WWW.TUNGZANGNEWS.COM

 
It Zomi te,  Eden Zogam mah cih kikdih ni ee..

Zogam hong nimkikna ding in, pilna leh sum lepaai kisam mahmah hi. Pilna ihcih ciang in, ih gam leitang leh Zomi te ading akizangthei pilna cihna hi. Mimal khasum tamngahtheihna pilna zong pilna mah hi a, ahizong ih target Eden Zogam hongpiankhiat na ding in, Zomi Zogam ading akizangthei pilna te ihdeih phadiak hi.

Mailam Zogam khantohna ding in, Electrical Engineering tampi ih kisam a,Degree in Agricuture lamzong honkhat ih omloh aphamawh ahihi.Tranport, Road,Construction and Maintenance lam zong honkhat mah ihkisam pelmawh hi. Zogam khantohna ding in, apel mawh pi nam 3 om a.(1). Khua khempeuh ah Mortor nuamtak tung ding. ( 2 ) Inn khempeuh ah, electric mei 24 hrs paiden ding. ( 3 ) Khua khempeuh ah Tui siangtho alum leh avot ngahkim ding cih thu 3 ahihi.

Hih atung a thu 3 te pen, tu laitak hong uk galkap puanzawng kumpi hunsung inbel, mualmong et banglai ding hi.Ei gam ei mahmah in ihpuah ding hizaw a, tua ih zunzawhna ih puahzawhna amau hong huhzolo uh ahihman in hong cihna ding bangmah omlo hi. Zogam pen Pasian in ahampi a, abawl hi a, ahoihding in azepnailo bek ahihi. Tua azem ding in, Pu Zo suan leh khak te Zogam ah napuak ahihi. Ih tenna Zogam pen, Huihpi Nargis ahizong, Cyclone  ahizong ,Tornado ahizong alauhuai dinmun omlo a, Hsunami bang bel aomthei loding dinmun ahihi.Abeisa huihpi nawk na kisiatna te pen, ih innlam te kipzolo cihna hi. Kawl gam ah electric mei kingahlo in, kawlzang ateng te in, khua lumsa mahmah uh a, Zogam leitang ateng te pen Temperature 50" pan 70 " ciang bang kikal omden in, Air Condition Automatic in thuahsa ahihi. Singkung te ih phukphuk man in, khuahun hong lumta ahihi.

Zomi te gamdang ihtun theihpen Zogam hong nimkikna ding in, Pasian in step khatna hong puak ahi a, Kha 1 in $ 300 ta bekbek ih khua ih tui leh ih innkuan pihte mailam ding kholzo leng manpha mahmah ding in ka lamen hi.Adiak in US pansan in hongkuppih nuam ing. US ah company semte in, Bill teng apiakkhit teh, atawm pen $ 200 bang kikhol thei hi. Ih khol sunsun $100 or $ 200 cihdan in Zogam ah ih nu leh pa innkuanpih sanggam te ihkhak zel pen, amau zong present letsong dan in, nangaihsun lel mawk uh a, aduh adeih leina in na zang lel mawk uh hi.

Sehnel piau ah, haitawh tuisun suk bangden ding ahihman in, sumkhak dan leh sum zeekdan ihsiam mahmah ding kisam kasa hi. Kha 4 sung khol in $ 1000 bang khak in, kumkhat aiding Antang leh Sathau , Cii, Be --- akipan akisam ding koihsak leng mehding pen lo leh inn kim innpaam ah omlel a , antang sathau leh Be leh cii aomnak leh anungta uh ahihi. Kha 8 sung ih khol sum $ 2000 tawh Lo vat hun ciang in, Lo Ciing 3 bang vatsak in, singkung hoih ahi, Apple, Orange ( Lengmaw ) , Avocado ( Thawhbat ) , Ling Uih, Ling Thuk,Singthupui, Zawngtah, Nahtang ( Banla ) etc.... cihbang in, ciing sak in, kha 3 ciang khatveita thacial in, hahzel peuh leng kum 4 sung in pawlkhat sum hongsuak tading hi. Hih pen US tungkhin mimal khempeuh septheih a hihi.

US leh Gam thupi te ah, ih teensuaksawm takpi hiam? Ih khualzin na bek ahiam? Ih gam hong kikhel in Full Federal tawh kiuk leng, inn lam aciah kik nuamlo kuamah kiomlo ding ahihi. Ih gam veng a om Lusei te bang US khawng aut deksuai te uh hilo a, nuamsalua kisa khua phawklo uh ahihi. Hamsatna tamthuak lo uh ahihman in, akhantoh ding zah in khangto lo zaw hi. Zomi khangno te'n ihtheih ding ah, US leh gamthum na te ihtun pen, sum leh pai zonna, pilna sinna in ihzatding kisam lel a, ih target pen Zogam ah ihkoih kimding ahizaw hi. Gam thum nate ah,Citizen ih suaktheihnak leh gam nih anei Zomi te ihhi a, sum lom tawh Zogam ah khantohna khat Company khat ta phuan in, atawmpen mi nasem ding 50 - 100 ciang bang anei small Business Pu ihsuahzawhna ding hanciam tek ni. Biakna sung ah pawlthak phuan in Laisiangtho ih sim kaka keei sang in, Zogam Zolei mah pansan a, small Business Company khatciat ihneih theihding manpha zaw in ka um hi.

Gamdang tung mi 1000 ih om leh ih gam ah Company min ( Zoheisa Studio,Zogam Juices, Zogam Mart, Thangmual Highway Express, Zogam melhol , Zosial saphelh fesh food, Ciimnuai Library, Zomi Community College,Zogam Seafood Restaurant,Zogam Bank,Lentang Mechanic, Zogam Air Lines, Lennupa social service, Zogam Daily Press ) etc..... cihbang nengneng ih siamna ih kivakna Talent khatciat tawh ih gam ih minam ading natampi septheih om ahi a, nasem ding in, kawlte leh Lusei te, Bangladesh ten Zogam ah nasem in hong pai lelding uh hi.

Zoplai ding...

TZN: Tg. Zogam Mungno
Eden Zogam hong suakkik ding hi. Kei mimal ading hilo hi. Ih gam ih leitang ading hi a, ih Generation te ading hi...

 

1. Zogam bup ah, gamsa leh Vasa namkim kap khawlsak ni.

2. Tui sung khempeuh ah, Guu( Poison ) khah leh Mine kap kham cip ni.

3. Vasa nam khempeuh Kap nawn lo in, atui( egg ) te zong ne nawn kei ni.

4. Buh leh Vaimim te ih ciin sang in, kum tam akine thei singkung namkim, guizam namkim te suan kipan ni.

5. Khua khempeuh ah electric power tawh an ihhuan zawhna ding hanciam ni.

6. Khua khempeuh ah Mortor tunzawh nading hanciam in, atawm pen Circle tunna ding beek hanciam ni.

 

Gamdang om khempeuh in, ih pianna khua ciat ah, mikhat in, singno huan atawmpen Aker 5 ta bawlzo leng gamdang tung mi tul 5 ihphak leh Zogam ah singno aker tul 25 om ding a, tuzawh kum 5 ciang in, akang ngeilo ciktui phul bang in ih Zogam ah Dollar luang niahniah lel ding hi. Ih kawlgam Pasian in hun asakciang hong kikhel lel ding a, tua hunciang ciahkiknuam veve ding hihang.. Na ciah ciang in, na singno huan te in nang hongvak kikding hi.  Idea tuamtuam ngetna Zogam ah temperature bang mun te ah bang singno te hoih, ahizong leitung ah bang singno te ih Zogam ah tamciin phadiak leng mailam ah sum hongsuak theiding cih te, akuamapeuh in nong kuppihna ding in, kong thum hi. 

Zom toto lai ni.. For Eden Zogam... 

TZN: Tg. Zogam Mungno


 


Comments




Leave a Reply