WWW.TUNGZANGNEWS.COM

 
Charity Begins At Home (Inn Gua Hah Masa Ding):

Zomi Paunak ah, "Inn gua hahlo a gam gua hah" cih na nei uh hi. Zomi i cih eite ihi hi. A gennop pen in "Inn gua hah masa ding" cihna hi. Inn gua acih uh ciang Zomi upate in inn kiim ah a kicing guate a cihna uh ahi hi. Gua akisap ciangin gamsungah a po te sangin olno taka akisat thei ziau inn kiim a te manpha zaw hi, cihna hi. Inn kim ah a kisuan guate pen a nei om diudeu a, a neite kiang pan kingen in kizang thei hi.

Gua pen Zomi te nuntakna ah kilimzat mahmah a misi om leh a luang zawnna dingin kizang hi. Cina damlo khat om leh khuadangah puak kul leh gua tawn mah tawh kizawng hi. Sa man, sa ai, gal ai omleh gua tawn kizang hi. Mithupi sihni hileh sawn leh dial teng khaina dingin gua mah kizang hi. Vai tampi kiginkholh loh a tuak vat theih ahih manin gamsunga om gua pen kila manlo, kila man mah leh gamla, haksa zaw ahih manin inn geia om khat pen tangzang zaw, baihzaw hamtang hi. Tua manin inn gua mah puah masak taak, kep masak taak cih tel mahmah uh hi.

Khuakhal ciang zong gua pen a teh keu kia in pulh a, mei paisuak leh kaang tum pahpah hi. Tua banga mei lak pan a suahtak theihna dingin a kiim a phung teng kihahsiang, kivatsiang in gamkang, meikang lak pan a bitna dingin kikhoi hi. Gamsungah omte kihah khin zolo a, zong gamkang peuh tawh na kangtum tum thei hi. Gamkang in nawk kha leh gua pen a phungpi in kangtum in si cip thei a, a dawnsuang kik ding a om kei leh a bei himai hi. Zomi te nuntakna tawh a kizom mahmah gua pen deih hun, kisap huna zat ding a omlo cih pen a nawngkai mahmah khat ahi hi. Tua manin gua phung i hah ding leh zong inn kiim gua phung hah masa ding, ihih zawh leh gam gua hah pan ding cih na thupi bawl uh hi.

Tua bek hilo in Zomi te nuntakna ah gua pen a thupi mahmah, paunak ah zong na kizang kawikawi hi. A kizang theite a omloh ciang a taang ding khat om teitei cihna in, "Sing omlohna ah zong gua kizang" cih bangin na 'gua' (bamboo) pen paunak ah na zang uh hi. Chinese te in zong gua pen thupi sim mahmah ahih ciangin Chinese te tawh i kinaihna khat teitei bel (i theih nawnloh hang) om pelmawh ding hi.

Zomi te nuntakna pen sing leh gua omlo in bucinglo a, a hitheilo ahi hi. A diak in mualtung i kahtoh ciang sing leh gua tawh kipeh in kizom a, alo in ki omtheilo hi. Banghang hiam cih leh inn ding, seng ding, bawm ding, lawh ding, ciang ding, lawhpi ding, ann saal ding, lupna ding, tutna ding, nopni dahni ading, leh a dangdang ah sing leh gua kizang den a, sing khit ciang gua pen a thupi penpen ahi hi.

Tua manin Zomi te nuntakna ah GUA pen a thupi mahmah ahi hi.

Paunak in a deihna, a khiatna:

Zomi upate in leitung mipil te ngaihsut dan mahin thu na ngaihsun thei uh, thu na mu mahmah uh ahih manin amau nuntakna mawlcik, singnuai gammual ah sa leh gal lak ah a nuntak uh hangin 'nuntakna a manphatna' (life value) pen na mu cian mahmah uh hi cih kithei hi. Nuntakna a manpha, nuntakna kicing, nuntakna man nei a cihte uh pen amau nuntakna in a innkuan sung, a veng sung, a khua sung leh a gam leh mite adingin a manpha ahi ding hi cih na tel uh hi. Tua sungah a masa penpen dingin eimah ciat i kikepzawh phot kul cih na tel mahmah uh hi.

Mipilte in, 'mizawng te adingin a hoihlo penpen in na gamtat theihdan nam khat bek om hi, tua pen - nang zong mizawng na suak suk ciang ahi hi,' na ci uh hi. Mizawngte huh nuamlua kisa in na neih leh lam teng khempeuh hawmkhia khin dingin nang zong mizawng suak lecin tua pen mizawngte adingin a zakdah huai penpen ahi hi cihna hi. Mite huh ding mikhat, innkuan khat kibehlap ahih manin amau zawnna a behlap suak cihna hi.

Vai khat peuh ah ei leh kikemzo masa leng, a dangteng hong lemtoto hi. Nang leh nang kikemzolo, kivakzolo, kihuaizolo kimlai midang na huainop, na vaknop, na kithukhualsak doidoi leh na veng leh pam, khua leh tui leh beh leh phung sungah vangik dang khat a guan kikpah ding na hizaw hi. Nang kikem phot ding, tua ciang midang konlawh pan ding ahi hi, cihna hi.

Khuasung vengsungah:

Khua khat ah tua bangin eima innkuan ciat a kikep khit ciang a kikhai lah deuh khat leh nih a om leh tuate huh huan leng khuasung khaikang zo pah ding hi hang. Beh leh phung sungah zong tua banga kikhai lah deuh a om leh ei innkuan ciat i et khit ciang huh phei lehang kikhai kang pah ding hi. Pawlpi sungah zong tua mah.

Politics ah zong:

Zomi kua hiam cih tel mahmah phot leng koi ciang huam ding, koi ciang khual ding cih kitel pah ding hi. Zomi teng kikem phot ding, Zomi huang pua sai nuam masalo ding, Zomi ahilo te buaipih masalo ding. Min hi in, nasepna hi in, vai khat peuh ah Zomi tawh kisai khempeuh sem khin phot ding, tua ciang a gal i kah zawh leh sem ding. Zomi sung zong huai zo nailo, Zomi sung zong kikhai zo nailo napi a gal khat lam i mitsuanpah, i galkah pah sawm leh a vangik suak ding pen a thuak ding midang hilo a Zomi mah hiding hi.

Tua manin Zomi kua hiam cih tel mahmah phot ding. Zomi maban bang hiam cih tel mahmah kik ding. Bangteng kisam hiam cih tel mahmah leuleu ding. Zomi khantohna ding, Zomi nuntakna ding bangteng kisam cih tel mahmah phot leng - a dang min leh puamte, kipawlna leh kiukna te cihte a banbanin hong paito ding hi. A ZOMI mahmah dingkhia nailo, dingtang nailo in a guh ngek lai, a khangcing panpan in midang konlawh nuam sese leh amah mah in bahlawh kik in a dingkhiat kik nading in hun saupi kivei kik leuleu ding hi.

Tua ahih manin - Zomi aw, Zomi mah khual phot in. Zomi mah khoi phot in. Zomi mah kem phot in. Zomi mah pattah phot in. Zomi mah lamto phot in. Zomi mah laisiam sak, sum hausak, pilsak, khangkhan phot lecin, nangmah Zomi na angtang dinga, Zomi bek hilo midang namdang nangawn na huhzo ding hi. Nang bangmah hi nailopi in midang na huainop doldol leh bel "inn gua hahlo a gamgua hah" hong hidinga, "Charity begins at home" cih hong hilo ding hi. A khangto gam leh minam in amau leh amau kikem masa uh hi.

Gentehna pawlkhat:

Bill Clinton in US President a kah ni in a thugenna ah, "America mite aw, i gam mahmah a thakhauh mahmah phot kei leh gamdang te tawh nasepna vai khat peuh ah thakhauh theilo ding hi," ci hi. A gen zelna ah, ei bek i thahat khit ciang gamdangte tawh kizopna gina leh hoihtak i neih zong kisam hi ciin gen a, "Gamdang te tungah i thakhauh zawh kei leh ei gam mahmah ah zong kithakhauh zolo ding hi" na ci leuleu hi. Ei bek i thahat zong hoihlo a, i thahatna pen gamdang tawh kizopna asuak ding hoih hi. Gamdang namdang i  makaih zawh ciang ei pen a thahat zo taktak pan cihna zong hipah hi, a cihnopna ahi hi.

Thukhupna:

Zomi te zong:  Zomi a thahat mahmah mateng Zogam thahatlo dinga, Zogam thahatlo ding hi. Zomi leh Zogam a thahat mahmah khit ciang lawm leh gual leh namdang tawh kizom leng i thahatna mite in thei pan ding hi. Ei mahmah kisatsuah masalo, kiging nailo in midang khawng i huaisawm, i konlawh sawm leh kihih zolo ding hi.

Tua ahih manin Zomi in Zomi mah huai masa ding, Zomi mah picingsak phot ding, tua khit ciang a banban in hong piangpiang ding hi. Tu laitakin bel Zomi te in - "Inn gua mah i hah masak ding hi."

Charity begins at home.

Hau Za Cin

Phuitong Liim

www.hauzacin.blogspot.com

 


Comments




Leave a Reply