WWW.TUNGZANGNEWS.COM

 
Picture
Kalaymyo Santha Haan
April 23, 2012 niin Agape AG Biakinn ah zingsang nai 8:00 hunin SANTA HANVAI tawh kisai pawlpi kim phial panin kikupna kinei a, pawlpi ciat panin mi 100 val kipaikhawm hi.  Innteek pawlpi AMC in Niangtui leh moh hong vaak uh a, Biakinn hong zangsakin akisam lailam naasepna khempeuh Computor tawh hoihtakin hong khetsak uh hi.

Mipi apai khenpeuh in SANTA HAN TUAHLOH DING NGETNA  min kithuh a, pawlpi kim ah tua minthuhna mah kihawmin tunipi sungin kizo siang ding hi.  HANTUAHLOH DING  tawh kisai kumpite thu nialna hilo a, President thupiak zong hilo-in Kawlpi pan aki Lule sak pawlkhat in Santa Hanphiat ding avaihawmna uh tuma 2010 laipekin anget uh ahi hi. Nipidaw panin Han kiphiat ding hi cihna LAI a om leh/ hong kilah theih leh kinial lo dinga, SANTA HAN mun ah adang khatpeuh leitang lei kullo-in asep nopman uh hilel hi.



Ahuaisia penpen in 2012 April sungin tuahkhin ding, atuahlote Bulldozer tawh nawksia ding cihpen mihaute in tuahzo mah ding a, mizawngte aa ding ngaihsutsakna anei hetlo, Sipuazi tamate nasepna ahi hi.  Mulkimna neilo Biakna makai pawlkhat leh thu kihteisaknapi mipi aa ding ageelsak ngeilo- Kumpi in mipi thupi sata leh mipi ngaihsun lo-in Kumpite cih aci tawntung ZOMI  pawl khatte hangin Kumpi thu ahilo, Myone, Pine panin Mi Lule pawl khat deihna banga apuaktoh uh hizaw a, Kumpite in hih Hantuah ding tawh kisai theilo ding uh hi.  Tu mahmahin U Thein Sein in theilo ding ahihmanin Kumpite thu hilo a, eisunga mi Lulete sepna ahi hi.

Tua ahihmanin hih Meeting panin tulaitak Hansaite tawh kimu dingin Holim Committee kiguang a,   1. Convenor - Sia H. Vum Za Nang (ZRDP)   2. Member  - Rev. Go Za Nang (Senior Pastor, AMC),  Sia Gin Khan Pau (DC Rtd), Rev. Hau Go Kham (Senioir Pastor, Emmanuel), Rev. Dr. Lang Khan Khai (Chief Editor, Zomi Times/ PLBC), Rev. Lang Suan Thawn (GS, KCC/ KBC), Tg. Zam Thuam (Siamsin), Layseih Mung (ZYA-GS) leh Rev. Kam KHen Pau ( Senior Pastor, SRBA) ahi uh hi.  Santa Hanvai Holim Committee in tukal sungin SANTA HAN TUAHLOHNA DING DEIHNA LAHNA - May Day (May 1) niin SNTA Han ah kinei ding a, Kawlpi khuasung Mediate leh SB 2 a kipan Kumpi , Galkap thukante kisam ding a, thungetna kinei ding hi.

Siampi ngahsa khempeuh in SIAMPI PUAN  silh ding uh a, tualote in ZOPUAN silh ding hi.  Zingsang nai 700 hunin kipan dinga, Deihna lahna leh thungetna kinei ding hi.  Tusungin pawlpi kim ah kizasak khin ta hi.  RC pawlpi zong Chrstian ahihmanin adangte tawh kipawl dingin kilam-en hi.  Kumpite in mipi aa dingin ahoih asepnop laitakin angsungthei pawlkhat hangin ulian laklawh pawlte sepnate KUMPITE SEP iksakha niloh hi.

Zomite sungah abuaihuai mahmah thu in Biakna makai khat zong hikei deuh veh aw tua Siapa, tua Topa pen cileng apawlpi agensia hisak pahpah a, thudik thuman om theilo hi.  Mimal akigen leh mimal hibek a, pawlpi tawh kisailo ding hi. Tuabang lungsim apua Zomite in Makaite sepna ahoihlo leh mipi gimna apia nangawn zong KUMPITE THU HI, MAKAITE THU HI ici pongmawk hi.  Ataktakin cileng Makai khat leh Kumpi icihte in mipi gimna piak ding sangin phattuamna apia thei nasepte sep ding hi a, mipite gimsak ahih leh gen ngam, pulak ngam ding hiizaw a, tuabang a ipulak ciangin kumpite leh makaite gensia leh langpang hilo-in mipi aa dingin apang asem hizaw hi.  Eimite Kumpite thu hi cih leh Kumpi langpanglo ding cih itelna leh adeihna kilehbulh hi.  Kumpi langpanglo ding icih ciangin mipi agim agentheisak thute semlo ding cih ahi hi.  Mipi deihna leh haksatna ipulakpen kumpi leh mipi langpanna hilo hi.

Democracy Ki-ukna ah Kumpi icihpen mipi aa dinga asemte hi a, mipi gimsakte hilo hi.  Lutdaw Amat (MP, Palai) icihte zong Kumpi lam ah apang ding hizawlo-in mipite haksatna Kumpite tungah agen dingte hizaw hi.  Kumpi lam ah apang, kumpi langpanglo ding ci a, amipite adonlote nidang ciangin kiteel nawnlo ding a, tu mahmahin zong mipi lam ah apanglo Palai(MP) peuhmah banghun cilo-in atawp thei thu hita hi. Nidangin Kumpite thu icih leh hoih leh hoih takei leh, mipi gim taleh Sia taleh mipi lam enlo-in Tungsiah ki-en a, tuhun cianginn Tungsiahte kiangah mipi haksatna agente PALAI MAAN- adeihhuaite ahi hi.   

Tuabang ahilote- Tungsiah bek en a, Palai angahna mipite gimna adonlote kideih nawnlo hi.  tuabang mahin Pawlpi leh Biakna makai/ Siate zong mipi haksatna enlo a, tungsiah maipha bek a en Pasian nasem Upate hun hinawnlo hi cih telhuai ta hi.

Gamdang atungte in zong hih havai tawh kisaiin Nipidaw ciang dong kipai ding ahihmaninn akisam sumlehpai ah ipankhop ciat nadingin Zomite leh Pasian min tawh kong thum uh hi. Hih Meeting tawh kisaiin tukal sungin akicingin hong kizasak kik ding hi.

 Kawlgam Zomite in  ZOMI COUNCIL  ahih kei leh, ZOMI HUMAN RIGHTS COMMISSION (ZHRC)  neih hun hita hi.  Zomitie hong kisimmawh mahmah a, hong kizothawh mahmah hibeklo-in i Zomite sungah Zomi gimna thuak ding phamawh asalo a Tungsiah lam pan hamphatna bek a ente hangin buaina atuak ihihlam thei ciatta ni.

Rev.Dr. Lang Khan Khai
Recording Secy
SANTA HANVAI HOLIM COMMITTEE


 


Comments




Leave a Reply

    Tungzang News

    All