WWW.TUNGZANGNEWS.COM

 
Dear Zomi ulehnau,
Topa lamlahna tawh Zogam adung avai ah Topa mintawh Zomi te Kha leh taksa damna dingin nasepna te alunglut leh athei nuam te adingin hongtangko khia ing.

Pasian in honghepih in khetawh, motor cylce tawh leh motor tawh cihbangin Zogam singnuai gam mual hongzinsak kawikawi ahih manin kalungdam mahmah hi.

1. Tuitum khua ah:

Tuitum mi US a omte vaihawm siamna tawh khuazang bupin Crusadebawlna hongnei sak uha Topa in kipumkhatna tungtawn in na lamdan tampi hongsem in kilawhcing mahmah hi. Gupngah thak leh Topa damsakna angah thak mi tampi tak om hi.

2. Tahan Tuiphum pawlpi ah:

Tahan tuiphum pawlpi pen Pasian sungah kisatsuah nuam mahmah uha nitak 6 sung Lungdamna Gospel thu kitangko in Topa kha in nakpitakin na hongsem in nalamdang tampitak hongpiang hi.

3. Heilei khua paina:

Heilei khua pen kum 2001 lai in lungdamna gospel thu katangko na hiin tuni in akhuasung uh zong nakilam dang mahmah uhhi. Tutung in Nupa kop a tuikiphum zawh golden Jubilee ala Pu Neng Za Go te nupa zong hampha kasa mahmah hi. ZBCM youth conference zong om ahih manin khangno 700 kim bangin Heilei khua ah kituah khawm in Pasian vangliatna mu uhhi.

4. Suangphei khua paina:

Suangphei khuazang bup hongkikhawm uha, tuiphum pawlpi te biakinn lamthak zong zattheih dingin apna zong hong neisak uhhi. Khuazang bup in Pasian biakinn sung ah ki khawm zihziah in thangah huai mahmah hi.

5.Suangzang khua ah:

Suangzang khua ten crusadebawl dingin hongsap zawh uh kum nih bang pha ta a, tutung in kabawl thei pan uhhi. Gupngah thak mi 15 tui hongphum sak uha a, cina Topa damsakna angah zong honkhat om hi. Lawiki asawtvei suak penpen Nu Ning acih zong tutung taktak in kituiphumna hong la taktak sam hi. Akitui phum khit phet in ainn bi tawh akilam akeh mahmah pen Topan sikkang tawh khuhsak pah lian a Pasian itna hangin hampha kisa mahmah hi.Khuazang bup in tuiphum biakinn sungah hong kikhawm uha lungkim huai mahmah hi.

6.Kaptel khua ah:

Kaptel khua ah Gospel thu tangko dingin kapai uha, pa Dong te inntual ah khuazang bup in kikhopna hongnei in lamdang kasa mahmah hi. Hi bangin kipumkhatna aom pen ih Zogam leh Zomi te pen nidang tawh akibang nawn hetlo ihihna thu kamu semsem hi.Kaptel a Carmel thungetna ah kapai uha lamdang leh manpha mahmah kasa hi.

7. Lalta khua ah:

Lalta khua ah Lungdamna gospel thu tangko dingin kapai uha khuazang bup mah in hong kikhawm uhhi. Gupngah thak mi 13 tuiphum thakna neisak in Topa tungah athak a ki apna nei mi honkhat om hi. Atuidawn uh leh asang inn te uh thupha piakna kinei in lungdam mahmah uhhi.

8. Suangsang khua ah:

Suangsang khua bup in kipawlkhawm in hongkikhawm uha a, Pasian vangliatna tampi kimu hi.

Gospel pai teng:

1.Rev.Pau Khan Khai
2.Ptr. Vum Khan Pau
3. Pa Kam Suan Mung
4. Pa Lian Suan Pau
5. Nu Ciin Khan Nuam
6. Lia Cing Lian Niang

Pasian in Zogam leh Zomi te apuah a zun thei dingin hong omsak pen ka lungdam mahmah hi.Zogam ih zin ciangin piteek leh nangpang tam in khangno khanglai teng zinkhia mang uhhi. A omlai piteek puteek teng tungah itna tawh iveh ivaan ciangin alungdam mahmah uh a khitui tampi hong luang khia hi.

Pasian nasem te ading in thu hongngetsak khempeuh te tungah lungdamna lianpi kongko a mailam ah zong Zogam leh Zomite puahna dingin itha ingal te sikhetlo in hanciam ding ilungsim sungah om mahmah hi.

Topa mintawh nasepna kiu khat pan,

Rev.Pau Khan Khai
Zosiam Gospel Ministry pan

 


Comments




Leave a Reply