WWW.TUNGZANGNEWS.COM

 
29 June 2012, Lamka: Tuni zing nai 10 pan nitak nai 3 dong Hotel Venus, Lamka ah a khatveina Zomi Language and Literature Society (ZOLLS) saina in ‘One Day Seminar on Lexicography’ kinei hi. Seminar pen Lamka gam Zomi Frontier Organization tuamtuam sunga makaite leh Zomi tawh kipawlna anei nam 9-te: Paite, Vaiphei, Zou, Simte, Mate, Kom, Tedim Chin,Gangte, Thangkhal (?) sunga Literature Society/Committee panin representative teng tawh kinei ahi hi. Seminar tup leh ngim ahih leh Zopau Dictionary bawl dingdan kisinsakna hi. Resource dingin Dr. Imoba Singh, Associate Professor, Department of Linguistics, Manipur University hi a, amah Lexicographer ahi hi. Hun thumin kikhen a thulu -a) A Basic Preparation of Lexicogrphy, -b) How To Prepare Bilingual Dictionary, leh -c) How To Prepare Comperative Dictionary teng kihuam hi. Hun nunungah Sia S. Dal Sian Pau in sharing/discussion makaih hi. Hun khempeuh manpha leh nuam kisa mahmah hi. Seminar ah Zomi sung makai leh lai nasep uk vive 30 val kihel thei hi. Seminar honna Rev Dr Luaichinthang, Chairman,ZOLLS, Seminar Keynote Address  Dr. Neng Ngaih Lian, Vice Chairman, ZOLLS, Vote of Thanks Sia Pauchungnung Vaiphei, Assistant Secretary, ZOLLS, leh hunkhakna Pastor (rtd) David K. Samte in nei hi. Mailamah Zomi sunga lailam saite kimuhkhop, kithuahkhopna tamzaw om henla i Zopau tuamtuamte kitheihpih leh kisinsaktuah ding lunggulhna kinei hi. Keynote address:               One Day Seminar on Lexicography

Organized by ZOLLS

Date:  29th June 2012 Friday 9:00 Am – 3:30 Pm.

Place     : Venus Hotel, Lamka

Amasa in ZOLLS seminar  kipan theita i hih manin Pasian tungah lungdam i ko hi!

I kicialna bangin Zomi Frontier Organization leh Zomi nuaia tribe literature society tuamtuam panin representative hong paikhawm mimal khatciat lungsim takpi tawh kong muakin cibai kong buuk hi.  Tuni i seminar tup leh ngim bulpi ahih leh i Zopau leh i Zolai ahi eima pau ciat limtaka puah a, kepcing ding deihna a hong kibawl khia ahi  hi.

I theihsa bangin  pawlpi (ZRO) thukimpihna tawh May 11, 2012 in ZOLLS  i kiphuan hi. ZOLLS in  khangthakte leh mailam  khualna in  i pau,  i lai limtaka puah leh kepcing ding, banah minam picing khat hih nadingin pau leh lai nasepna ah a tangzaizaw kipawlna tawh sephuan theih nading ngimna ahih bangin motto zong ‘One Language, One Script, One Nation,’ i ci uh  hi. Tua dingin i Zopau                 -kammalte kaihkhopa, a bu  a bawl  kipat hoih kisa ahih manin tuni in dictionary bawl tawh kipan ni, ci a kisamkhawm  i hi hi. Tua hi in  mi tampi kisam loin i pawlpi hiang tuamtuama panmun len leh lailam  lunglut leh a kivazaw deuh teng paikhawm i hi uh hi. Tua ahih manin lungsim zaa leh suakta taka hun zang khawm dingin i kingenin i kitheisak hi.

Lexicography i cih ciangin laimal gawm leh gelhzia,  thumal leh laimal bawl leh  kaihkhopzia, kilawmzaw leh kimtaka dictionary bawlzia  cihte a huama genna hi. A tatakin ei Zomite kammal leh pau hausa i hi uh hi. Ahi zongin  language leh literature tawh kisai university level dong sinna nei i tawmlai hang  leh dictionary nam tuamtuam khawng bawlzo nailo,  neizo nailote i hih banah i pau leh i lai zong research  a bawlzo nailote i hih manin i lai leh i pau hoihna  i thei nakei uh hi. Tua hi a, University  a Department of Linguistic nuaia Associate professor a sem laitak ahi Pu Imoba Singh hong paithei ahih manin  hampha i kisa a, amah leh i makaite tungah i lungdam hi.  ^^^

Session masa ah – ‘A Basic Preparation of Lexicography,’ Nihna ah, ‘ How To Prepare Bilingual Dictionary, ‘ leh  Thunna ah,  ‘How To Prepare Comperative Dictionary,’ cih  i sin ding uh a, hun nunungah sharing leh discussion banah hun i ngah leh mailam i nasep dingdan genkhawmna i nei nuam  hi. Tua ahih  manin a zahtakhuai makai hong pai khempeuhin hih hun manpha zangsiamin a bul pan a tawp dong om kim dingin kong ngen hi.

I theihtek bangin ZOLLS pen zandiaka kiphuan ahih manin tu in pawlpite huhna tawh computer leh almirah cih khawng kikaikhawm  lingling pan hi. I dam leh mailamah ZOLLS innteekna tawh tu sanga thupizaw in leitungbup huapin Zomi lailam nasemte (adiakin India leh Burma sunga Zomite tawh)  kikaikhawmin  ‘Writers’ Workshop & Conference,’ banah ‘ZOLLS Journal’ bawl ding kilunggulh hi. Tua banah i Zolai leh Zopau kepcing nadingin Zomi sunga  cassette, CD, VCD kibawlate banah Zopau tawh kigelh laibu kibawl, Magazine, Journals leh Nisim Thukizakna (daily news papers) te dongin kaihkhop kisawm hi. Bek thamloin, Zomi khatpeuh in English tawh a gelh  or Zopau tawh a tei laibute leh Zomi tawh kisai laibu khatpeuh banah adiakin language leh literature lam laibu a tamthei pen kaihkhopa library (laibuli) neih ding kilungulh hi. Bang hang hiam cih leh lai leh pau kiciantak neilo leh kemcinglo minam pen a sawt loin minam mangthangte hi ding uh hi. Ka lungdam.

Wishing all the best! ZOLLS damsawt henla, amite’n phungvuh in i biak Pasian in  vualzawl hen!

 

 Dr. Neng Ngaih Lian

Vice Chairman, ZOLLS

 


Comments




Leave a Reply

    Tungzang News

    All