WWW.TUNGZANGNEWS.COM

 
Tg. Vungh Vaan Mung (kum 23)' Tawntung Mopawi

Zaanhal sawn-a kipan AU- Melbourne ka' teenna nangawn-ah sanggam ngaihte-in hong tutpihna, hong hehnepna-uh ahi ka' tapa-uh Tg. Vungh Vaan Mung' tungtaang anunung gelhna-zong hikha mawhloding ahihman-in hong theikha sanggamte' muhtheih ding-in khaakna kahong khah-hi.

Tg. Vungh Vaan Mung-pen Zogam, Laaitui Khua-ah 1992 August 30 ni-in Pa Zel Heen Maang leh Nu Kheen Za Cing te' sungpan-in piang-hi. Tapa upen ahihman-in apu Rev Neng Khua Vungh' min-tawh akiphuak min ahihi. Nau numei 3 leh nau pasal 2 nei-hi.

Tg. Vungh Vaan Mung' laaizomte:

·  Lia Cing Zaam Lian

·  Lia Kim Saan Hau

·  Tg. Vungh Aai Suum

·  Lia Niang Saan Vung

·  Tg. Suan Sawm Saang

Tg. Vungh Vaan Mung saangkah theih tuúng-a kipan-in Laaitui Khua-ah danh 9 ciang kah-a, danh 10 -pen Tedim Khuapi pan-in Bio D-tawh zo-hi. Tua-zawh ciang-in GTI kahding kimlaai Mandalay-ah gamdang-a zoptheih siamsinna om akicih ciang-in GTI nusia-in Mandalay-ah siamsinna nei-hi. Tua siamsinna-tawh gamdang zoptheih daanding alemloh akitheih ciang-in Yangon-ah paisuk-in Computer siamsinna Advance Diploma-ciang hong zom-in lukhuneelkaai hong ngah-hi. Mite' tung-ah akitawisaang veva khuakpilna anei ahihloh hang-in alaisin zo toto-a, tua kawm-in khangno noptatna zudawn lamsang hongneih ciang-in khal nading-in khua-ah ciah-a, a'pa-tawh kithuah uhhi. Computer Bachelor azom-nuam mahmah hi-a, a'pa-tawh kithuahna pan-in hong lem hunciang-in bachelor zopma-in Laboratory neelzuun siamsinna kahpak ding-in hong lunggulh-hi.

Monyua General Hospital-ah Lab neelzuun siamzil-in hong-om thei-a, tua hun ciang-in Pasian' thupha leh a' thahaatna hong phawkthak thei-hi. Guitar tum thei-in, lasa thei-a, tua mah-tawh thunget hunbawlnate-ah hong thahaat-hi. Monyua-ah Rev Cin Khan Thang te' pawlpi-ahzong kihel thei-in, lawm leh gual lak-ah nuam hongsa mahmah thei-hi. A' pianna nulehpate' itna phawkthak mahmah-in ngilhmawh ding kammal hoihte hongluan thei-a, aneutuúng-a nu bang-a aneih a' niipi Nu Cing Sian Niang-a kipan anaute leh midangte kammal akhum lamdang-tawh hopihna leh meelcik noptuam piaknate hongneih ciang-in lungdamna-tawh lamdang akisa mahmah ahihi.

Lungdamna-tawh mitdim zolo liang-a anute apate-in a-et hun teekteek-mah Pasian-in Ama' ading-in tawntung Tawlngakna ageelsak hong taangtung vat ahihi. Apianzia-ah, asaangkahpihte-tawh gualnuam-a luuigei apai-uh hi-a, suangtum lak-ah maan akizaih laaitak-uh'n Tg. Vaan Mung akhe taalvat-in suangtum lak-ah kiasuk-in tuilak tusuk-hi. Alawmte-in delhsukpah uh-a, ahizong-in tangvaalpa naak nawnlo-in alungtang kisaai nawnlo-hi. Zato puak uh-a, mun nih-bang apuak-uh hang-in Pasian' lak khitsa nuntaakna kingahkiik nawnlo-hi. Alawmte mah-in zaaksak ding-a kilawm khempeuh hong zasak uh-a, ama' innkuan behlehphung sung-ah dahna tuihual hongleet-hi.

Ahamphatna: Kote' hamphatna

Tuahsiatna zom-ah, a'saangkahpih lawmte, Rev. Cin Khan Thang-a kipan pawlpi mite leh mipih a-omthei teng-in naakpi-in luang tung-ah nana mapang uhhi. Lasiampi Saangpi-in zato lahna-a kipan sumzat kisapna peuh-a zatding Kawlsum tuulza-khat ahizong-in Rev Dr Go Cin Zaam (U Zaam) Monyua-ah azin laaitak-tawh kituak-a, Kawlsum tuul-50 cihbang-in lung hong phaampih/sak uh-a, anute apate ka' omloh-uh hang-in guulsih tangsih sak lo-in mipi hong tangsak uhhi.

A'saangkahpih lawm leh gualte mi 16-in Monyua pan-in hong zuui uh-a, khua tampi' hal ahih-tawh kiton-in vaai-khat kisawn nading Kawlpi (Kalaymyo)-ahzong Pa Pum Za Kaam (U Kaampi)-a kipan khuapih tuipihte thamlo-in Zomi Council upate inzong ameel va-mu, va-uap uhhi. Tua laai-ah Tg. Vaan Mung amuak ding-a khua pan-a apaisuk a'pano upen Pa Gin Khat Suan, a' niineu Nu Ciin Lam Vung, a'pano Pa Vungh Suan Pau leh pawlpi upapi Pa Suan Khan Gin-a kipan mawtaw khatdim mipi-tawh Kawlpi-ah kimu uh-a, Pa Pum Za Kaam' vaaihawmna mah-tawh Zogam, Laaitui Khua-ah ciahto uhhi. A'saangkahpihte-in khua dongmah zuui uh-a, aluang gei-ah tu-in ompih den uh-a, tuni-inzong haankuang zeem uhhi.

Tua baan-ah, Ngennung Khua-a kipan Myanmar Christ Baptist Pawlpi mi tampitak-in amau' khua ciat pan-in Tg. Vaan Mung' Tuuno Mopawi siim ding-in kuanciat uh-a, innpi-ah kitalo ahihman-in a'pano Pa Suan leh a'niineu Nu Vungpi te' inn teng-ah zinkhen uhhi. Hiang-awn Khua-zong pan-in inn lutang kim-in hong uapphei uh-a, tangvaalpa' hun nunung-pen luuntak-in akinei theiding dinmun-ah a'biak Pasian-in hong koih-hi.

Tg. Vaan Mung' vaaiciah ni ziingsang nai 6-in amah tho-a, asiate khempeuh va-muak kim-a, asiate-in hihbang hongpian ciang-in nasa mahmah-uh ahihman-in amau' class laihuanna (exam) ding-pen khiinto uhhi. A'luang ompih a'lawm agualte' kiang-ah saangsiate-in, "Na' lungleen-uh abei mateng ompih lel-un, no'ng tunsuk kiik-uh ciang-in laihuanna kipan lelding hihang" ci-uhhi. Kawlgam-ah hihbang itna-tawh kizom theihsiamna amasapen ahikha tammaw cihphial ding-in Tg. Vaan Mung' siate-in tha hong dimsak uhhi.

Tu-madeuh:

Nungdeuh-in a' nute Mandalay-ah naucin siamzil lamsang thusinna nei uh-a, aciahtoh-uh ciang-in Monyua Khuapi sung-ah a'nute tuanna bus nana khawlsak-a, a'nu kiang-ah, "Nu-aw, ka' duh, ka'deih bangbang haksa pipi-a nong' vaaihawmsak tawntung-uh ka'phawkna hi-e," ci-in Maymyo pan-a alei dialneu khat mipi' maai mah-ah a'nu ok sak-a, "Cidam-in khua vatung un" ci-in bus hawlpa' kiang-ah "pai thei-ta" cih limlak-in kikhen uhhi. A'nu-in lamdang sa-in nuamna leh nehnona-tawh ngaihsunsun-a, zaanhal sawn ciang-in dawnna ngah pan-hi. Tualaai mahpan-a alei niik khat-pen Yangon-a a'niipi Nu Niang pia-a, "Nong' itna leh kong' itna phawkna ding" cise-hi. A'kha-in Vaan Kumpigam azuatding theikhol-a agamta akampau-tawh kisuun-a, tuate-in dahna kahna hong hehneem tuam-hi.

Hih siamsinna zoleh computer sinzop ding nangawn gen-in nei nawnlo-in, a'sanggampa Tg. Kham Hau Thang: MBBS asin laaitak., -tawh akiho nilohna uh-ah lasakna leh thugenna-tawh Pasian' nasep ding bekbek planning bawl uh-a, ahizong-in tuni-in Pasian' thugen atawpna Laaitui Khua-ah akineiding hongsuak-hi.

Azia-atong:

Tg. Vaan Mung-pen nulehpa' kampau adawng gaga nam hilo-in, nunneem mahmah-a, taaina hapna kinei lehzong olno tak-tawh dawnziau asiam mahmah khangno khat ahihi. Giitlohna leh ngongtatna lamsang-tawh kisawh kha ngeilo-a, ciamnuihna, lasakna lam-ah gualnuam mahmah-hi. Khangno suahtaak gawpna pan-in Pasian' lam-ah hong kiheii asawtlo-in amah anei Pa-in hong la-kiik ahihman-in dahna aliat mahbang-in angtanna leh nuamna lian-hi.

Tg. Vaan Mung' Hun Nunung-ah Mimal Kihel theilo lungzuansialte:

·  Mawlamien-ah siamsin-a a-om Tg. Vaan Mung' nau Lia Kim Saan Hau (Taapi)

·  AU-Melbourne-ah a'panote: Zokhai te innkuan leh Pa Thang Pian Suum te innkuan

·  Yangon-ah a'pupite Pa Zel Khua Vungh leh Nu Ning Khen Kim

·  Malaysia-ah a'puno Tg. Khai Lian Khup

·  USA - Phoenix-ah a'pano Pa En Khan Khual (Pa Khual) te innkuan

·  Magwey-ah Medicine siamsin laaitak Tg. Kham Hau Thang

·  USA - Buffalo-ah atupa Pa Vungh Zaleen Maang (Leenpi) te innkuan

·  USA - Chicago-ah atupa Tg. Tun Za Siing, Tg. Kaap Sawm Tuang-a kipan pawlpi mite leh sanggamte

·  USA - Kentucky-ah a'nuno Nu Kham Ngaih Lian te innkuan

·  Yangon-ah a'gangpi leh a'u Lia Cing Huai Luun

·  Malaysia-ah Tg. Kham Lian Maang, Tg. Pau Lian Kaam, Tg. Tun Za Pum

·  India-ah Tg. Vungh Kaih Mung

Hihteng a'luang-tawh omkhawm theilo ahihman-in thungetna-ah it leh ngaihteng-in hongna phawk un.

Apate' lungkimna:

It leh ngaih mahmah khat-in hong nusiat ciang-in nupite-in tamlo-in, papite-in minsial uh-a, numei naupangte kap uhhi. Zomi pupate-in a'minsial taáng-in kawsah haanken vaaihawm uh-a, tua-tawh akhitui-uh pulaak-hi. Tg. Vungh Vaan Mung' pate teng-inzong a'minsial taáng-uh'n kawsah haanken guan uhhi. Phuisamna leh dawitui paihna akihel hilo itna lahna ahihman-in:

·  Pa Zel Heen Maang - sial khat

·  Pa Gin Khat Suan - sial khat

·  Pa Zokhai - sial khat

·  Pa Thang Pian Suum - sial khat

·  Pa En Khan Khual - sial khat

·  Pa Zel Sian Langh - vok khat

·  Pa Vungh Suan Pau - vok khat

·  A'Gangpi Pa Zen Khan Do - vok khat

·  A'Gangneu Pa Thawng Khua Thang - Haansuang khempeuh

Hihte kineihsakna leh kiphatsakna hilo-in, a'pate teng aguui ding-a kilawm tapa-pen a'pate teng-in ka'guui khaak man-uh'n ka' minsialna-uh ahihi. Zomite-pen akip akho Ngeina aneite I-hi uh-a, Pupa' Ngeina-pen naakpi-a athupi ahihna-zong ka' lahna-uh ahihi. Khuadang pan-a hong-uap it leh ngaihte khempeuh leh khualtual veenglehpaam hong-uap khempeuh-tawh tuni Tg. Vaan Mung .... ZEISU-tawh Kiteenna Mopawi nuamtak kizangh khawm ding-a, kawsah haanken khempeuh "Mokhaakna Sagawh" ci-in ka-saang uhhi.

It leh ngaih khempeuh tung-ah itna leii kahong baa uhhi.

Vaan Kumpigam gaalmuh kawm-in,

Zokhai

 


Comments

I am a journalist and I love to have information on every news this channel is so informative for me its has all the topics which I can easily access,breaking news ,heath ,even interviews very helpful for me ..

Reply

This piece is very nicely written and informative, very good use of language and grammar, I understand each and every word of it, nice stuff waiting for more. I hope this time you are gonna post something more exciting and full of fun.

Reply
05/14/2016 03:40

This site is very informative, thanks for continually finding the time to update us. I also come to this site to practice more on my language skill. The grammar and the works are easy to follow for understanding on the topic. Hope read on more exciting news the next time I come here.

Reply
07/23/2016 05:13

nice article keep posting

Reply



Leave a Reply