WWW.TUNGZANGNEWS.COM

 
Picture
(TZN) - Tu sawng teng i buaipih mahmah ahi Kawlpi,Pinlong Veng sung a om Santa (Satawm), Khristian Han kituahsakna vai tawh kisai-in, Zomi Khristian khempeuh in tuah ding thukimlo uh ahih manin, mipi 20000 val in nialna/ thukimlohna letmat thuhna kinei hi. Tua letmat thuhna lai te Pu H. Vum Za Nang makai in Sagaing Division , Chief Minister U Tha Aye zumpi, Monyua khuapi ah April 27,2012 ni-in va puak cih i zaksa ahi hi. 

Pu H. Vum Nang' i laipuak pen Sagaing Division kumpi thunei pawlte' Meeting neih hun tawh kituak lian ahihman in Meeting hun sungah kikum suak pah uh cih kiza hi. Tua thukikupna tungtawn in Sagaing Division, khua sung nopcitna le khantohna lam vaisaipi Miniser U Tin Win in apulakna ah Kawlpi hantuahna ding vai tawh kisai thakhat thu in khawl sak kik huai lo ahih manin, thuzaksakna neih kik dingin pulakna nei cih kiza hi.

A hi zongin Meeting hun zawh khit ciangin, Ulian teng akikupna mawkmawk ah tua Han khinsakna ding thupiakna pen khawlsak/ phiat kiksak ding Chief Minister U Tha Aye  tungah kinga hi cih thu genkhopna nei uh a, Pu H. Vum Nang zong April 30,2012 ni mahin Kawlpi lam zuanin ciahto kik cih kiza hi. Hih Khristian han khinlohna dingin Kawlpi khuapi sung a teng Zomi(Chin) minam buppi kipawl in Santa ( Satawm) Han mual ngait ah May 1,2012 ( May Day) ni-in Thungetkhopna nasiatak kinei a, biakna Siampi khempeuh in Siampi puan vive silh cih kiza hi. Hih Han kituahsakna tawh kisai in Galkap kumpi hun 1988 akipan 4 vei vilvelm kikhinsakna hi -in, 1994 kumin galkap huang dingin khatvei kisusia in kikhinsak lai cih kiza hi.


Tua hi a, Zomite' i lunggulhna le i thungetnate Topan a sawt loin hong dawnna ding zong lametna le upna lianpi kinei lai veve bek tham loin, minam dangte nenniamna le simmawhna nuai pan suahtakna i ngahna ding i biak Pasian mai zongin mapang khawm in kipumkhat siam ding kisam mahmah lai ding hi. Zomi Khristian te i kipumkhatna tawm lua bek loin, ei le ei zum kong mang kongah biakna pawlpi vai tawh thusia kineih in, Zomi Pastor tampite zumkong mangkong ah i tut demdam nawn lohna ding mahmah zong nakpitak thungetna kisam lai hi. Kilemna Pasian in Zomi Khristian te sungah kilemna le daihna thupha hong tungsak ta hen.
http://tongsan.org/videos/viewvideo/531/general-videos/santhar-cemetery-praying-service-3.html
http://tongsan.org/videos/viewvideo/529/general-videos/santhar-cemetery-praying-service-1.html
http://tongsan.org/videos/viewvideo/530/general-videos/santhar-2.html


TZN: Source : Hornbill, Tongsan


 


Comments




Leave a Reply

    Tungzang News

    All