WWW.TUNGZANGNEWS.COM

 
Picture
Tualkhiang Tangval khat India Galkapte in Man
Zogam Cikha Tsp., Tualkhiang khua ateng Pa Go Thang tapa Tg. Gin Suan Muan pen Suangdai khua a om India galkapte in March 14,2012 ni zankim laitak in khua pan manin kaikhia uh a, koi lamah paipih/koi mun ah kem/ koih uh cih thuzakna om nai lo cih kiza hi. Muan huai mun pan thukizakna danin, abeisa March 9,2012 ni-in, Lamka pan motor neukhat Suangdai khua ah pai-in, Tualkhiang khuami Tg. Gin Suan Muan le khuami mah ahi tangvalno khat mu nuam in apai danin kigen hi. Tua India galkap kicite pen akigenna-ah Churachanpur District Students Union (CDSU) kipawlna pan ka hi uh" ci-in kigen uh kici hi. India galkapte in tua mite leh motor pen, Tualkhiang khua ciang paisak loin, Lamka lam ciah kik sak uh hi.

A beisa March 14,2012 ni-in, India galkapte Tualkhiang khua-ah pai in, bang hangin tua mite in tua tangvalnote munuam uh ahi hiam? cih paulap in, thudong nuam in sam khia uh cih kizasawn hi. Hih thu tawh kisai-in, Churachanpur District Students Union(CDSU) sangnau pang kipawlnate kidong pah a, SDSU te in " Ko, tua bangin kua mah ka sawl kei uh a, zong ka theikha kei uh" ci hi. Tua banah hih vai tawh kisai in, Lamka a om India Army Officer pa kiangah dong ding hi ung " ci in agen kikna thute uh Tualkhiang tanaute kiang pan kiza hi.

Tg. Gin Suan Muan pen mihoih mahmah khat hi a, khuamite deihlona zong asem ngei het lo mi khat ahihna thu kiza hi. Tualkhiang khua pen India tawh gamgi bul takah om hi-in, Motor lampi zuih khak khua ahih mah bangin, buaina tuamtuam zong om thei tawntung ci hi. Meitei singnuai mite hangin India galkapte leh singnuai mite i muanmawhna tuamtuam zong tuak thei zel uh hi.  Abeisa kum 1 lai in zong Manipur singnuaimite leh India galkapte kipawlin khua sungah lut uh a, khuamite mi nih si dektak in satliam ngei uh ci hi.  Tua hi in, abeisa hun khat lai a thupiangte hang leh tulaitak a thupiangte hangin, Tualkhiang khuamite in lungsim patau/ gim takin om den uh cih thu kiza hi.

Thupuak : Sia Min Thang ( Tongsan Reporter of India )


 


Comments




Leave a Reply