WWW.TUNGZANGNEWS.COM

 
Picture
Saizang Gam Ukpi Pu Thawng Za Khup (ATM) Tangthu Tom
(TZN) - Pu Thawng Za Khup (ATM), pen Ukpi Pu Do Tual leh Pi Pum Khaw Man te' sung pan March 15,1907 ni-in Tedim gam huam Saizang khua-ah suak hi. 1924 kum in Mawlaik Gov’t Middle School pan tan 7 zo hi. Saizang khua Pu Tun Khaw Lian leh Pi Goih Hau-te tanu upen Pi Tel Za Kai tawh kiteeng hi. Tanu tapa tampi nei a, aneulai un tampi mah si ahih manin tanu thum leh tapa thum bek khansuah hi. Laitan 7 a zawh khit ciangin Tedim Anglo Vernacular Middle School-ah Sang sia sem hi. 1928 kum apa Pu Do Tual asih khit ciang a pa zaluah to in Saizang gam ukpi seem hi.

Leitung galpi nihna hong tun ciang gam leh lei huut na ding le Japan galkapte do nangin, Tedim gam “A” Levies-ah Company Commander seem in, galmaai muntuamtuam-te ah panmun la hi. Japante ukna sungah Japan galkapte leh do a, nawhkhiat nang vaihawm S.I.A (Sukte Independent Army) makai seem hi. Sep 14, 1944 zan in nitumna lam gun gaal pan a hongpai S.I.A galkapte tawh kikop in, Mualbeem khua a om Japan galkapte anawh khiat khit ciangin , Zawngkong, Siallutaak mual, Saizang, Phaileeng khuakhung leh Suahliim a Japan galkapte' phualpite sim kawikawi uh hi.

1947 kum in Shangam, Pinlong khua-ah Kawlgam khempeuh kipawl in Mangkang kumpi tung pan suahtaakna la a, Democracy ngeina tawh ki uk nang, thukimna-ah Zomite tangin lemat thuh hi. Kawlgam suahtaakna ngah zawh Democracy ngeina tawh ki ukna hun ah zong, Village Council Chairman(hausa) leh Circle Council Chairman(Khawk-uk) munte ah kiteel suak lai hi.

Tangpi vai ading Nasepnate

1. Innmun logam zuak in, leiba thaangba tawh anaute pilna sinsak hi.

2. Saizang khua-ah Sang a kihon theih nangin, amun agam saangmun dingin pia hi.

3. Leitung galpi nihna khit 1945 kum Tedim gam, Tedim khuapi-ah sang a kihonkik nang vaihawm makai khatin pang hi.

4. Leitung galpi nihna sung a, Mangkang kumpite’n Tedim khua-ah Zalui tui alaakna siik tuizawn-te kumpite tungah siau/ngen in, Saizang khua ading Zozaang tui lakna ah makai hi.

5. Kumpi tungah Pyidawthar huhna tawh tuizawn siau/ngen in Vatui-tui laakna in kizang hi.

Biaknalam panpihna

1. 1939 kum in Roman Catholic phungzi (Piantite-te) Saizang khua-ah sam in Pasian thu gensak hi.

2. Tuiphum Tapidaw-te kipatcil nangin Kansan lui gei, tu a Catholic phungzipa innmun san teng biakinn mun in zang sak hi. (Tuiphum Tapidaw te’n zong tu laitak a Biakinn mun-ah akituah ding ciang, voktal tuuk nga khat tawh lungdam kohna nei in, limtak kinekhawm hi.)

3. Tu a RC phungzipa innmun leh leitang pawlkhat zong ama piak ahi hi. (Tua banah tulaitak Saizang khua a RC biakinn tualzang teng pen, nidang in Kansan lui, Keenthukpi hi a Saizang khua ah akithat Japante luang zong tua lui sungah kipai hi. Catholic Rev. Father Rullen in ama siamna tawh tua hawkguam thuukpi pen zaangsak a, tu in Biakinn tualzang asuak hi. Pu Thawng Za Khup in April 18, 1966 in Falam Zato ah hong nusia hi.

Ukpi Pu Thawng Za Khup suan leh khakte

1. Pi Man Za Go  ( pasal) – Pu Song Khan
2. Pi Mang Do Cing ( pasal) – Major Tual Khen Pau
3. Menzi Pu Tual Khaw Mang 
4. Lt. Colonel Lian Khan Thang
5. Pi Lian Khan Vung – Lt Colonel Tual Do Dal
6. Pu Nang Cin Pau

Source: Saizang Tuiphum Pawlpi, Diamond Jubilee (2003)



 


Comments




Leave a Reply