WWW.TUNGZANGNEWS.COM

 
Executive Committee panmun awng (1) alen ding Makai kiteelna, March 2012
 
March 17, 2012 ni a kibawl Zomi Innkuan USA, Board Meeting sung pan Board Member-te thukimna bangin Executive Committee panmun awng (1) alen ding Makai kiteelna pen March 18, 2012 ni panin March 24, 2012 ni kikaal sung in BalltBin pan Online Voting System zangin kibawl zo hi.
 
Kiteelna ah Vote pia thei ding Board Member mimal (51) kipha a, (38) in Vote khia in, Vote khia phazah pen (75%) cing ahih manin hih kiteelna lawhcing hi. Board Member sung ah US gam sung a om Zomi Innkuan kipawlna (29) panin akah Tangmite (Representatives) leh Executive Committee panmunlen teng akihel ahi hi.
 
Kiteelna ah Board Meeting sung pan mipi in teeltheih ding in a kipsak, Zomi Innkuan Oklahoma kipawlna President Rev. Pau Khan Mung leh Zomi Innkuan Portland kipawlna Advisor Rev. Zam King Mang-te gel sung panin Makai khat teel ding ahi hi.
 
Board Member-te Vote piakna tungtawn in Rev. Pau Khan Mung in Vote tang (27) 71% ngah a, Rev. Zam King Mang in Vote tang (11) 29% ngah ahih manin, Rev. Pau Khan Mung pen ZIUSA EC panmunlen dingin teelcing (elected) ahi hi.
 
Rev. Pau Khan Mung in 2011~2013 kum a’ding a omlai hun sungteng ZIUSA Executive Committee panmunlen tengtawh ma hong pangkhawm ding ahih manin zahtakna tawh kimuak hi. Hih panmun a awng pen Dr. Thuam Cin Khai alet panmun hi a, ama’n ZIUSA kipawlna kivaipuakzia sang theilo ahih manin, panmun pan akhawl ahi hi.
 
Rev. Pau Khan Mung pen 2012 Zomi Khawmpi USA bawlna ding mun ahi Tulsa khuapi a bulphuh, US gam sung ah a thahat pen Zomi kipawlna, Zomi Innkuan Oklahoma President panmunlen ahih manin ZIUSA kipawlna maban kalsuanna ah ama hangin kilawhcing tuam mahmah ding hi.
 
 
Executive Committee
Zomi Innkuan USA
 
March 28, 2012 
 


Comments




Leave a Reply