WWW.TUNGZANGNEWS.COM

 
Picture
Zomi Siamsinte: Suanghoih khua ah khualzinna lawhcing mahmah
Zogam mun tuamtuam ah kizopna lampi le thumuh, thutheihna le thukizakna haksatna tuamtuam hangin, nuntak khuasak zia le nek le dawnte akipan gentheih haksatna tampi kithuaklawh hi. Tua bang haksaknate sungah adiakdiak in khuaneu/ khuata lamah damlohna khat i tuah ciangin kibawl/ kikepzia ding theihloh banah a sum le pai mahmah neihlohna hangin, zato kilakzolo/ kibawl zoloin sihhun/ sihphat lopi in a sihlawh kitam mahmah ta hi.

Tua bangin Zogam khuaneu tuamtuam ah natna satna akituah ciangin Siavuan, Siamah omlo sawnsawn ahih manin lunglen khasiat huai mahmah Zomi tampi ki om lai hi. Tua bek tham loin thumuhna le khua muhna atawm luat manin nuntakna ah mavan/ lawhcin zah dingin kimavang loin minuai ah ki om hi. Hih bang thute hangin Zomi Siamsin Kipawlna-(Kawlgam) makaihna tawh minam veiina tawh abeisa kum bangzah lai hiam akipan kumsim in Zogam khuaneu/ khau nawlte ah zatui zaha  pua in, Siavuan/Siamahte tawh zin kawikawi uh a, na hoih semkhia zel uh hi.

Tukum ading Zogam Cikha Township sung Suanghoih khua le akim apam khuate a Zomite veina tawh April 11-16, 2012 sung ( Siamsin Medical Trip to Suanghoih -2012) zinkhia uh a, Siavuan Siamah (MBBS), Ha siavuan (BDS) le Siamsin Tangpal mi 20 kimte in Zatui zaha kengin, damlote etna le Thusinna tuamtuam neihpih uh cih kiza hi. Tua bangin a paizawhna dingin gam sung gam pua a om Suanghoih Kipawlna ( Suanghoih National Organization) pan khua le tui mipihte veiina mah tawh panpih uh cih kiza hi. Tua bang nasepna ah Zomi Siamsinte in a thubulphuh thupi anuai abangin nei uh hi.
  • Zogam mun tuamtuam ah a-om Zomite' cidamna lam dinmun (standard) asang zawkna ding
  • Zomite'n cidamna manphatna le a thupitna te thei in cidamna tawh kituak in nuntak theihna ding
  • Cidam lote in cidamna angah nading
  • Zatuilam siamsinte in Zogam mun tuamtuam a-om Zomiten omdan, nek le dawn ziate thei in Zomi itna lungsim akhanzawkna ding
  • Zomi khangnote'n Zomi zatuilam siamsinte enin a hanciam zawk nading
  • Zogam mun tuamtuam ah a-om Zomite in tuhun paizia mu in delh zo in azuih zawh nading
  • Zomi khangnote pilna le siamna, muhna te akhan toh zawk nading.

Siamsin Medical Trip to Suanghoih-2012 pen nuamtak le lawhcingtak in mahialna nei uh cih kiza ahih manin, a kuakhiate le a piakhia a kuamah ciat pahtak huai le lungkim huai mahmah hi. Mai lamah i khua le tui ah cidamna le khantohna a om semsemna dingin Pasian in Zomi Siamsinte mah hong zatsakna ding Zomibup in thungena le sum le pai tawh panpih ciat ni. Siamsin Kipawlna khansau hen.

TZN: Source: PT Tuang, USA


 


Comments




Leave a Reply