabang ahihtakpi mawk leh bel khitui tam luang sak khin lua kha hilehang kilawm kasahi.

Tate’ Lum leh tei I tawi pen inn sung, khuasung bit nading, dal nading hiding aa, inn kuanpih teng vau nading, lu phong ngamlo liang aa koih nading, hihethetlo dinghi.

Tu in, Zomi (Singtaangmi) sung ah khat zawzaw ii tel ding dotna thupi ong omhi.

(a)   “Na tapa ong kithahsak, ong kithuhilhsak, maituam ong kipiaksak ding utzaw maw, na inn ong kihalsak ding utzaw?”.

(b)   Na singtaang gamteng huzaw ding maw, na tokhom, panmun taisan zaw ding?

Hici ngaihsut pak hilehang inn leh lo ii cih in van hi. A kihal leh, ahoihzaw lam kik theih ahihi. Tapate icih in nuntakna hi. Koi it zaw?

Ataktak hih dotna pen I minam sung aa kidot ding dotna hilohi. I neulai aa, “na Nu itzaw maw, na Pa itzaw” cih dotna namte ahihi. Minam khatsung aa kidot ding nam hilo, tuabang dotna a om nading aa gamtat ding ahilo khin kacihnopna hi.

 Sehsat ding aa sa gawhna phual atung khin, a ki taisuahkha bawngpi, ama taang aa kibawlsia a no’ kahna aw  azaak ciang hangsan tak in sa gawhna phual zuankik in sekpi aa sat ding adek ngat kawm in a no ngek a nawizu tah ngam buang hilo ahihiam?

Tuamah bangin, aPa’ tungpan angahding gamh teng ngenkhia khin aa avaakthap tapa a tunkik kaal ding a Pa’n gal-et niloh hilo ahihiam?

Kipiakkhiatna, mawh kimaisakna khutte i gol zaak kei leh bang cibang in ii Zogam, singtaang leitang dam theiding ahihiam? Thuthuk ngaihsun laphuakpa in:

Israelte Pasian in eite’ Pasian mah ahihman in,

Lungkhamna kuampi lam etna kongpi suaksak ding aa,

haksatna kuam pan nopna ni hong tang ding,

lungdeih teng cing di’ng, Sian in hong siam dinghi cih I thungetna ahihi.

Canaan Zogam, Pupa’ luahsa gam! Canaan Zogam, Pupa’ neihsa gam!

Canaan Zogam, Pupa’ huutsa gam! Canaan Zogam, mawhmai sakna gam!

Canaan Zogam, citak, kuhkal gam! Canaan Zogam, thuman diktat gam!

Canaan Zogam, it damtui luanna gam!

Canaan Zogam, Sian’ aituam it gam!

Canaan Zogam lei aw, kilam thak kik dih vaw!



-- 

Hang Khan Lian
Block 646#13-115
Jalan Tenaga
Singapore 410646

 


Comments

05/20/2016 03:28

I always love to browse for new site and find out what is going on with other people. This site is in a foreign language. Kindly consult with essay writers for the page to be translated into English language. This can be a very high yield site.

Reply



Leave a Reply