WWW.TUNGZANGNEWS.COM

 
Pu Kam Lian, ZNC Upate leh Laisim U le Nau,

A masa in ZNC party ong dingkik cih thu i zak man in i lungdam hi.

Tuma sawtlua nailo a ASSK thugenna ah gamgi dung a teng mualmi, minam teng a mau leh amau ki-ukna, amau’ vai amau mah in a vaihawmna cih Panglong thukimna thu ( Federal vai ) limgen mahmah hi. Tua khit ciang in 2008 constitution sung a thu om tampi damdam a laihding thu gen hi. Kawlgam ong kikhel hiaihiai ta hi. Nuntak gim nam deuhdeuh ta hi.

A sawtlo a kitelna ah NLD leh ASSK in kuang lui ding uh hi. A luina peuhpeuh ah zo lel ding cih pen theihsa ahi hi. 1990 kum kiteelna hun lai in mipi nautang lak bek hilo in galkap huang sung nangawn ah NLD in zongei khin hi. Tua hun lai in, ASSK in kuanglui khalo hi. Tu-in amah (ASSK ) mimal mahmah in kuanglui ding hi-a zo ding hi. Tua bek thamlo in tu-a Parliament a omsa MP tampi tak zong a party a khel hetloh uh hang, ASSK cih bangbang dotkik omlo a azui lian ding, a simtham a thulkimna vote kikhai ding hi peuh leh a support ding pen a tamzaw hikhin ding in ka um hi. Tua ahih man in Parliament ah thugen hun ding ong ngah peuhpeuh leh acih bangbang ong piang zatzat mai ding hi.

Ong piang ding thu ka upmawh dan ong gualsuk dih ning ei.

1)      April 01, 2012 kitelna  ah ASSK leh NLD in seat khempeuh zo ding, ngah ding uh hi.

2)      ASSK Parliament ah thugen ong kipan ding a, 2008 Constitution a banban in ong khel ding hi.

3)      A tawpna ah, Federal State leh Central Government kizopna ding zia le tong teng ong geel khit ciang tu-a State teng Federal ki-ukna dong ong tun ding hi. Tua sung ah tu-a zanggam a “division” teng zong state mah ong suah ding hi. Banghang hiam cih leh Gam khat sung ah ki-ukna nam 2 ong omsak hetlo ding in ka um hi. Division khempeuh “Kawl State” cihbang miaimuai lah om theilo ding hi.

4)      Tuaciang in Kawlgam pen Federated State 14 tawh kilam Union Gam ong suak ding hi. ( India gam ki-uk dan ong kibang ding hi. )

5)      State khempeuh in amau’ State ciat ah thuneihna ong nei ding uh hi. State Kumpi kinei ciat ding a, Chief Minister leh Cabinet kinei in, State Parliament / Legislative assembly ki nei ciat ding hi. Hih State Parliament / Legislative Assembly in ei’ State ciat ah vai khempeuh ong vaihawm ding hi.

6)      Tu-a I neihsa MP constituency leh Upper/ Lower housete a ngeina mah in omsuak ding a, tua pen Central Government ong hiding hi. Central Government ah Ministry teng zong a ngei mah in om veve ding a, ahi zong in State kumpi tawh na semkhawm ding cih ong hi bek ding hi. Koimah ah Direct in na semlo ding uh hi.

7)      Tua kawm mah in State ciat hiam, ahih kei leh aki naihuai state 2 maw 3 cihbang huam in Governor ki nei veve ding hi. Tua Governor in Union sung a I neihkhop, gtn.. Galkap, Customs, Immigration Authority…cihbang thute sai ding hi.

Tua ahih man in tun Zomite in i lunggulh den ahi ( ZNC lungtup ci-a i gengen, Federal ) State Kumpineitakpi ta ding hihang. Ei’ thu in ei le ei kiuk ding, ei’ vai eimah in hawm tading hi hang. I minam a it taktak akhual taktak te-in tua State Kumpi ah vaihawmpen tutna, thunei dinmun i tuhngah ding thupi ding hi. Tua ahih ciang bek in igam leh minam a’ding in nasem taktak zo/thei pan ding ihi hi. Opposition party a om a, ihan‘ han‘ pong tawh na hoih thupi kisem zolo ding hi. “ A-ngen” hilo in “A-pia” dinmun I tuh ding ahi hi. Tua ding in tu-a kipan I kigin, I kithawi loh a phamawh hita hi.

Tua hun ciang CNFte zong Party khat ong hiding a, kuang onglui ding hi lel hi. ( Mizo gam a MNF dan hiding hi ). Galkap thautawi cihbang hi theilo ding hi. Hiam leh molhtum tawi a thuneihna, gualheuna a ut uh leh gamnuai ah a kileh kik uh kul ding hi. Kitelna ah azawh leh State kumpi ong semding hibek ahi hi. Tua ahih man in hihte lungbuaipi huai hetlo a, ahi zong in hihte’ hang a I minam sung ki taiteh a, ki phukha zelzul a, I buai khengkhang pen a lung hihmawh huai zaw thu in ka ngaihsun hi.

Tu-in Zomite in I buk mun I keek loh phamawh ta hi. Tedim, Tonzang, Cikha cihbang bek tawh hitheilo ding hi. Banghang hiam cih leh State Kumpi I neih tak ciang, Tedim, Tonzang leh Cikha gamteng bek ah I zawh hang State Kumpi ke sem zolo ding hi. Kawlpi, Tamu, Khampat cihte lah Sagai State ah kihel ding ahih man in, hihmunte ( Sagai State sung ) ah I zawh hang I Zogam a’ding bangmah ki semthei tuanlo ding hi. Tu-a Zogam ( Cikha pan Kanpalet/ Paletwa ciang ) sungteng pan a kiteel State Parliament / State Legislative Assembly ah member mun 50% sang a tamzaw I ngah / I zawh kul ding hi.

Tua ahihman in ZNC General Secretary Pu Kam Lian leh ZNC phualpi makaite in nakpitak ma ong pang a, Tedim, Tonzang, Cikha bek hilo in, Falam, Rih, Haka, Thantlang, Matupi, Mindat, Kanpalet, Paletwa khuapi te ah zong ZNC zum hong a, gualzawh I sawm ding nong ngaihsut ding uh iki hanthawn nuam hi. Banghang hiam cih leh Tedim,Tonzang, Cikha icih teng pen Zogambup pi ii ¼ ( or 25% ) bek ahi hi. Mun khempeuh ah kuanglui ding a kigin’ kul ding hi.  A tawmpen 50% I zawh kei leh kumpi thunei kisem zolo ding a, I gam a’ding in I kambek ong hiding a bangmah ki sem zolo ding hi. I gil kial ding hi. I gam keu ding hi. Mi I eng ding hi.

Federal State ngah taktak le’ng i-gam i-lei ei’ deihbang a i-puah zawh, i-puahtheih takpi nading in i-maban sah mahmah omlai hi. Gamsung gampua ( Zogam pualam ) a om Zomi khempeuh in zong, Gamsung a om I sanggam u le nau tawh pangkhawm in, I hihtheihna ciat pan ngaihsutna, sum le paai leh thagui thatang tawh pangkhawm in hanciam ding hihang.

Topa I Pasian in Zogam leh Zomite Thupha ongpia ta hen!

Gam leh Minam itna sung ah note tawh….

Pau Khat Suan

Tuithang

 


Comments




Leave a Reply