WWW.TUNGZANGNEWS.COM

 
Picture
Rev. Kham Do Thang (Thangno) Pastor Myanmar Mission Church Florida, USA www.mmcflorida.com
Dear Zomi khempeuh,

Topa kiang pan lungnopna leh daihna mikim tungah hong tung ta hen. Amen.

Ih Zomi tawh kisai in net tuamtuam pan lai kigelh tampi te kasim kha a, tua te sungah nidang a ka lung ngaihsutsut pawlkhat hong ki suaksak ahih manin ken zong tawm kong pulak nuam hi.

Tedim Lai Siangtho Bu leh Tedim La Bu te tawh kisai kikupnopna thu:

1. Ih Zo Lai Siangtho Tawh kisai in kong pulaknop leh ngaihsut khop dingin;

   - Pasian hehpihna tawh i Zomi sungah mipil misam leh khuamu tampi i om manin, ngaihsutna, veina leh lunggulhna tuamtuam hong om ta hi. Tua ahih manin Zo Lai Siangtho tawh kisai in, Nidang in Zo Lai Siangtho i neih masak pen mipi in tuni ciang dong zatnuam leh zatnop kisa in, athu leh la zong hoih kisa bek loin, a zolai mahmah zong thuk zaw leh muibun zong ka sa/kisa hi. A piang thei leh ahizo ding leng hang hih Lai Siangtho Bu lui mah Print kik zo leng ut huai mahmah kasa hi.

Ahi zong in, Mikang ten zong mikang lai in version tuamtuam ci-in, bawlin, nei uha, a thukpai zaw zong om, tu hun kampau leh ahun tawh kizui in simdan, zatdan a nuam zong om hi. Lai Siangtho bu a version tawh kizui-in bu tuamtuam hong om hi. tua ahih man hih Mang Lai Siangtho bangin version tuamtuam en in Zolai Siangtho i bawl pen a thu in, sia kasa kei hi. Version tampi aom bangin ih Zo Lai Siangtho zong version tampi nei leng hang, tuhun tawh kizui-in, i deih bangbang, i sim nop bangbang kisim thei dinga, Mipi ading in hoih mahmah dingin ka um hi.   

2.  Tedim La Bu (ZBC) La Bu tawh kisai in ngaihsut khop dingin; 

Zo La (Tedim La Bu ) ka cih teh ZBC la bu ka cih nopna hi. Tu hun teh Pawlpi tuamtuam hong om bangin, i upna leh i deihdan zong hong kibatlohna leh lunggulhna kibatlohna hangin, La Bu zong Tedim La Bu(ZBC) kizang nuam nawnlo in, i pawlpi zuih dan in athupeuh laih, a kammal peuh ki laih ta hi. Tua ahih manin hih La(ZBC)bu tawh kisai in, Tulaitak Pawlpi tuamtuam pan i makai te in nakpi a, i ngaihsut mahmah dingin ka ut hi. Hih La pen Lai Siangtho bu bang a, version tuamtuam in neih cih te pawl hi loin, a thu leh a kammal te laihlaih selo in, a lui (Original) mah i zatkhop theih ding thupi mahmah kasa hi.

A thu leh a kammal te i ut dan leh i pawlpi up/ut dan in, i laih teh, i Zomi unau sungah Nopna,dahna i tuah teh, La sak pen hong nuam nawnloh peuhpeuh bekloin, tua La in i upmawhloh, i theihloh kal in, hong khenkhen suak sak gige hi. A diakdiak in Hih bang hun teh anop loh dan pen kuakua ahi zong, kua pawlpi ahi zong nuam sa dingin ka um kei hi.

Hih La(ZBC)  hong pian'khiatna Mang La (Mi kang) zong tudong mahin tua mah na zangzang lai uh hi. Pawlpi tuamtuam aom hang, kuamahin amau utna leh upna bangin athu leh kammal te laih tuanlo uh hi.

Hih La (ZBC)la pen Zomi bup in lapi leh La Bu in nei in, a thu leh kammal hoih zaw i deih a, i khelnop leh La thak phuah zawk ding hanciam leng hoih zaw lo ding hiam? Gentehna in, tuhun khanlawhna la ci a, ki puak in, kisa in nuam ki sa mahmah lel hi.

Sum tampi bei-in, ZBC La Bupi a thu leh kammal te i laihlaih sang'in, Zomi te ading ahoih zaw sep ding te ah sum bei sak/ zang zaw leng hoih mahmah lo ding hiam cih pen ka lungsim sungah om thu leh hong lungsim hong sukha mahmah thu ahih manin kong pulak khia hi.

Tua ahih manin Hih La tawh kisai in GZA makaipi te'n zong hong ngaihsut mahmah ding uh utna leh veina tawh,

Lungdam mahmah hi. Mipi tawh kisai genkhialh aom leh hong ngai dam unla, i mipi phattuam na ding ngaihsut piaknop aom leh zong nong gen dingun kong thuum hi. 

Pasian Leenggah huan sungah,

Rev. Kham Do Thang (Thangno)

Pastor

Myanmar Mission Church

Florida, USA

www.mmcflorida.com 


 


Comments




Leave a Reply