WWW.TUNGZANGNEWS.COM

 
ZBCM  Zumpi pan  Kanpalet  Mission nasepna  vai vanna theih huai pawl khat.

1.      Khualzin na


Friday, January 30, 2012, ZBCM zumpi pan Kanpalet missionary ih khah vai a va en dingin Keimah  Mission Secretary Rev. Dr. Langh Khan Thang leh Associate General Secretary Rev. Than Za Cin le Lang Zang Baptist Church pan Kanpalet mah ah Missionary khat khah a hih manin, Assistant
 pastor  Sia Thang Lian Khup in zong hong zui thei a, Kawlpi pan, zingsang nai 6 in ZBCM mawtaw  tawh ka ding khia uh a, tua ni in tung suak zolo ka hih man un, Thy Lin khuapi ah ka ngiak uh hi. Tua pan
zing tungin dingin  Kyaikthu  ah kiallap ne in Saw khuapi  zingan ka delh uh hi.  Saw khuapi ka tun uh ciangin zingan ka ne uh a, Kanpalet khuapi  Zion Baptist Church pastor ahi ZBCM pan missionary  a ih khah  Rev. Nai Thang  leh Church Secretary pa Thang Hlei tawh ko hong dawn ding a hong pai tawh ki tuakin, 11am pawlin Kanpalet khuapi  lam ka zuan in ka pai uh a, 1:30 Pm in ka tung uh hi. Tawl khat tawlngak zawh ciangin, ZBCM pan ih khah IMC khat ahi Rev. Nai Thang leh Lang Zang Baptist Church pan missionary akhah ahi Pastor Nai Thang tawh  holim na nei in, ZBCM zum ka puak uh Pasian thu bu
(Kawllai) tawh bu 48 leh Lang Zang pawlpi pan Lai Siangtho bu (Kawllai)  50 te amau tungah piak khiatna apna thungetna hunkhat ka nei uh hi.

2.      Victoria mualtung kahna


Saturday, ni-in zingsang 7am, innteek te hong hanthotna tawh Victoria mual sang tungah kah dingin ka ki thawikhia uh hi. Ko Siate thum , car driver pa Cintawng,  Rev. Naithang te 3 leh Pastor Nai Thang le pastor nu tawh 10 ki pha hi. Mawtaw tawh mualbul dong tai 10 ciang ki pai thei in, tua pan in mual tung dong khe tawh tai 5 ki kah to a, mawtaw saikel tawh mual tung dong tung suak ahih manin  annek ding teng khat in saikel tawh pua to hi. Maultung  11am in ka tung uh a, tua mual tung pen zang in tua pan in November kha bangah mun tampi ki mu thei in, Pagan Niang oo, zong ki mu hi hong ci uh hi. Ahi ongin  meii in liah in Mindat khuapi bek mah ki mu thei hi. Tua mual tungah a sang pen mun ah Kawl ten tattung khat lamin tua ngei ah khawlna ding inn khat sikkaang khat lam a, amual nih na ah bel singlamteh khat kiphut hi. Man la nuam ten, Video la nuam ten la in, tua zawh teh innteek te hong puak zingan lim mahmah te ka ne uh a, ka man’ uh teh ko apai teng ki kaikhawm in, Ken Lai Siangtho tawh hanthotna tom no khat nei in, tua zawh teh Rev. Than Za Cin in thunget na ding hong makaih in, mualtung ah ka vekpi un khuk din in, Zogam, Kawlgam khalam khanlawh na ding thu ngen bek tham lo in Kanpalet gam sung mahmah ah khanlawhna zong tun na ding khitui naptui tawh tawlkhat sung thu ngetna ka nei uh
hi. Ka man uh teh innlam ka zuan uh hi.  A  khuamun lui ka tun uh ciangin bual neu khat om a, Rev. Nai Thang in hih pen ni dangin hih bual tui pen pale tawh ki bang ahih manin Kan pale khua ki ci a, tua panin Kanpetlet ki ci suak hi cih thu hong gen hi. Tua pan in a khua lu ah Hotel mun nih ah om in a inn te uh
hoih thei mahmah a, gamdang mi te pai zeuhzeuh hih tuak hi. Tua inn sungah amau mitam puan silh te zual tungah ki suang a, tua lai ah vasa lim zong om in, tua vasa pen leitung bup ah hih vasa pen hih Victoria maul tung bek ah ki mu hi hong ci uh a, a lung lut huai mahmah khat hi. Nitak nai 5 in ka zin uh ka tung kik uh hi.

3.      Zion Baptist Church in ZBCM zumpi te Sa hong gawh

Inn lam ka tun uh ciangin Biak inn ah ka tung suak uh a, Biak inn ka tun uh ciangin an luisa nakoih uh a, Pawlpi Secretary in vok lu leh a sa pawl khat kuangpi khat in hong pia in, thugen na hong nei a, hih
pen ko Kanpalet ngeina hi in, Zion Baptist Church in ZBCM zumpi pan ko avei huai mahmah Kanpalet kha mangthang te  hong vei in nong van man un, a ki genzo lo  ka lungdamna hangun vok khat kong gawh uh hi a, zumpi pan hong pai Siate khat in nong san na ding un kong thum hi hong ci in, Sia Cin in sanna hong nei in thungetna tawh lungdam tak in an ki ne hi.

4.Biak piak na


Zion Baptist Church pen inn 20 hi in, kikhop na pen amaupau ahi Dai pau zangin a ki khawm nitak hun ah avekpi un mi 40 tang hawng ki khawm thei uh a, lawp thei mahmah uh hi. Tua pawlpi in, mei set neu khat nei in, songbox, mic cih te nei zo nai lo ahih manin hunzang peuh in ot bua bua kul pian hi. Hi zo leng lei sak huai mahmah hi. Am bek koih in ki zang thei nai lo hi.


Saturday ni tak      Rev. Dr. Langh Khan Thang
Sunday sun          Hunzang     Rev. Than Za Cin
Sunday nitak        Hunzang Pastor Thang Lian Khup

Sunday hunpi sung ah ko Kawlpi pan a pai teng car driver tawh (4) teng Kaanpalet te ngeina tem apaitawh aki thuah te a hoih mahmah khat ciat hong piak banah ZBCM zumpi ading ci in temta khat leh amau seng mah khat hong pia lai uh a, hunpi sungah apawlpibup in amau pau in ZBCM gam khantoh nading Zogam Kawlgam ah missionary tampi a khah zawhna ding, ZBCM lungtup ahi missionary 300 a khah khiat zawhna ding ci in, tawlkhat sung khukdin thu hong ngetsak uh hi. Nitak inn ka tun uh teh
Voksa paipel dim khat  ahan keu sa  in hong pua sak lai uh hi.


5.Miss


Mailam mission nasep nading vai tawh kisai holimna ki nei a, ZBCM pan ih khah ahi Rev. Nai Thang ahi zong, Lang Zang Pawlpi akhah uh ahi pastor Nai Thang a hi zongi, a mau muhna bang in hong gen uh hi.
Kanpalet khuapi kim ah Christian bel om kawikawi sam uh a, tam nai lo uh hi. Ahi zongin Kanpalet khuapi pan in tai 50 a gamla Tin Duai khua minam Chin pung te ci-in, tua lai khua pen Kawl suah gawp in a ngeina uh zong Kawl ngeina, biakna te zui in, a om na leh nidangin tua lai ah Christian thu kin gen ngei na pi ki zom non lo a hih manin hong kawl suah gawp ahih manin, tualai ah ana sep na uh leh a haksatna te hong gen uh hi. Tua khua ah Pasian thu gen dingin amau mite lo buang kuamah alut ding phal lo in, amau mi te zong tha khat thu in ih gen hang zong hong um pah hi lo in, huntam pi lak kul ding cih thu zong hong gen uh hi. Tua hi in Rev. Nai Thang in zong amah mah in a vaan banah tua khua ah Siamah numei khat khah sawn in, tua Siamah nu in zong ahaksat na te hong gen in Pasian thu pen mun dang bangin thakhat in ki pulak thei ,Pasian thu ki tang gen thei lo in, ih nuntak na tawh lah na, itna lah lah kul in, a ki sam bangin zong huh kul cih thu zong ahaksatna hong gen hi. Tua hi in khat bek hi lo in nih leh thum bang pha thei le ung ki hung huan le ung ki lawhcing zaw deuh ding hi, bang bang leh nong
veina uh ka lung uh dam mahmah in nasep a ki pan thei suak ung. Mailam ah nalian tampi ih sep zawh nadingin thu nakpitak in ki ngek sak ciat ding hi hang cihtawh ka ki vai khak uh hi.

6.Mailam na sep zia dingmuh na


1. Kanpalet gam sung khanlawh na ding thu ngetna ah phawk huai mahmah hi.
2. Zogam sung ahih hangin anungta Pasian hoihna  atel tam nailo ahih manin, amauleh amau in Pasian thu a taangko nop uh hangin, a sem dingleh a sumleh pai tawh panpih ding om zo nai lo uh hi. Amau leh amau din ding haksa sa mahmah lai uh a, panpih huai mahmah lai hi.
3. Ih pau ki bang lo leh ihngeina ki bang lo ahih manin missionary dingin ei ih va pai sangin amau pantah theih te pantahin, amau mah khah thei leng ki lawhcing thei dingin ka um hi.
4. Kanpalet gamsung hong khanglo takpi leh akim a khuapi ahi tu-a aki
lut theinai lo akim a, Saw khuapi, Thy Lin, Khuapi tampi te... lam ah ei Christian te in valut in Pasian thu ih gen ding pen baih vetnai lo hi, Kawl mi bek om ahih manin midang in inn mun lei a vaten ding cihpen haksa mahmah lai ahih manin amau lam pan sihsan na-in nei in Pasian thu damdam in ki puak zo pan ding hi.

Rev. Dr. Langh Khan Thang
Mission Secretary
ZBCM




 


Comments

Go Nang
02/25/2012 09:38

Zomite Pasian in thupha hongpia in hong zang hi.

Reply



Leave a Reply

    Tungzang News

    All