WWW.TUNGZANGNEWS.COM

 
Picture
Thang Do Hang (International Tongsan Consultant)
Khatvei lai in Zomi a ki-itsak mahmah siapa khat in, biakinn sungah a thugen kawmin minam itna ding thu zong gen hi.  Zomi ih hih manin Zopau Zola tawh Pasian thu genin, Pasian phat ding hi hang. Minam dangte pau (Kawlpau, Mangpau..etc) khawng pau thei taktak mello,kitel mello pi khawng a Zomi vive kikhopna sungah i pau/ i zat pen hoih lo hi ci-in gen hi. A gen kawmkawm mahin, " lakhat hong sa ning" ci in Mangla khat ong sa mawk hi. Mangpau manglai pen ei la danin ngaihsun kha mawk a hi tammaw ka ci hi.

Tuhun ciangin minam khanlawhna pi khat a ong tung ta ahih manin, Zomite' sungah minam Zomi,Zolai le Zongeinate ki-it zaw in zat ding le kepcing ding kihanthawn mahmah ciat hi hang. Tulaitak ciangciang khangthak sungah pawlkhatte bangin i Zongeina a thei cian kha nai mello khangno dangte akihilhnop laitak ahi hi. Tua bang kawm kalah ei mahmah in ih ngeina leh ih paute kep sawm loin lam a pial sawmsawm lam kimanawh tawh kibang kasa gige hi.

A poi kasak khat le ka lunghimawh mahmah thu ah Zomite sungah i mipil pipi, Sia takpi, Zomi nam it mahmah veve pawl khat adiakdiak in USA ah gammi (Citizenship) khawng a ngah pawlkhatte in a min kilam dangpi khawngin alaih om kiukiu mawk hi. Tulai tak a Malaysia pan i phuahtawm UN min ih cihte dan lah hi het sam lo, min tuampi khat peuh tawh ong kipulaak thei mawk uh hi. Na min ka theih ngei tawh kibang nawn kei si  ci in  vadong mah leng limtak ong hilhcian liang uh hi. Tua a minphuah uh pen lawh hak, telcian haksa le ciapteh haksa phial mawk takpi hi.

Tua ahih manin Zomin taktak pen i pupa ngeina khat om khin ahih manin, telhakna ding om lo hi a, i mipi mah asapna nuam ziau lel ahi hi. Tua bek tham loin, mipil masa pawl khat bangin Khristian min (Christian Name) cih bangin diktak ( Official) ahi khollo min mai ah Mang min khawng na bulh zanzan thei uh hi. A mau thuthu bel hi peuh mah lua zen hi. A hih hangin Biakna ngeina hang khawng a hih liang kei leh bel ih minam ngeina akem lo kihi gige na hi zaw hi. Gentehna: Sia Thomas PPP, Sia Eddie QQQ, Sia Simon KKK, Sia David TTT ...cihte pen ngaihsutna tuampi kasa hi. Minam dangte a hi tuan sam lo, ei min lah hi lian lo, a tate bang uh Laisiang tho sung a min hoih tata pawl khat  bulhsak pawl khat bang om hi hang. 

Zomite pen gamdang ih tun teh i minte pen minam dangte min tawh kibanglo ahih manin, miten tel hak ong sa leuleu hi. Mite tel nopna dingin ih min laih pahpah ding maw? Ih ngeina zong laih pahpah ding maw? Minam dangte dan suak pahpah ding maw cih ngaihsut huai kasa hi. Minam dangte zong tawh ih dan leh ih ngeina akibatna zong tampi om lel hi. Western lam mite' a zui ding maw, Sen (China) te zuizaw ding maw ? I ngeina kem zaw ding, khang thakte ih hilh main, ei makai / mi masate kikhel masa pah malam ding? cih mimal kim kidong masa nuam hi hang. A hi zongin, ih ut peuhpeuh kua ma' kham theih hi zenzen lo zel hi. Tua a hih manin pawl khat ong lak suk leuleu ning.

Zomi ten min tawh kisai-in, minpi ih nei a kinosapna hoih nono zong ih nei hi. Tua mah bangin mangkang ten minpi nei in min no zong nei hi. Gtn:  Cin Za Hu Pau a minpi hi a, a nosapna minno pen Pauno a hi hi. Lengtong la ongsak ciangin Lengtong Pauno kici hi ciphot ni. Zum lai khat bang khatah official in min kikhum ding hi leh Cin Za Hu Pau kici ding aa, a pua lamah ih sap teh Pauno / lengtong Pauno ci hi hang. Tua mah bangin minam dang mi min thangte lakah zong USA mihau pen pa bang zong aminpi pen William Henry  Gates IIII  hi a, a kitheihna a minno pen Bill Gates, (William =a tom lakna in  Bill ) bill gates bekin kithei zaw lel hi. Hih te gel ih etkak ciangin Minpi leh Minno ih neih tuakna kimu thei hi.

Tua khit ciangin min masa, laita min tawpna cih zong kineikhawm hi. A mau belin Min masa pen min neipa/nu min hi-in,Beh min khawng kiguang mawk lo hi. min tawpna pen Pate min,Beh min, Pu te' min ci zaw ding ih hiam khat na zang uh hi.Min lai ta bel a guan nop peuh uh hi.Min tawpna ah minam min, gam min khawng bel na zang liang kei uh cih ding hi.

Zum ah form fill up na khawng ah pen  First Name( Min masa)  Middle name( min laita) Last Name ( min tawpna) ci in ong dong lel aa, min tawpna pen Beh min ci aa ong dotna om lian lo hi.A mau in min tawpna ah a Behmin,a Pa' min, a Pu' min a guang na hi zaw uh hi.A mau ' ngei na hi leu leu lel hi. Ei lah a mau minam lah hi pah lo hi ve hang maw,ih minam ngei na kepna ding ka cihna hi. Ei min mal thum neisa ten First name, Middle name Last Name teng pen Min masa Min Laita min tawpna at suk pah ziau theih hi lel hi. Buaina om khol kei,Citizenship zong ong ngah sak lua lel. Ih pu ih pate min ong phuahsak pen ih neu lai aa ong phuahsak ahih manin i kepcing zawh ding kisam mahmah hi. 



Tua dan hi leh tate min ih phuah dan ding kingaihsun thei pah dinga, Min tap lah kineisak thei veve, min laihte in lah nei veve, beh min lah kiguang thei veve dingin bawl theih hi ta hi. Gtn: Man  Siamlun Gualnam  cih min pen kihel kim mahmah hi. "Man"  a (first name )pen a pi min tawpna a tappih min hi a, Siamlun (Middle name)pen a deihnate a sut/ a tap nop na hi in, Gualnam ( last name) pen a beh min a hi hi. Hih min pen min nei sa gige a khel hi lo in, a suah tung pan a phuah pah a hi hi.Zang thei leng hoih sa ing. Ih ngeina lah paii lo,Gam dang dan lah ki zang thei pah hi.Mang min bial bual a koih te khawng bel, Kawl te ui khawi khat Maung Ba ci aa  min piak tawh ki bang sa ing.

Tulaitak a UNO Secretary Mr. Ban Ki Moo in a ma S.Korea min mah zang lel a, Al-qeada makaipi (Osama Bin Laden) in amau min mah zang hi. Tua banah Rajiv Gandhi in zong a mau min mah zangin, Daw Aung San Suh Kyi in zong Linda Sophia Suh Kyi ci-in mawk laih sese loin, minam dangte in a mau min ciat tawh sam/lo thei veve hi. Mary, Joseph, Samuel pu pa phuahsak a hi lo ei leh ei kiphuah  cihte bel thu tuamtuam hang  a zang nuam ten a mau thuthu hi sam kha mah ding hi. Tua hi in, ih minam ih it a, ih ngeina ih kepnop leh ngeina kem dingin mite thu ih hilhnop leh, ei leh ei mimal ciatin, bang ciang minam ki-it a, minam bangci danin kem cihte ngaihsut huai mahmah thu ahi hi.

TZN: By: Thang Do Hang (International Tongsan Consultant)
Miami,Florida
USA


 


Comments




Leave a Reply