WWW.TUNGZANGNEWS.COM

 
Picture
Zogam Mual minthang khat a hi "Len Nupa"
Len Nupa cih pen Zomite' Tangthu ah mual minthang khat a kigen hi-in Zogam Tedim gam huam Ailam kici mualpi dawn Kaptel khua khung tai thum agamlatna mualpi nih kituah hilhelna, mualkuam zaang nopci mahmah khat ahi hi. Kaptel gam sung gammang tulak ( Reserved forest ) huam sungah omin, Tedim gam ciamtehna lim (Land Record) zumpi ah zong gamlim ki-en thei hi. Abeisa 20.03.1992 ni-in Sia Pau Za Khan panpihna tawh Len Nupa ah mualsuang khat thungetna tawh kiphut hi. Hih Len Nupa mual pen mual minthang khat ahih mah bangin, na lamdang thu tuamtuam apiangte athei nai lo, le a za nai lo tampi ki om lai hi. Len Nupa mual pen Tedim khuapi pan taisawm nih gamla ahih manin asawt lo-in hun nuam zangh dingin Len Nupa ah ih pai thei ta ding hi.

Len Nupa thu ciaptehna :
  Falam gam leh Mizo gam dong a minthang, Len Nupa thu ih theihloh ding pammaih lua sa ka hih manin, Jan 3,2010 ni-in Kaptel khua AG sia Rev. Song Sian Pau kiang ah “ Len Nupa tangthu laibu khat ong bawl in; azaknop huai thu lamdang tampite ciapteh huai hi. “ ci-in ka cial hi. Tua ni mahin Hausa pa Do Za Tuang kiang ah,”Len Nupa pai nading mawtaw lampi na zong un la, Len Nupa a kiimah sing phuk lo, lokho lo, gam hal lo in sa zong beng sak kei-in “ci-in ka ngaihsutna ka kikuppih hi. 2011 kumin Teltui Zingsol (Vol. 2 ) sung ah azaknop huai Len Nupa thute ong hawm khia pah uh aa, tu-in tua laibu siksan kawm in kong gelh khia sawn hi. Kaptel pan Len Nupa lampi zong tukum March 2012 sungin lampi bawl/ tawh kipan zo uh hi.

Etlawm mualkuam Len Nupa :  Tua lai a apiang thu lamdangte hangin, ‘Si-khate khua ‘ hi ding hi, ci-in aki um, aki- lipkhap, Len Nupa pen Falam gam leh Mizogam dongin minthang hi. Falam gam ah khanglui mite-in ‘gamsa-te pianna mun leh a uk a ngakte omna mun ci-in um uh ahih manin gamsa ngen dingin ong pai thei zel uh hi. Mizo gam panin Len Nupa ahoihna en dingin akum akumin mi tampi ong pai uh hi. Ka neulai-in Len Nupa thu akigen ka za ngei aa, “ Tua lai va tung leng hoih lua ahih manin kiciah kik nuam lo phial hi ” ong ki cih ka mangngilh thei kei hi. Mangkangte-in zong abawltawm uh, fairyland, ci-in dawi gam dan tangthu tuamtuam nei uh hi. Ei Zomite-in amun, agam ngiat in, tuni-dongin ih muh theih, ‘ Si-khate khua ‘ kici, thu lamdang tuamtuam apianna, Len Nupa nei ihih manin ih, ih hampha hi. 

Len Nupa pen acre10 val ding zai-in, tuipi mai pan pi 7,256 asanna ah om hi. Mual sang dawn ah om ahih manin, huih vot siangtho nung hiauhiau denin, len paak leh lopate huang ngeelngeel hi. January pan May kha sung tengin lenpak asan, adum, pak zihziah in etlawm lua hi. A kiim apam ah gam-maang tulakin umcih aa, van dum tawh ih etkhop ciangin etlawm mahmah hi. A laizang ah tui / lui neu khat kawi ngiuu-ngeuu in luang hi. Tungtun lianpi bangin mualbo om litlet kawikawi aa, tua mualbote ah lothang peek mihing khut tawh kisuan lo, agualgualin po hi. Kawltu zong po ngei aa, tuhun ciangin bei ta hi. Nahlun kici singkung namkhat zong po aa a gammangte/ mimangte bekin mu thei uh hi, ci-in kigen hi. Akiim apaam ah vasate khuang liingliingin ong lungnuam sak hi. Sun gamdaih hun ciangin gamsate’n tui ne uh aa, zan ciangin sapite pai uh hi. Mun khatah Innka dolpek/ dolcial kidawh bangin suang azaangtaam khat om aa “ Suang innka “ kici hi. Tua suang innkaa adung pi 10 sau in, a vai pi 15 zai hi. Len Nupa panin Aizawl khuapi leh India gam khua tampi zong kigal muh thei hi.

A kigen thu lamdangte : Taang lai-in tua Len nupa tui naak lam ah, mihing bangin a awk/ a Lua khat kiza thei zel ahih manin, ‘LuaZang ‘ kici masa hi. Len Nupa akipai ciangin aphual ah, “ Len Nupa“ ahih kei leh, ”Luazang kici-ngam lo aa ”Hausapi “ , ahk.” Ih pute Khua” kici hi. Suang Innka zong ‘ Hausapi Innka’ kici aa tua hi kei leh kigam -mang thei hi. Len Nupa pen ‘Si-khate Khawlmun ‘ zong ki ci hi. Khanglui mite in, misi ding a om ciang in a mang sung uh ah kilangh kholin a kha uh, “Len Nupa ah kikha tektek ung “ ci-in gen uh hi.

Nidang lai hun Khuado ciangin, misite kha in ong siim uh aa, zankim lai-in ong tungin zingsang phalvak kuanin Len Nupa lam ciah to uh hi ci-in, maangmute-in gen uh hi. Vankah mi pawl khatte’n hih mun ah, lungmuan tui, zuan loh tuidam luang in, misite kha Luazang atun ciangin gam ngakte’n tua tui na tulh ahih manin, a-inn lam uh phawk sak nawn lo hi, ci-in kiciamteh hi. Khatvei lai-in Kaptel khua pu Phawng Gin,kici  logiak aa zan ciangin Len Nupa gei ah naupang khat in “ Kawltu ka nekna in ka hani sisan ” ci-in a lasak za hi. Sabengte khat veivei gammang thei uh aa, zan ciangin Len Nupa ah zan thapai khuang leh zam kitum za uh hi.

Khatvei leuleu sabeng pawl khat Len Nupa kim ah giahbuk sat in om uh hi. Khat awnghawh dingin pai aa ong ciah ciangin giahbuk kim teng kiimvel kawikawi hi. Asawt ciangin , ‘ Ong ciahin, hih lai ah ‘ , a cih uh ciangin ciah thei pan hi. A gennop loh hangin a mit humsakin akai kawikawi khat om hi ding hi. Khatvei leuleu Len Nupa ah mi nih sabeng in giak uh a, Mi pau za uh aa zong uh hi. Kuamah a muh loh uh ciangin abil uh lei ah phah in angaih uh ciangin za thei pan bek uh ahih manin, tua pen ‘lei pau’ kici hi. 

Ni khat sabengte-in tui luanna akawi ngiungeu a kimat kik dekdekna sawn khia/ sulet-in a tui kigawm sak uh a, mun dang apai kal un angeina bangin na om/kizom kik zel hi. Susia zel uh aa kibawl kik zelzel hi. 1962 kumin Thuklai khua, Sia Mang Thawng, sangnaupangte tawh Len Nupa ah pai uh hi. Len Nupa gei ah ‘ buah, mengkeng ’ thau tawh akapkap uh hangin man lo uhhi. Tua zan a mang sung uah numei no khatin “ Ka akte uh nong kap sak uh ka pa heh mahmah ahi maw ! Man le uh cin ka pa’n ong dawm lo ding hi ven, ong kap sak nawn kei un “ ci-in gen hi.

BUANNEL pan LEN NUPA : PuThuam Thawngin Kaptel khua, kum 1867 kumin sat hi. Tual gal om lai hun ahih ciangin gal dal dingin Suangzang khua leh Tuitawh khuate na phut hi. Galvilnate kumsimin thumvei ta a-encik dingin pu Kai Tuah, Galthukan Mangpi in koih hi. Ni khat galvilin apai leh mual dawn zaang mun nopci khat mu aa, tua lai ah khua sat ding ngaihsun hi. Gam vel pha dingin vapai kik uh aa khua ong mui ciangin naupang lasa, mi pau leh khuang leh zam ging ngeiingaii a zak ciangin, khua sat ding khawl kik uh hi.Tua kuam zaang ah apai uh ciangin buan nel dikdek khuk ciangciang pha ahih manin, pu Kai Tuahin tua lai mun, ‘ Buannel ‘ ci-in min phuak hi.

Ni khat pu Kai Tuah agalvilna ah mihing khekhap athak mu aa, sulzuih pah hi. Pasal khat tui luanna gei ah mu-in, pummat hi. “ Nang ka gam ka khua Kaptel ong sim nuam aa ong ensim hi teh, kong man ding hi “ a cih ciangin, tua mipa-in, “ Kei Bocung mi ka hi aa, ko hih lai, Len Nupa ka ci uh hi. Gamsate pianna mun hi kaci uh aa, gamsate a uk leh hih leitang angak, Lalnu ( Chawng Tin Leri) kiang gamsa angen dingin ong pai ka hihi; pute aw, ong man kei tapeuh un “ ci-in thum hi. Pu Kai Tuah in “ Ih kimat, ih kithah hangin phattuamna om lo ahih ciangin lawmta, zawlta-in kiman ni “ ci-in akip sak nadingun akituahna uh mun min lawhna ki khek dingin kithukim uhhi. Falam, Mizote leh Hualngote’n tua lai mun, ‘ Len Nupa ‘ acih min pen ‘ Buannel’ akici min tawh kikhek uh aa, tua ni aa kipanin, Len Nupa kici hi. ‘ Mual Nupa’ cihna hi in alang tuak aa mual khat anu, khat apa ci-in kiciamteh hi.

Hualngote’n “Buannel Ramdai Cawngtin Leritual henna” kici laibu bawl uh aa la zong phuakin sasa uhhi. Ahih hangin,‘Buannel’ akhiatna leh apianna thu thei lo uh hi, ci- in Tui Trih khua kum za cinna jubilee magazine laibu sung ah ciamteh uh hi. Mizo gam ah zong kumpi sangte ah ‘ Buannel Ramdai “ cih thu ki sinsak hi. Falamte in zong ‘ Buannel Arsi ‘ ci-in magazine laibu tampi hawmkhia uhhi. Hih thu ih et ciangin pu Kai Tuah’ mi hehpih theihna le, amuhna saupi a madawk kholhna kilang hi. Galmat, samat kidem hun lai hi aa, thatin gal-ai leh gualtung tuangin minthang ding hi napi, mi-thah, galmat cihte mihing vai hi lo ci-in na mu khin hi. Tua bang amadawk ngaihsutna picing, mihing thuneihna, ‘ human right ‘ Zomite lak ah angaihsun masa pen leh azang masapen hi ci-in ki ciamteh hi.

Pu Kai Tuahin hih a hoih, a-etlawm Len Nupa min ama ong phuah sak suak ahih ban ah Len Nupa min ih lawh simin, khat leh khat ki-it ding, ki lawmta ding aa, mihing hihna ih thupi sak ding ong vaikhak ahih lam ih phawk ciat ding hi. Len Nupa lampi : Kaptel panin Len Nupa pai nang lampi sawtpi pekin taangpi tha tawh bawl ngei uh aa, 2008 kumin UNICEF uliante zong pai khin uh hi. Tu kum March kha sungin tua lampi pi 4-6 azai, motor cycle nuamtak aa apai theihna dingin hausa pa Do Za Tuang’ makaihna tawh kipan leuleu aa hih lai aki at laitak in,Kaptel pan tai khat ciang to khin uh hi. ZRDC in zong huhna sum thein nga tawh panpih ding ci-in ki za aa ki thalawp mahmah hi. Mai lam ah kuamahciatin ih hih theih bangin, ih gam a hoih semsem nadingin ih hanciam ciat ding hi.

Len Nupa na pai nop leh : Tedim-Kaptel-LenTang mawtaw lamlianpi zong tu kum sung mahin azaizawin ki puahpha ding ahih manin, mun tuamtuam panin Len Nupa ah asawt lo-in, hunnuam ki zang thei ding hi ta hi. Kawl zaang aa atengte leh Tedim lampan a pai nuamte adingin, Tedim–Kaptel- Len Nupa lampi nuamtakin kitawn thei ding hi. Saklam panin, Laitui-Kaptel-Len Nupa hi ding aa, India gampanin, Mizogam leh Lamka panin zong kipai thei ding hi. Khanglam, Falam lam panin Munluah khua tawh taili bek kigamla hi. Nidang pek aa kipan Mizogam panin, Len Nupa’ hoihna le nopcitna en ding bekbek in agamlapi pan khe tawh kipai ziahziah hi. I Zogam ah hih bang gam minthang i neih khak lam thei loin, ei Zomite in i awlmawh mel kei le Pasian hong piak thupha a thusimlo hi ding i hih manin, dahhuai phial ding ahi hi. Tua ahih ciangin limtak aa ih puah, ih kepcing ding ih gamluah, ‘ Etlawm mualkuam LEN NUPA’ ahihi. Hun nuam zangh khawm dingin Len Nupa ah kimu ni.

Ih Zo gam sung ah Len Nupa bek hi lo-in, a-etnophuai mun thupi tuamtuam om lai hi. Lunglen Kawlpi, Inn Buk mual, Thah Puang Pawl leh a ki mu mengmeng lo ( a om takpi ahih leh) Thuam Tuilite zong hoihtakin ih puah pha ding hi. Zalui tung, Ngennung lam ah zong bak kua hawmpi khat om hi. Tua gei ah zong Meitei gal mangpa kikap lupna Suangsuang zong etnophuai hi. Hihte thu zong a theite-in ong gen le uh cin kiza nuam hi. Ih tangthu aa kigen Thawm tangvalte kidemna, mei apekna mun, Sialkong kan, zong limtakin ih ciapteh ding thupi hi. Tua ahih manin I Zogam ah Pasian khutma mun thupi/ mual minthangte kemcing in, i zun i puah siam ciat dingin Zomite i kihanthawn hi. Zogam le Zolei Topan thupha pia hen.

By: Dr. Dongno ( Australia)



 


Comments




Leave a Reply