WWW.TUNGZANGNEWS.COM

 
Sial tat nung ah sial dai kai (Kalaymyo Han dai a kikai diam?)

Thupatna
Khangluite in “sial tat nung ah sial dai kai” ci-in paunak na nei uh hi. Huang sung, lo sung ah sial ta-in annkung teng ne in, mehteh mehgah teng a tuat cil khit ciangin sial dai kaih pan pen a phattuamna om lua nawn lo cihnopna ahi hi. Mihing pianzia zong sial tat nung ah sial dai kikai nuam pan sese hi. Tua pen thu tuamtuam hang zong hi kha ding hi. Hang tuamtuam om mah ta leh sial tat nung ah sial dai ih kaih khak leh a phatthuamna a om sak zo lai veve ih hih ding thupi veve hi.

Kalaymyo Han ah sial dai kaih ding vai
Kalaymyo Satawm Han kituah vai tawh kisai sial dai kaih ding thu hong om hi. Pu Cin Sian Thang in “Kawlpi” cih ding hi lo hi, “Kalaymyo” cih ding hi lel hi. Kawlpi ih cih ciangin Kawlte’ khuapi hong suak hi, ci ahih manin, ka hih zawh zah in Kalaymyo mah ci-in ka gelh tangtang hi.

2012 January kha pan kipanin Kalaymyo han ah misi vuai nawn loh dingin thu kipia hi. Madalay pan Kawl phonggyite in zong han ah Kawl ngeina tawh han tuahna pawi hong bawl zo uh hi. April kha pan kipan leuleu in, han pan han thak ah misi guh a tuah nuamte kha khat sung bek hun kipia hi ci-in lai a kisuan ciangin mipi honkhat in tuah ngeingai pah hi. Han tuahna hangin hanthak ah leitang manh khang zawzen lai hi. Leitang manh a khang semsem ma-in kituah mengmeng lehang a ci bang om hi.



Tua bang hun laitak in ZYA makaite in phungpi lam ah hih bangpeuh mah om thei lo ding hi ci-in, Han kituah sak vai tawh kisai tungsiah lam ah lai khak uh hi. Kam dawn a kizakna ah tungsiah lam ah lai khakna tawh kisai ih phungpi lamte in hih han tuah vai tawh kisai bangmah thu na thei ka lo uh hi tuak hi. Kalaymyo huam sung ukpi thunei tuamtuamte vaihawm hih tuak lel hi. Han lui ah misi kivui nawn lo-in han thak ah kivui vui khin bek tham lo-in luanghawm guh le tang zong tampi takin tuah khiakhia khin ta hi. A tuahte in lah tuah, a tuah nai lo teng in lah pangpha mahmah hi. “Han” cih kammal ka zang zawa, “Khan” cih kammal ka zang kei zaw hi. Banghang hiam cih leh “Han” pen ih han, ih kah, ih minsialna hi mawk hi ven maw? “Khan” cih kammal pen mangte in “room” na ci a, Kawlte in aKhan (tcef;) na ci uh hi.

Han pan guh le tangte tuah loh phamawh ding maw? Lo?
A tuahtuah khinte in tuah huai a sa uh zong hi pah lo hi. A tuah nai lote in zong a hun a lemteh tuah lo ding hi tuan lo uh hi. A tamzaw a tuahsate pen a kivui zawh a sawt khin a guh a tang lak ding a buaihuai nawn lo teng hi. A kivui zawh a sawt nai lote adingin kituah ding pen a thubaih hi lo hi. Bangbang hi leh kituah loh ding ih cihna a hang pen ih kivuina leitang ih leisa hi lo hiam? Human right...Galkap kumpi’ thukhun bel leitang neih khuan omlo, sep theih khuan bek om, cih hi lai se hi. ajr,mykdifqkdifcGifHhr7Sd/vkyfydkifcGifhbJ7Sdw,f/ခခ

Tua bang thukhun nengnengte hangin gam adingin kiciamna (usrf;opfpmusdefqdkjcif;) neih a kul ciangin a kiciam nading kammal khat hangin Daw Su in kidawm takin laih ding kammal na mu pah hi. Tua pen a omsa upadi pen ka kemcing ding hi, (wnfqJOya’udkumuG,fapmifha7Smufygr,f) cih kammal pen zahtaakin ka zui ding hi, (av;pm;vkdufemygr,f), cih kammal tawh laih ding thu ahi hi. Banghang hiam cih leh kemcing in ka zui ding hi, ci-in kiciam leh Daw Su in kumpi ong sep teh Upadi a laih theih nading vai tampi haksa sak ding hi. Tulaitak Kawlgam a kikhel a bat tei hangin Upadi pen puahphat ding tampi tak om lai ci hi. Ka kemcing ding hi cih kammal sangin “Zahtak in ka zui ding hi,” cih kammal tawh kiciamna pen upadi kilaih kizuun thei ding cih deihna hih tuak hi. Ahi zongin Tein Sein kumpi pawl in hih Daw Su te ii ngetna pen sang lo ahi manin, tu-in Daw Su in “hih a omsa thukhun ka kemcing ding hi,” cih kammal mah bangin kiciamna nei kik khin uh hi. Bangci ciang hong tung tam? Daw Su bel muang lel hang e…
Han pan misi luang guh le tangte tuah huai maw? Lo?

Kawlte in thawhkikna thu um lo banah tua bang thawhkikna tangthu zong nei lo uh hi. Tua ahi manin Kawlte a sih uh ciang a tam zaw mei tawh kihal ziauziau uh hi. Amau adingin han kituah ta leh kituah ta kei leh bangmah awlmawh nading om khol lo zaw deuh hi. Christian te in bel a thokik pa Jesuh Khrih le thawhkikna tangthu nei-in um ih hih manin, Jacob le Joseph te pata mah bangin tua a thokik ding ih guh ih tangte zong manpha a sate ih hi hi. Christian upna maan ih cih pen guh le tang a hih theih laiteng kaikhawm tangtang ding hi zaw hi. Tua ahih manin thawhkikna thu upna a nei ei Christian te adingin Han pan kituah loh a phatmawh leh ih misipa ih misinu’ luanghawm guh le tangte tuah huai hi. Pasian in guh le tang kihal vuite zong tho sak lah ding ahi loh hangin ih upna in hong gamta sak a cih bangin, Christian te ii ci le sa sungah hong teng thawhkik upna hangin ih luang kipham in, ih guh le ih tang a kituah tangtangte ih hih lam kiphawk pha ciat ni.

Hankuang kalkham in guh le tang a lakhia Zomi innkuan khat ka va et leh, a hankuang hongkhia pa kiangah a misipa’ sanggamnu in, “a om lai mah na?” ci-in donga, a hankuang kalkham pa in zong, “om lai mah lo dia,koi lai ah tai ding sa na?” ci-in kidawng uh a, ka nuih ong za mahmah hi. A dong nu in, Christian khat ahihna tawh thokik khin ding a sa hi a, a dawng pa in, Topa Jesuh ong pai kik nai lo pi om lai sam mah lo dia, a ci tawh kibang kasa hi.

Sial tat nung ah sial dai kaihna tawh tuibua sa kiluak kik thei lo
Hih Kalaymyo han tawh kisai in, hihci ciang thu piang khin ahi manin, tungsiah ah lai ih gelh leh hun khat teitei ciangh tuah loh hong phamawh veve ding hi mawk ahi ciangin, ih leitang manh le ih sum ih paii bei zah ding ban ah hun le ni tawh kisai deih zek theih nading (right) tawh ih gelh siam leh hong pilvang vai ding a, tuah loh bikbek dingin lai gelh-in thu ih sun leh sial tat nung ah sial dai kai ih bang bek kha ding hi. Han tuah ding tawh kisai thu le la ih zak hiauhiau phet in khauhtakin a pang pah hi lehang phamawh lo a, tun ih khauh nop, ih thumaan nop, ih hangsan nop hangin tuibua sa a luah kik sawm tawh kibang pian hi. Kumpi lamte zong amau le amau mah hong ki-angvan veve sim kha ding uh hi.

Zomi te in hih han kituah vai tawh kisai pilvangna in nei a, mai lam ah thu khat peuhpeuh ah ih lungkim kei ding leh hun lap takin sial tat ma-a sial dai a kai siam lianliate ih hih ding hong thupi zaw ding hi. Tua ahi manin Zomi sungah thukan siam le thukizakna manlang (good media) ih kisapna hih thute pan ih kithei pah hi. Tua mah bangin mai lam ah kiginkholhna dingin thupiang khat hi. Tutung pen a khah suah pak hi phot hang ci-in ih lak siam leh tutunga sial tat nung ah ih sial dai kaih khakna pen hong guak suak tuan lo veve ding hi. Sial dai kaihna tawh tui bua sa kiluak kik thei lo hi mah ta se leh hong piang lai ding thute ah dai a kai khol pah lianlian theite ih hihna ding pilna hong pia khat hi veve ding hi.

Sial tat nung ah sial dai kaihna tawh mai lam ading kiginkholhna piang thei veve
Kawlte in thawhkikna um lo. Christian te in um. Tua ahi manin, Kawlte in han vai tawh kisai in Chrisitan te hong bawlsiatna uh tawh kibang. Tua banah Kawlte’ sum zonna tawh zong kibang hi. Minam vai tawh kisai in hong simmawhna uh zong tawh kibang a, Zomi kithutuak lote hong kihtat lohna uh zong kilang sak hi. Guh le tang tuahte le tuah lote vai tawh kisai ah a kithu tuak lo ih hi hiam? Hi khin pah lo hi. A tuahtuahte in tuah loh dingin makaite in a hunlap in vaihawm zo leh tuah nuam masa het lo ding uh hi. Tua hi in hun lap nawn lo thu sungah thu kician zakna mel om zolo ahi manin a tuahtuah tawh a tuah nai lo tawh ih om hi. Tuahloh ding vaihawmna pen Zomi te’ kithutuah theih lohna hih “sial tat nung ah sial dai kai” pianzia tawh ih khuasak hang na hi zaw gige den hi. A zenzen in, han hih zah in kituah khin napi ei a cian laiteng adingin tungsiah pan tuah nonlo ding, tua bangin koih suak ding hi. Dai na kai un, ci-in thupiakna om mah leh zong hun khatteh ei Zomi veeng teng mah adingin hong nuammawh hong nawng kai mahmah dinga, ei teng mah ih kiphul suk ih kiphul tohna mun hong hi ding a, tua ni tua hun ciangin Zomi te sungah kithutuah mawh nading thu khawng hong leh suak kha leuleu ding hi.

Tua ahi manin han pan guh le tang han thak ah tuah ding lamah zuihna pen kithutuahna maan ahi kei zaw kha tam? A tungah ka gen mah bangin, kituahna sum bei, leitang manh, hun le ni, tha le ngal tawh kisai hamphatna pen kumpite tung pan ih nget vet ding hoih ka sa zaw hi. Nial hi nawn lo zawin, ngen ih hih vet ding hoih zaw hi. Religious right, national right le human right tawh pansan la-in ih gen siam ih suut siam kul zaw ta ding hi. Tua bang lam ah nakpi tak in pangvet zaw lehang tanglam zaw ding hi. Sakhi man lo ngaltang tum het lo-in, ih mat zawh ding thute tawh a piangsa thu zui-in pangkhawm semkhawm zaw lehang ih nahlawh hong pek zaw kei kha diam? Hong ci giap ingh e… Han kituah khin pen tuah loh dingin a nial kha ih hih het loh ding pen a thumaan hong hi khin ta hi. Ahi zongin han hong tuahsakna uh thu tawh kisai thu kanin, thuak dinga kilawmte in thuak ding, kumpi lam pan zong huh ding le sik dingin kilawmte hong sik hong piak hong vaihawm sak nading uh le mailam ah Zomi te hong hai bawl ngam nawn loh nading un nakpi takin panmun ih lak mahmahna kahlei dawl masa ih suah sak zawh ding bel thupi mahmah ding hi. A kingah theih nading thute le a kizawh theih nading vaite kancian phot, theihcian phot kul ka sak mahmahna thu kei muhna ong hawmsawn hi ingh.

Theihsaknopna lianpi tawh,
Evan. Suang Dal

 


Comments




Leave a Reply

    Tungzang News

    All